دوشمنه‌یل فیدراڵى هووكار رشیان خوین عراقیه‌یلن

شفق نيوز

 

گشتمان ئاگاداریم له‌وه‌ك له‌سه‌ره‌تاى دامه‌زرانن حكوومه‌ت وه‌ختى و دویاخریش دامه‌زرانن یه‌كه‌مین حكوومه‌ت دیموكراسى له‌ عراق ئازاد، كه‌سه‌یلیگ سیاسى وه‌رده‌وام و هه‌میشه‌ دژ سستم فیدراڵیه‌ت وسیان و ئى چه‌مكه‌ وه‌گشت شیوازه‌یلى ره‌ته‌و كردیان و هویر له‌ ئاقبه‌ت و ده‌رده‌سه‌رى و ئاینده‌ى روڵه‌ى ئى وڵاته‌ نه‌كردیان، چوینكه‌ ئه‌وانه‌ پاشمه‌نده‌ى خراوه‌كار و لایه‌نگر چه‌وسیان بوینه‌ له‌ ژیان.

ئیمه‌ گشتمان زانیم سستم فیدراڵى ئه‌و سستمه‌سه‌ ك بیجگه‌ خه‌یر و به‌یر چشتیگ تر زه‌ره‌دمه‌ن له‌تى نیه‌ ئه‌را ژیان و گوزران ملله‌ت، وه‌لى ئایا دوشمنه‌یل فیدراڵى ك هووكار خوینڕشیان خوین عراقیه‌یلن له‌وه‌رچه‌ خوسه‌یان له‌ جیوه‌جیكردن فیدراڵیه‌ت تیه‌یدو هه‌میشه‌ وه‌چه‌و موڕه‌و ته‌ماشاى كه‌ن؟ بیگومان چه‌سپانن سستم هووزایه‌تى ئمڕوو له‌ عراق چه‌ك كاریگه‌ر نه‌یاره‌یل فیدراڵیه‌ته‌، وه‌لى جى داخه‌ تائیسه‌ حوكم ئه‌شایر له‌عراق وه‌تایبه‌ت دویاى رمیان بته‌گه‌ى به‌غدا نه‌تویه‌نستگه‌ بووده‌ زه‌مانه‌تیگ ئه‌را گله‌وداین گیان هاووڵاتیه‌یل له‌ مه‌ترسى و كوشتن و رواكانن و سه‌ربڕین و ته‌قینه‌وه‌و رویداگه‌یل جوراوجوور .

ئیسه‌یش دوشمنه‌یل فیدراڵى ك هه‌رچه‌نى خاس زاننیش چاره‌سه‌ر قه‌یرانه‌یل سه‌خت و سته‌مه‌، وه‌لى وه‌ل ئه‌وه‌یشا نیه‌خواز دگان وه‌و راسیه‌ بنه‌ن ك ته‌نیا رییگ ئه‌را قورتاربوین ئى وڵاته‌ له‌ده‌س مه‌رگ ته‌نیا فیدراڵى و دیموكراسى راسكانیه‌ نه‌ك دروشم بى بنه‌ما.

هه‌ر له‌وه‌ر ئه‌وه‌یش تویه‌نیم بویشیم هه‌وڵ و ته‌قلاى سیاسیه‌یل ئه‌را ده‌رچگن له‌ى قه‌یرانه‌یل یه‌ك له‌شوون عراق و ئى مه‌سه‌له‌ى تایفه‌گه‌رى و ره‌گه‌زیه‌ ك وه‌شیوه‌ى ئاشكرایگ په‌ل كوتاگه‌، هه‌وڵ خاسیگ نیه‌و دژایه‌تیكردن یه‌كتریه‌ له‌بان هساو ملله‌ت سته‌مدیده‌.

ئمڕوو له‌عراق نه‌ ئه‌وه‌سه‌ ده‌سڵات حكوومه‌ت بتویه‌نید وه‌ته‌واوى زاڵ بووده‌ بان كیشه‌و گرفته‌یل نه‌ حزب و لایه‌نه‌یل تویه‌نستنه‌ وه‌ ریككه‌فتن ناونى خوه‌یان ته‌كانیگ بیه‌نه‌ بنیات و خاسسازى و نه‌یش هه‌ردوگ پیكهاته‌ سه‌ره‌كیه‌گه‌ى عراق جوور سنى و شیعه‌ متمانه‌ وه‌ یه‌كترى دیرن ئه‌را كار و پرووسه‌ى هاوبه‌ش، چوینكه‌ له‌گشت لایگه‌و متمانه‌ له‌ده‌س دریاگه‌و ئیسه‌یش دویاى ئه‌و هه‌مگه‌ خوینڕشیان و كوشتاره‌ مه‌حاڵه‌ وه‌ دڵیگ پاك و بیگه‌رده‌و له‌بان خوان برایه‌تى دانیشن و جوور یه‌ك له‌ى خه‌یر و به‌یر عراقه‌ بخوه‌ن و گوزران وه‌پى بكه‌ن له‌ژیر په‌رچه‌م به‌خته‌وه‌رى و خوه‌شاڵى.

ئیمه‌ ئه‌گه‌ر ته‌ماشاى وڵاته‌یل فیدراڵى بكه‌یم و بنوڕیمنه‌ ژیان بڕیگ له‌ وڵاته‌یل جه‌هان، بیگومان نه‌بایه‌د دوشمنایه‌تى وه‌گه‌رد ئى سستمه‌ بكه‌یم ك ناوى نریاس فیدراڵى و شیوه‌یگه‌ له‌ شیوازه‌یل حوكم ك ده‌سڵاته‌یل له‌تى وه‌گووره‌ى ده‌ستوور دابه‌ش كریه‌ید له‌ناونى حكوومه‌ت ناوه‌ندى و هه‌رێمه‌یل، ك له‌یرایش هه‌ر هه‌رێمیگ بووده‌ خاوه‌ن سستم بنه‌ڕه‌تى خوه‌ى. وه‌لى بیگومان دوشمنه‌یل فیدراڵى تا دویا هه‌ناسه‌یش هه‌ر دژایه‌تى ئى مه‌سه‌له‌ كه‌ن و عراقیش هه‌ر بایه‌سه‌ بناڵنید.

جه‌ ماڵ ئه‌ركه‌وازى