ئه‌را بیگانه‌ كرده‌ى خه‌رمان، ئه‌را خوه‌ى له‌لى بویه‌ ده‌رمان!!

شفق نيوز

ئه‌و تاریخه‌ چه‌واشه‌ كریه‌یگ و ده‌س بى به‌زه‌یى وه‌پى ره‌سیگ و له‌كه‌دار كریه‌یگ ده‌رهه‌ق وه‌ خاوه‌نه‌ ره‌سه‌نه‌گه‌ى و له‌به‌رژه‌وه‌ندى نه‌ته‌وه‌و چین و لایه‌نه‌یل تر نویسیه‌یگ، یه‌یش خیانه‌تیگه‌ ده‌رهه‌ق وه‌ ئنسانیه‌ت ئه‌نجام دریه‌یگ له‌وه‌ر هه‌ر خواست و مه‌رامیگ بوود.

ملله‌ت كورد له‌مه‌یدان شمشیردارى و ئازایه‌تى و سه‌رخستن دین ئسلام، فره‌جار به‌شدار جه‌نگه‌یل سه‌خت بویه‌ شان وه‌شان مه‌ردمان موسڵمان غه‌یره‌ كوردو له‌وه‌ر خاتر سه‌ركه‌فتن دین ئسلام ئه‌وه‌ك وه‌پى كریاس دریغى نه‌كردگه‌، وه‌لى ئایا چ تاریخیگ ئسلامى ناو سه‌ركرده‌یگ كوردو چه‌ونه‌ترسى و ئازایه‌تى كورده‌یل له‌ناو لاپه‌ڕه‌یلى توومار كردگه‌؟ ئه‌گه‌ریش باس كوردیگ كریاویگ ئشاره‌ت وه‌ نه‌ته‌وه‌گه‌ى نه‌كریاگه‌و خریاسه‌ پاڵ نه‌ته‌وه‌یگ تر.

ئیمه‌ى كورد هه‌میشه‌ تاریخمان تیكه‌ڵ نه‌ته‌وه‌یل تر بویه‌و دویاخریش هه‌ر ئه‌وان له‌ڕوى تاریخه‌و له‌لیمان قانجاز كردنه‌و هه‌میشه‌ كورد و ه‌گووره‌ى تاریخ هووكار سه‌رخستن جه‌نگه‌یل یۆنان و رۆمان و ئمپراتۆریه‌ت عوسمانى بویه‌و بیجگه‌ ئه‌وه‌یش خودبه‌خشى فره‌یگیش داشتگه‌ له‌وه‌ر خاتر دین ئسلام و هه‌ر له‌وه‌ر ئه‌وه‌یش خزمه‌ت فره‌یگ وه‌ كیشه‌ى عه‌ره‌ب كردگه‌، ئنجا تاریخ باس ئه‌كاو ئویشیگ: دویاى فه‌تح عه‌ره‌بى و ده‌وڵه‌ت ئه‌مه‌وى و ده‌وڵه‌ت عه‌باسى كورد خزمه‌تیش وه‌ مه‌غول و ده‌وڵه‌ت سه‌فه‌وى و سه‌ڵته‌نه‌ت عوسمانى كردگه‌، ئه‌ویش له‌شوون ئه‌وه‌ك خلافه‌ت جیواز بویه‌ ئه‌را عوسمانیه‌یل و ده‌سڵات داشتنه‌ له‌بان ناوچه‌گه‌، وه‌لى هه‌ر وه‌ختیگیش كورد ده‌سڵات یا میرنشینى و سه‌روه‌خوه‌ییگ بیاشتاد، ئه‌وه‌ له‌گشت لایگه‌و هه‌وڵ ئه‌وه‌ دریا له‌و نه‌خش و ده‌سڵاتیه‌ كه‌مه‌و بكه‌ن و بگر هه‌وڵ ڕماننیشى دیان، یه‌یش له‌وه‌ر ئه‌وه‌ك هویچ وه‌ختیگ بیگانه‌ متمانه‌ى ته‌واویگ وه‌ كورد نه‌یاشتنه‌و نه‌تواسنه‌ له‌جه‌نگ به‌رژوه‌ندى خوه‌یان زیاتر كورد قه‌واره‌یگ سه‌روه‌خوه‌یى داشتوود، دى وه‌و شیوه‌یشه‌ هه‌رچى سه‌ركه‌فتن و ده‌سكه‌فتیشه‌ هه‌ر وه‌ناو ئه‌و ئمپراتۆریه‌ت و هیزه‌یله‌و توومار كریا ك هووكار سه‌ره‌كى كووره‌وكردن تاریخ نه‌ته‌وه‌یگ وه‌ ره‌وا زانستیان، هه‌ر له‌وه‌ر ئه‌وه‌یش دوینید ئیسه‌ ناویان له‌تاریخ مه‌ندگه‌، ئه‌را نموونه‌: كورد له‌جه‌نگ دژ سه‌لیبیه‌یل و ئازادكردن(قودس)یش دویاى زیاتر له‌ هه‌یشتا ساڵ داگیركارى ك له‌ 583ك/1187زایینى وه‌سه‌ركردایه‌تى سه‌ڵاحه‌دین ئه‌یووبى و جه‌نگاوه‌ره‌یل كورد وه‌ناو سه‌رخستن دین ئسلام ته‌واو بوى، ك بیجگه‌ تاریخیگ ئه‌را عه‌ره‌ب به‌ش كورد له‌تى ته‌نیا هه‌وڵ و ته‌قلا بوى و دویاخریش وه‌ناو عه‌ره‌به‌و توومار كریا، ماناى ئه‌وه‌سه‌ (كورد تاریخ بیگانه‌ كرده‌ خه‌رمان و ئه‌را خوه‌ى له‌لى بویه‌ ده‌رمان).

له‌مه‌سه‌له‌ى جیوازبوین خلافه‌تیش ئه‌را عوسمانیه‌یل له‌ ده‌وروه‌ر سه‌ده‌ى 16 جویر ئه‌وه‌ك تاریخ باس له‌لى ئه‌كا، له‌وه‌خت كیشمه‌كیش ناونى هه‌ردوگ ئمپراتۆریه‌ت فارسى و عوسمانى، ئه‌وه‌ بوى ك كورده‌یل خزمه‌ت وه‌و دو ئمپراتۆریه‌ت دژه‌ یه‌كتره‌ كردیان و له‌ى ناونیه‌ ملله‌ت كورد فره‌ترین زه‌ره‌د وه‌پیان ره‌سى و بیجگه‌ ئه‌وه‌یش خاك كوردستان بویه‌ مه‌یدان ئه‌و جه‌نگ و كیشمه‌كیشه‌یله‌، وه‌لى دویاخریش تاریخ وه‌لاى نه‌یاره‌یل كوردا شكیاوه‌و كورد له‌ى ناونى بویه‌ چیلگ و ئاگردوى ئه‌را گه‌رمه‌وكردن تاریخ نه‌ته‌وه‌یل تر و خوه‌یشى له‌لایه‌ن تاریخه‌و هه‌میشه‌ هه‌قخوریاگ بویه‌و خیانه‌ت له‌لى كریاگه‌. له‌یرا تویه‌نیم ئه‌و پرسیاره‌ له‌خوه‌مان بكه‌یم و بویشیم ئایا هووكار چه‌ بوى كورد له‌تاریخ شوون هه‌میشه‌ سه‌وزیگ نه‌یاشت؟ بیگومان له‌یرا بایه‌سه‌ ئشاره‌ت وه‌ئه‌قڵیه‌ت هووزایه‌تى و دینى كورد بكه‌یم ك هووكار سه‌ره‌كى گومبوین تاریخمان بوینه‌، چوینكه‌ ئه‌قڵیه‌ت كورد له‌و سه‌رده‌مه‌ له‌خزمه‌ت و به‌رژه‌وه‌ندى مه‌ردمان تر بوینه‌ له‌ژیر ناونیشان دین ئسلام و مه‌سه‌له‌ى نه‌ته‌وایه‌تى ئه‌و ده‌وره‌ نه‌یاشتگه‌ له‌لایان و هویر دویاڕووژ وه‌پیان نه‌ویه‌و هه‌ر له‌وه‌ر ئه‌وه‌یش له‌ڕوى تاریخه‌و زه‌ره‌دمه‌ن یه‌كه‌م بوینه‌.

جه‌مال ئه‌ركه‌وازی