وڵاته‌یل كه‌نداو چوین نوڕنه‌ هه‌رێم كوردستان؟

شفق نيوز

  تاریخ پڕ له‌ خه‌بات و سه‌روه‌رى بارزانى، وه‌ ئه‌وه‌ تاریف كریاگه‌ ك جه‌نگ كورد وه‌ل هویچ ملله‌ت و تایفه‌یگ نه‌ویه‌، ته‌نیا وه‌ل ئه‌و رژیمه‌یل یه‌ك له‌ شوون یه‌كه‌یل عراقه‌ بویه‌ ك هویچ وه‌ختیگ دگان وه‌ هه‌قه‌یل ره‌واى كورد نه‌نانه‌.

دوشمنه‌یل كورد هه‌میشه‌ له‌ هه‌وڵ داناین پلان بوینه‌ ئه‌را ئه‌وه‌ك كورد له‌بان نه‌خشه‌ نه‌یلن و جینۆسایدى كردنه‌، ئه‌را ئه‌و پلانیشه‌ ناوه‌یل جیاجیایگ وه‌رانوه‌ر كورد هاوردیانه‌ كار وه‌و خاتر ك كورد وه‌و ناوه‌یله‌ ئاشنا وه‌ نه‌ته‌وه‌یل تر بكه‌ن.

رژیمه‌یل یه‌ك له‌شوون عراق له‌یوا تاریف كورد كردیان ك هه‌میشه‌ حه‌زه‌و كوشتن و ئاژاوه‌چیه‌و هه‌ر له‌وه‌ر ئه‌وه‌یش وه‌خه‌ڵك باكوور عراق تاریفى كردنه‌! دى دگان وه‌ ئه‌وه‌ نه‌نانه‌ ك ملله‌تیگ ره‌سه‌ن و خاون تاریخ و كلتوور و خاك خوه‌یانن.

ئه‌و رژیمه‌یل عراقیه‌ هه‌ر وه‌و جووریشه‌ باس كورد ئه‌را زوورم وڵاته‌یل تر عه‌ره‌ب شۆفێنى كردوین له‌ڕى ره‌ساننه‌یل چه‌واشه‌كاریان، ته‌نیا بڕیگیان نه‌ود، وه‌لى له‌شوون راپه‌ڕینه‌ گه‌وراگه‌ى وه‌هار ساڵ 1991 دژ رژیم به‌عس، دى وازبوین عراق و ده‌ركه‌فتن راسیه‌یل ئه‌وه‌ بوى وڵاته‌یل عه‌ره‌بى كه‌م تا فره‌ ره‌سینه‌ ئه‌و باوه‌ڕه‌ ك رژیم دیكتاتۆر سه‌دام حسێن وشك و ته‌ڕ وه‌یه‌كه‌و سزنید، ك خوه‌یانیش وه‌چه‌و خوه‌یان داگیركردن كوه‌یت دینه‌چه‌و ك چوین وه‌ شاریگ عراقى هساوى كردو كوه‌یت كاول كرد، دى ئه‌گه‌ر هاوپه‌یمانه‌یل نه‌ویاتان و نه‌ڕه‌سیانه‌ دادى ئه‌وه‌ بیگومان له‌بان نه‌خشه‌یش كوشانیاده‌وه‌ى.

وه‌لى ئه‌وه‌ بوى تاریخ روى راسكانى ئه‌راى ده‌ركه‌فت، هه‌ر له‌وه‌ر ئه‌وه‌یش ئمڕوو وڵاته‌یل عه‌ره‌بى وه‌تایبه‌ت وڵاته‌یل كه‌نداو عه‌ره‌بى وه‌ چه‌ویگ پڕ گرینگیه‌و نوڕنه‌ هه‌رێم كوردستان له‌ڕوى پایه‌ى ئابوورى و ستراتیجیه‌و.

له‌ سه‌ردانه‌گه‌ى ئى دویاخر سه‌رۆك بارزانى ئه‌را كوه‌یت و ئیمارات عه‌ره‌بى چ پیشوازى گه‌رمیگ له‌لى كریا، ئه‌وه‌ بوى ره‌ساننه‌یل عه‌ره‌بى و ده‌وڵه‌ته‌یل تر وه‌ چه‌ویگ بڕ گرینگیه‌و مه‌زه‌نه‌ى ئه‌و سه‌ردانه‌ كردیان وه‌ ئه‌وه‌ك بارزانى سه‌رۆكیگ خاوه‌ن ئه‌زموونه‌و شوون ده‌سى له‌ هاوكیشه‌یل دیاره‌ ئه‌را چاره‌سه‌ركردن كیشه‌یل، ك له‌ عراق و ده‌وڵه‌ته‌یل ده‌وروه‌ریش وه‌ سه‌ركرده‌یگ ئاشتیخواز تاریفى كه‌ن.

ئنجا هه‌ر له‌وه‌ر ئه‌وه‌یش زوورم وڵاته‌یل كه‌نداو ئیسه‌ روى له‌ هه‌رێم كوردستان كه‌ن، ئه‌ویش وه‌ وازكردن باڵوێزخانه‌یلیان ئه‌را دروسكردن پیه‌ڵ متمانه‌و به‌شداریكردن له‌ ئاوه‌دانكردنه‌وه‌ى هه‌رێم كوردستان.

ئه‌وه‌ك مایه‌ى مه‌یلكیشانه‌، ئه‌وه‌سه‌ ك روخسار گه‌ش هه‌رێم كوردستانه‌ ك ئاشتى و سه‌قامگیرى باڵ كیشاسه‌ بانى و رووژ له‌دویاى رووژیش هه‌رێم كوردستان گام خاستر نه‌یدو فیشتر پیشكه‌فتن وه‌خوه‌یه‌و دوینید.

عه‌بدلخالق كه‌ریم وه‌رمزیار

ج . أ