ئه‌و پياوه‌گ وه‌رجه‌ سه‌رده‌م خوه‌ى

جه‌لال  شێخ عه‌لى

شه‌فه‌ق نيوز/ پياويگه‌ ئاشق ئازادى و ئاشتى، گه‌وره‌يى هويركردنى له‌يوا كرد هه‌ر له‌ ته‌مه‌ن مناڵييه‌و باێده‌ ڕز جه‌نگاوه‌ره‌يل وه‌رگريكه‌ر له‌ مافه‌يل ملله‌ت كوردستان ئه‌را وه‌ده‌سهاوردن ماف و دروسكردن ئاشتى، ئشقى ئه‌را ئازادى ره‌زايه‌ت وه‌پى نايه‌رێد ئه‌را ئه‌وه‌گ كه‌سيگ له‌ رووڵه‌يل نه‌ته‌وه‌گه‌رى ژيرده‌سه‌ى دوشمن بدێ.

 

ئشق ئازادى و ئشق ئاشتى له‌ هه‌مان وه‌خت ئه‌گه‌ر مه‌حاڵ نه‌ود كار سه‌ختيگه....‌

 

ئمڕوو مه‌ردم تاڕاده‌يگ ناتويه‌نن ئى هه‌ردوگ مه‌بده‌ئه‌ وه‌يه‌كه‌و گرده‌و بكه‌ن، ئه‌ويش له‌وه‌ر ئه‌وه‌گ دڵ ئاده‌ميزاد و هزريشى نه‌ڕه‌سيه‌سه‌ ئاست و به‌رزاييگ له‌يوا ك فراوان بدێ ئه‌را وه‌كه‌وناين ئه‌و هه‌ردوگ مه‌بده‌ئه‌ له‌ هه‌مان وه‌خت، هه‌ر له‌وه‌ر ئه‌وه‌يش مه‌ردمانيگ كه‌فته‌ وه‌رچه‌ومان ك نيشتمانپه‌روه‌رى و خاسى ديدو نوڕستتنى و خوه‌نينه‌وه‌ى ئه‌را واقع له‌لى نكران كريا.

 

وه‌گشت ئاساييگ من باس له‌ مه‌سعود بارزانى ئه‌رادان ئه‌كه‌م، ئه‌و پياوه‌گ وه‌رجه‌ سه‌رده‌م خوه‌ى وه‌ چه‌ن ساڵێگ، پياويگ سه‌ركردايه‌تى نه‌ته‌وه‌گه‌ى كرد له‌ بار سه‌ختيگ و مزگانى داپيان وه‌ ئالشتكارى ئاينده‌يى هه‌ناى ك ئه‌و ملله‌ته‌ وه‌ سه‌ختترين وه‌خته‌يلێ گوزه‌ر كردياد.

 

به‌ڵێ قسه‌ له‌بان مه‌سعود بارزانى ئه‌كه‌م، ئه‌و سه‌ركرده‌يگ بوى هه‌ر له‌ ساڵه‌يل هه‌يشتاى سه‌ده‌ى وه‌رين مزگانى دا پێشمه‌رگه‌، وه‌تايبه‌ت له‌ جه‌نگ خواكۆڕه‌ك وه‌ ئه‌وه‌گ بارودوخه‌ جوور خوه‌ى نامينێدو پيشبينى ئاڵشتكاريه‌يل سياسى كردياد، دى وه‌خت فريه‌يگ نه‌كيشاو ئه‌و ديده‌ جيوه‌جى بوى، ك ئه‌ويش جه‌نگ كه‌نداو يه‌كه‌م و دويه‌م و دوياى ئه‌وه‌يش رميان رژيم به‌عس و دامه‌زرانن هه‌رێميگ فيدراڵى ئه‌را كورده‌يل و ئاڵشبوين كوردستان له‌ ئاواييگ بويچگه‌و ئه‌را به‌هه‌يشت عه‌ده‌ن ك مه‌ردم له‌گشت وڵاته‌يل دونياوه‌ روێ له‌لى ئه‌كه‌ن، وه‌ل ئه‌وه‌يشا بارزانى پيشبينى دوشمنايه‌تى ده‌وڵه‌ته‌يل داگيركاريش له‌بان هه‌رێم كوردستان كرد له‌ قوناغ دوياى جه‌نگ داعش و هه‌ر وه‌و خاتريشه‌ ده‌رچگن وه‌ سه‌ركه‌فتن سياسى له‌ جه‌نگ وه‌خاستر زانست و سه‌ركه‌فتن سياسى جيوه‌جى كرد وه‌ ريژه‌ى راپرسى نزيك له‌ 93% تا راپرسى بدێده‌ چه‌كيگ ئاينده‌يى وه‌ده‌س كوردستان ك وه‌جووريگ نه‌ف له‌لى وه‌ربگيريه‌ێد له‌وه‌خت خوه‌ێ...

 

ئه‌وه‌يش ئه‌خه‌مه‌ هويردان ك ئى سه‌ركرده‌ ديد و نوڕستنى خاسه‌، هه‌ر له‌ يه‌كه‌م رووژ دوياى خيانه‌ت 16ى ئوكتۆبه‌ر و ئويشێده‌ پيمان بارودوخه‌گه‌ وى حاڵ ئيسه‌يه‌و نامينێد و پشت وه‌خودا ئالشتكاريه‌يل ئاينده‌ ها ڕييه‌و... ئاڵشتكارێ ها ڕييه‌وه‌و منيش هام له‌و باوه‌ڕه‌ گومان له‌تى نيه‌، چوينكه‌ ئى قسه‌ كه‌سيگ ئويشێده‌ى خاوه‌ن ديد و نوڕستن فريه‌يگه‌و ئيمه‌يش ئه‌وه‌ ها بانمان ته‌نيا سه‌بر و چه‌وه‌ڕێ بكه‌يم.

جه‌لال شێخ عه‌لى