كیشه‌ى كورده‌یل فه‌یلى هه‌ر له‌بنه‌ڕه‌ته‌و(جینۆساید)ه

شفق نيوز

كه‌مینه‌ یا چینیگ یا ملله‌تیگ. ئنجا جینۆ له‌لاتینى وه‌ ماناى جوور یا شیوه‌ تیه‌یگ و (ساید)یش وه‌ ماناى قڕانكردن تیه‌یگ.

كورد فه‌یلى یه‌كیگه‌ له‌و چینه‌یل كومه‌ڵگاى عراقیه‌، ك گه‌وراترین له‌ناوبردن وه‌جه‌م هاته‌ تویشیان وه‌گشت شیوازیگ نائنسانى و دویر له‌قانوون هه‌ق ئاده‌میزادو قانوونه‌یل ناوده‌وڵه‌تى. له‌ 8 / 12 / 2010 ئه‌نجوومه‌ن وه‌زیره‌یل له‌ دانیشتنیگ خوه‌شحاڵى خوه‌یان ده‌رخستن وه‌ بڕیار دادگاى باڵاى تاوانه‌یل عراقى ك له‌باوه‌ت كورده‌یل فه‌یلى ده‌ریكرد له‌ 29 / 11 / 2010، له‌و بڕیاره‌ دویاى چه‌وه‌ڕیكردن ساڵه‌یل فره‌یگ ئه‌وه‌ بوى كیشه‌ى كورده‌یل فه‌یلى وه‌(جینۆساید) دریا قه‌ڵه‌م. ئه‌نجوومه‌ن وه‌زیره‌یل په‌یمان ئه‌وه‌ دان وه‌گووره‌ى ئه‌و بڕیاره‌ هه‌رچى شوونه‌وار خراویگه‌ له‌بان ئى چینه‌ لاوریه‌یگ وه‌ك لاوردن بڕیار سه‌ندنه‌وه‌ى شوناسنامه‌و داگیركردن ماڵ و موڵك له‌لایه‌ن رژیم دكتاتۆر به‌عس و جویر هاووڵاتى عراقى و بى جیاوازیكردن مامڵه‌ وه‌ل روڵه‌یل فه‌یلیا بكریه‌ى. ئه‌وه‌ بوى چه‌ن ڕووژیگ گرنگى دریا مه‌سه‌له‌گه‌و دویاخر نویسینگه‌یگ تایبه‌ت له‌باوه‌ت كاروبار كورده‌یل فه‌یلى له‌سه‌رۆكایه‌تى كوومار وه‌ سه‌رپه‌رشى عادل موراد واز كریا ك هه‌رچه‌نى جموجویل خاسیگ له‌لى نه‌كه‌فته‌و، وه‌لى وه‌هه‌ر حاڵ ئه‌و كاره‌ ئه‌نجام دریاو مه‌سه‌له‌گه‌ دویاخر ره‌سیه‌ ژیرده‌س ئه‌نجوومه‌ن نوێنه‌ره‌یل(په‌رله‌مان)عراق. له‌وه‌را كیشه‌گه‌ كه‌فته‌ ناونى كه‌مته‌رخه‌مى و حاشاكردن، ئه‌وه‌ بوى بڕیگ له‌نوێنه‌ره‌یل ك خوه‌یان وه‌ پشتگیر زوڵملیكریاگ زانن له‌وه‌ختى دوسیه‌ یا مه‌له‌ف فه‌یلیه‌یل چیه‌ وه‌رده‌سیان وه‌بى ئه‌وه‌ك شه‌رم له‌خوه‌یانیش بكه‌ن هۆڵ یا قاعه‌ى په‌رله‌مان هیشتنه‌ جى و ده‌نگ له‌بان په‌سه‌نكردن بڕیار دادگاى باڵاى تاوانه‌یل نه‌یان و هه‌ڵویست ناشرین و قه‌یزیگ له‌تاریخ خوه‌یان توومار كردن. وه‌لى جویر ئه‌وه‌ك پیشینه‌یل ئویشن(شمشیر له‌ژیر هه‌ق شكیه‌یگ )ئه‌وه‌ بوى رووژ دوشه‌ممه‌ى یه‌ك مانگ ئاب 2011 هه‌مان ئه‌نجوومه‌ن نوێنه‌ره‌یل ده‌نگ له‌بان وه‌جینۆساید ناسین كیشه‌ى كورده‌یل فه‌یلى دان. ئه‌ڵاجه‌وى ها له‌ورا شایه‌ت كه‌سه‌یلیگ له‌ په‌رله‌مان یا حكوومه‌ت عراق منه‌ت بنه‌نه‌ بان روڵه‌یل كورد فه‌یلى و جویر سێقه‌ى سه‌ر بیه‌نه‌ى قه‌ڵه‌م دویاى ئى هه‌مگه‌ چه‌وڕیكردن دویر و دریژه‌!!. نه‌خه‌یر ئه‌وه‌ك لاى به‌نه‌ خه‌یاڵه‌ لاى خودا به‌تاڵه‌. كورده‌یل فه‌یلى وه‌رجه‌ گشت مه‌ردمانیگ له‌ى عراقه‌ جینۆساید كریان و كه‌فتنه‌ وه‌ر سته‌مكارى له‌ خودانه‌ترسه‌یل و هه‌زاران خیزانیان ده‌روه‌ده‌ر و ئاواره‌ كریا له‌شوون ئه‌وه‌ك ماڵ و موڵكه‌یلیان وه‌جاریگ زه‌فت كریاو جایه‌ڵ جوانه‌یلیانیش وه‌پیسترین و دڕه‌نده‌ترین شیواز له‌ناوبردن فه‌وتیان و بى سه‌روشوون كریان. ئنجا ئیسه‌یش دویاى ئه‌و هه‌مگه‌ به‌دبه‌ختى و ماڵویرانیه‌ چشت فره‌یگ نه‌كریاگه‌ ئه‌را كورده‌یل فه‌یلى و زه‌خمه‌یلیان هیمان ساڕیژ نه‌ویه‌، چوینكه‌ ئه‌وان هه‌ر له‌بنه‌ڕه‌ته‌و جینۆساید كریان و هه‌ر بایه‌سه‌ كیشه‌گه‌یان وه‌ جینۆساید بناسریه‌یگ . ئه‌گه‌ر حكوومه‌ت عراق راس ئویشیگ بیلا گرفته‌یلیان كه‌مه‌و بكاو ماڵ و موڵكه‌یلیان باریگه‌وه‌و ئاسانكارى بكا ئه‌را ئه‌وانه‌ك له‌بان مه‌سه‌له‌ى سیاسى له‌ كاره‌یلیان ده‌ركریان و ده‌سمیه‌ت ئاواره‌یلیان بیه‌ن و شوون ئه‌را گله‌وخواردنیان دابین بكه‌ن و بگه‌ردنه‌ شوون چاره‌نویس هه‌زاران ڕوڵه‌یل بى سه‌روشوونیان...هتد. چوینكه‌ كورده‌یل فه‌یلى ئه‌و مه‌ردمانه‌ بوین تا دویه‌كه‌ پشت وه‌پیان به‌سریاو خه‌و و ئاره‌زووه‌یلیگ له‌سایان هاوریا دى و به‌شدار پرووسه‌ى سیاسى بوین له‌وه‌ر خاتر رمانن رژیمیگ ك وه‌ئاگر و ئاسن مامڵه‌ وه‌ل ئنسانیه‌تا كردیاد.

ئه‌گه‌ر ئه‌و كاره‌سات و به‌دبه‌ختیه‌ ك هاته‌ بان كورده‌یل فه‌یلى له‌یه‌كه‌و به‌یم و ته‌ماشاى ده‌رئه‌نجام شوونه‌وارى بكه‌یم، مه‌حاڵه‌ وه‌ جینۆسادیش زه‌خمیان خوه‌شه‌و بوود، چوینكه‌ ئه‌وه‌ك هاته‌ تویش ئى چین ره‌سه‌ن و كه‌رامه‌تداره‌ فره‌ له‌ جینۆساید گه‌وراتره‌و قویلتره‌.

 

حسێن برابویچگ