مه‌ته‌ڵیگ له ڕووزنامه‌ى عشق كورده‌یل فه‌یلى ئه‌را عیراق
ده‌وڵه‌تیگ له لایه‌ن ده‌زگاییه‌و كوت كوته‌وكریاس، كابرایگ كورد فه‌یلى ك چه‌پكیگ كاغه‌ز ڕه‌سمى و فایل وه‌ده‌سیه‌و بوى و تازه له‌ى كاروان هه‌زار فه‌رمانگه‌ى حكوومیه هاتویده‌و، ك هیمان هه‌نگام یه‌كم عومر له‌تى ته‌واو نه‌كردیه، به‌ڵكوو ڕه‌سیه‌سه سه‌ره‌تایه‌یلیگ ك كوتاییه‌یل عومر باوگ باپیره‌یله، ئه‌وه ئه‌رام ئاشكراكرد ك:"ئه‌را ئه‌وه‌گ بویده عیراقییگ بى غه‌ل و غه‌ش و پاك، ك پاشمه‌نى هویچ "دى ئین ئین" مه‌والیه‌یل تیكه‌ڵاى نه‌وى؛ تا گه‌ر بتویه‌نید (شه‌هاده)یگ گیر بارید، له‌و گومانه‌یله دویره‌و بخه‌ید ك فه‌رمانگه‌یل جنسیه بڕنه‌ى باڵاد". ئه‌و كابرا ك خه‌ریك بوى عه‌ره‌بانه‌ى ئازاره‌یلى ده‌ڵه‌ك دیاید، له‌ى نوو هاتیه‌سه‌و ئه‌را وه‌شوون كه‌فتن ئاسه‌وار ماڵیگ ك باوگ و باپیره‌یلى وه خاكیگ عیراقى دروسى كردوین ك تیكه‌ڵاى قه‌تره‌یل عه‌ره‌ق پاك ناوچه‌وه‌یلیگ ك له تیوڵ ڕه‌نجكیشان تكیه‌ید و ده‌سه‌یلیگ ك مژ كار شه‌ریفانه گردنه‌سه ده‌س، هاتیه‌سه‌و ئه‌را گوم بوین له‌ناو پیچ و په‌نایه‌یل تیه‌ریك ده‌سه‌ى ناكووكى ماڵ و موڵك (هیئه نزاعات الملكیه)و ئنجا بویه‌سه فایلیگ له‌هویره‌وبریاى ك خاك خوڵ قانوونه‌یلیگ له‌بانى گرده‌وبویه ك زوڵم و زوور چه‌سپاننه و ئیسه‌یش دوباره له جه‌ده‌لیه‌ت و كیشمه‌كیش "قوربانى و جه‌لاد" تین و گوڕ گردنه.
ئى پیاوه ك له مه‌نفا و ئاواره‌یى هاتیه‌سه‌و؛ شادى و خوه‌شحاڵى خوه‌ى وه‌ڕمیان ڕژیم وه‌رین نه‌شاردیه‌سه‌و ك وه شۆڤینیه‌ت ڕه‌گه‌زى ولویتبه‌رزى جیاوازى خسته ناوبه‌ین عیراقیه‌یل و كرده‌یانه دو به‌شه‌و (أ) و (ب)، وه‌لى زوى زوى ئه‌وه ئه‌راى ئاشكرابوى ك ژینگه‌یگ بیروكراتى پڕ له ڕه‌ته‌وكردن لایه‌ن وه‌رانوه‌ر ك ڕه‌سیده سڕینى ك هوشیارى له‌وه ده‌ید دیكتاتۆریگ نوو په‌یا بوود و خه‌و وخه‌یاڵ و پرۆژه‌یل دیمۆكراسى نه‌وڕه‌س له‌بار به‌ید.
ئه‌و پیاوه ك هاتیه‌سه‌و، وه زوور پایه‌یل خوه‌ى كردیاده كڕ و هس و شعووركردنى وه ڕه‌نجیان بارى قورستره‌و كردیه؛ له شوون هه‌ر وسیان و چه‌وه‌ڕیكردن دویر و دریژیگ له وه‌ر په‌نجه‌ره‌ى هه‌ر فه‌رمانگه‌یگ له فه‌رمانگه‌یل ده‌وڵه‌ت نوو وه‌تابلۆى ناو و دروشمه‌یلى، وه‌لى بڕیاره‌یل و قانوونه‌یل ڕژیم وه‌رین، ك وه‌ك خوه‌ى شیویاى بوین، ئى فه‌رمانگه‌یله له‌ناخه‌و خوڵمانیه‌سه‌و، ئه‌و بڕیاره‌یله ك سایه‌یل سیه‌ى باڵ كیشاسه بان گشت پیچ و په‌نایگ له‌ى وڵاته ك وه ده‌س مه‌ردمه‌گه‌یه‌و نه‌گبه‌تى تویشى هاتیه، بڕیاره‌یلیگ ك په‌رله‌مانیگ خه‌ریكه وه‌ل په‌روانه‌ى ئاسیاوه‌یله‌و شمشیرجه‌نگ كه‌ید، نه‌تویه‌نستیه هه‌وڵوه‌شنیده‌یانه‌و.
فه‌رمانبه‌ره‌یلیگ له پاشمه‌نیه‌یل چه‌رخ مه‌ملوكه‌یل(ممالیك)، تواناى ئه‌وه دیرن ك چاره‌نویس مه‌ردم له بان جبه‌خانه‌ى هه‌وه‌س و مه‌نفه‌عه‌ت خوه‌یان بكه‌نه داره‌و، و چوینكه یانه داروده‌سه‌ى میره‌یل تایفه‌یلن، كه‌س نیه‌وریى وه‌لیانا بویشى و له‌سزا دویرن، و سه‌رۆك حكوومه‌تیش جه‌خت كه‌ید له‌بان جیوه‌جیكردن دۆسیه‌یل كووچوه‌پیكریایه‌یل و كه‌س و كاره‌یل قوربانیه‌یل ڕژیم وه‌رین، وه‌لى ڕزه‌یل دریژ (مراجعه‌یل) له كورده‌یل فه‌یلى ك ئومید وه‌وه دیرن و چه‌وه‌ڕى ئه‌وه كه‌ن ك جه‌ناب خاوه‌ن شكۆ وپایه‌دار فه‌رمانبه‌ر لویتبه‌رز لایگ له‌لیانه‌و بكه‌ید،... تا یه‌كیگ له (مراجعه‌یل) یه‌كم گریه‌كووره‌ى (معامه‌له‌گه‌ى) وازكه‌ید وه بڕیگ پویل ك گیرفانیگ قویتیه‌وده‌ید كووم له ده‌سه‌ى ده‌سپاكى (نه‌زاهه) نیه‌كه‌ید، و ئنجا نووره‌ى گیرفانه‌یل نیشتمانییگتر تیه‌ید ك خاوه‌نه‌یلیان ئه‌را خزمه‌تكردن هاوڵاتیه‌یل شه‌وبیدارى كه‌ن تا ڕه‌سننه‌ى ڕاده‌ى زه‌لیلكردنیان و وشكه‌وكردن ڕه‌گه‌یلیان له دویاقه‌تره‌ى دووسداشتن عیراق.
هاوڵاتیه‌یلیگ بوخت ئه‌وه كریاسه پیانه‌و ك (ئنتما) نه‌یرن، و بایه‌ته ئه‌را یه‌كیگ له جیگره‌یل سه‌رۆك كۆمار ئه‌وه سابت بكه‌ن ك عیراقیین وه‌پێوه‌ر و وه‌گووره‌ى راسته (مسته‌ره)گه‌ى ئاغاى جیگر ك له دابونه‌ریته‌یل ساتع ئه‌لحوسه‌رى ئه‌راى مه‌نیه‌سه‌و ، ئه‌و دابونه‌ریته‌یله ك عه‌ره‌به‌یل له شانازى شاعر مه‌زنیان جه‌واهرى ناهمى كرد، چوینكه دابونه‌ریته‌یل عرووبى له‌لاى بڕیگ له سه‌ركرده‌یل دیموكرات تۆخ هیمان پاڵ نه‌یده هاوڵاتیه‌یل كورد فه‌یلى وه‌ره‌و دوڕیان وگیژاوه‌ى ته‌به‌عیه‌ت، ك عوسمانیه‌یل نه‌خشه‌ى كیشانه و خه‌یاتیى كردنه ، تاگه‌ر عیراقى ڕه‌سه‌ن ئه‌و كه‌سه بوود ك دویگر وتابع (ئال عوسمان) بوود، ك عیراق كردوینه مه‌نفایگ ئه‌را مه‌ملووكه‌یل بى ئه‌ده‌ب و تاقیگه‌یگ به‌شه‌رى ئه‌را ئه‌وه‌گ غوڵامه‌یل كووشك ئمپراتۆرى هووكاره‌ى سیاسه‌ت وحوكمرانى بكریه‌ن، ئه‌ویش وه له‌وه‌رداین عیراقیه‌یل (گرده‌وكریاى) وه‌ره‌و سه‌ردابه‌یل سه‌ریه‌یل ئنكشارى و مه‌یدانه‌یل كوشتن وه په‌تى.
ئى فه‌رمانبه‌ره‌یل یاخیه له ده‌وڵه‌ت نه‌وڕه‌س، قسوورى نیه‌كه‌ن له گووڕكه‌نین و وشكانن دۆسیه وفایله‌یل كۆنه ئه‌را مینه‌كردن بن وبنچینه‌ى ته‌به‌عیه‌ت ك ئایا عوسمانیه یا ئیرانى؟، هه‌رچه‌نى ك ده‌ستوور نوو عیراق گشت مه‌رده‌یل خودا وه عیراقى ده‌یده قه‌ڵه‌م هه‌رچه‌نى له داڵگیگ عیراقى و باوگیگ بیگانه‌یش بوون.
له بازى دانه‌ر و براوه، فراكسیۆنه‌یل سیاسى ڕه‌وابوین و مه‌شروعیه‌ت خوه‌یان له ده‌ستووریگ په‌یاكه‌ن ك ده‌سى نیه‌ڕه‌سیده ئه‌وكه‌سه‌یله ك له زانسته‌یل چه‌پاوكردن ده‌س باڵایگ دیرن، به‌ڵكوو ئى ده‌ستوورمانه بویه‌سه گورز داركارى كردن(ته‌ئدیب) ئه‌و كه‌سه‌یله له تاعه‌ت به‌شبه‌شه‌وكردن یا محاصصه ده‌رچن و ئه‌وانه‌گ له كۆمار (گرده‌وكریایه‌یل) یاخى بوون، له‌وه‌ر ئه‌و ئویشیم خوه‌ش وه‌حاڵدان ئه‌ى كورده‌یل فه‌یلى وه‌و ئازاره‌یل عشقدانه ئه‌را عیراق!.
كفاح هادى
