نه‌خوه‌شیه‌گه‌ى عراق بى ده‌رمانه‌

شفق نيوز

وه‌ كاملا ره‌سى و چه‌ن له‌ سه‌دى جیوه‌جى كریاگه‌و ئایا په‌یڕه‌و ئى سیستمه‌ كریه‌ید له‌عراق وه‌ناو دیمۆكراسى؟ دویاى ئه‌وه‌یش خوازیم بزانیم ئاقبه‌ت ئى وڵاته‌ ره‌سێده‌ چه‌؟

 

بیگومان گشتمان زانیم ك وڵاتیگ گه‌وراهیز جوور ئه‌مریكا هویچ كاریگ وه‌بى به‌رژه‌وه‌ندى خوه‌ى ئه‌نجام نایادو هێز خوه‌ى نیاریده‌ كار ئه‌را وه‌رگیریكردن له‌ هه‌ر رژیمیگ وه‌بى به‌رژه‌وه‌ندى، وه‌ل ئه‌وه‌یشا نه‌خشه‌ڕێ ناوچه‌ى خوه‌رهه‌ڵات ناوین وه‌رجه‌ ئه‌وه‌ك ده‌س وه‌پى بكریه‌ێد شایه‌ت وه‌ چه‌واشه‌وه‌ هساو ئه‌را ئاقبه‌تى كریاگه‌، ك جى داخه‌ تائیسه‌ نه‌ عراق و نه‌یش ده‌وڵه‌ته‌یل وه‌هار عه‌ره‌بى وه‌تایبه‌ت ئه‌و ده‌وڵه‌ته‌یله‌ ك ئاڵشتكارى له‌ حوكم و شوڕش مه‌ردمى له‌تیان به‌رپا كریا نه‌كه‌فتنه‌سه‌ بار سه‌قامگیرى و هیمان جه‌نگ و كوشتار له‌تیان وه‌رده‌وامه‌.

 

تویه‌نیم بویشیم نه‌خوه‌شیه‌ كوشنده‌گه‌ى عراق ها له‌وره‌، ك ئى وڵاته‌ كه‌فتگه‌سه‌ ناونى هه‌وڵ ده‌وڵه‌ته‌یل هه‌رێمى و هاوسا، وه‌تایبه‌ت هه‌وڵ بڕێگ له‌ وڵاته‌یل عه‌ره‌بى ئه‌را سه‌رخستن مه‌رام خوه‌یان و زاڵكردن هێز شه‌ڕ له‌بان هێز ئاشتى و به‌رقه‌راى، هه‌ر له‌وه‌ر ئه‌وه‌یش دوینیم هه‌ر له‌سه‌ره‌تاى ئازادكردن عراق له‌ نیسان 2003 تا رووژ ئمڕوو جه‌نگ تیرۆر و رویداین كاره‌سات و ته‌قینه‌وه‌و كیشمه‌كیش ناونى لایه‌نه‌یل سیاسى یه‌قه‌ى وه‌رنه‌یاگه‌و عراق پلكاننه‌سه‌ قه‌یرانه‌یل سه‌ختیگ و قورتاربوینى له‌ده‌س سیاسه‌ت دویاخستن و كاولكارى سته‌مه‌.

 

ئمڕوو له‌لایگه‌و له‌ى عراقه‌ حوكم ته‌كڕه‌وى و تونڕه‌وى كیشه‌ى ناوخوه‌یى دروس كردگه‌و بویه‌سه‌ بایس ناكووكى و جیاوازى ناونى پیكهاته‌یل سه‌ره‌كى و له‌لایگ تریشه‌و ده‌خاڵه‌ت و ده‌سوه‌رداین وڵاته‌یل هاوسا له‌ كاروبار عراق چینه‌یل كوومه‌ڵگا به‌شبه‌شه‌و كردگه‌و حزب ولایه‌نه‌یل بوینه‌سه‌ هووكار نه‌گونجیان و ژیان ئاشتیانه‌، وه‌ل ئه‌وه‌یشا مه‌سه‌له‌ى گه‌ناته‌كارى و ته‌رفتوینكردن دارایى ملله‌ت خه‌میگ تر مه‌ردم عراقه‌و بویه‌سه‌ په‌تاى بى چاره‌سه‌ر و گشت دام و ده‌زگایه‌یل ده‌وڵه‌ت گرته‌سه‌و.

 

مه‌سه‌له‌ى دیمۆكراسى له‌عراق ره‌سیه‌سه‌ بنه‌به‌س و ئیچنه‌ دیاره‌ هه‌واى دیمۆكراسى ژانژوو ره‌سنیده‌ سقان زوورم مه‌ردمه‌گه‌ى!! هه‌ر له‌وه‌ر ئه‌وه‌یش دوینیم 10 ساڵه‌ هویچ خاڵیگ له‌و دیمۆكراسیه‌ جیوه‌جى نه‌كریاگه‌و خوه‌ى له‌ هویرو ڕاى سیاسیه‌یل نه‌چه‌سپانگه‌و ته‌نیا دروشمیگه‌و هویچ تر.

 

ئاقبه‌ت ئى عراقه‌ له‌ساى ئى بار و كیشمه‌كیش و قه‌یرانه‌یل سه‌خته‌ زه‌حمه‌ته‌ سه‌قامگیر و دڵخوه‌شكه‌ر بوود، چوینكه‌ له‌ڕاسى عراق بویه‌سه‌ مه‌یدان جه‌نگ ومرافه‌ى ناونى وڵاته‌یل تر، بیجگه‌ ئه‌وه‌یش مه‌سه‌له‌ى تایفى و ره‌گه‌زى و نه‌ته‌وه‌یى خاڵیگ تر ركابه‌ریه‌ له‌ خستن و دژایه‌تیكردن یه‌كترى، كورد و عه‌ره‌ب سونى و عه‌ره‌ب شیعه‌ سێ پیكهاته‌ى سه‌ره‌كى و سێ فراكسیۆن گه‌وراى سیاسیین، وه‌لى هویچكامیان متمانه‌ وه‌ یه‌كترى نه‌یرن، وه‌لى خه‌ت كورد له‌ خه‌ت ئه‌وان جیاس، چوینكه‌ كورد نزیكه‌ له‌ دیموكراسى و ئه‌زموون خاسیگیش له‌ى باوه‌ته‌و دیریدو په‌سه‌ن فیدراڵیه‌ت كردگه‌، وه‌لى ئه‌وان له‌ڕوى جیوه‌جیكردنه‌و دوشمن دیموكراسى و فیدراڵیه‌تن، یه‌یش نه‌بایه‌د وه‌ رووژ و ساڵیگ بایده‌ دى، به‌ڵكوو وه‌خت فره‌یگ ئه‌خوازێ، ماناى ئه‌وه‌سه‌ لایه‌نه‌یل عراق له‌ خاڵه‌یل فره‌یگ  یه‌كه‌و ناگرن ك ئه‌وانه‌یش خاڵه‌یل سه‌ره‌كى و بنه‌ماى جیگیركردن ئارامى و ئاسایش و ئاسووده‌ییه‌.

 

ج. ا