جه‌نگ ره‌وا له‌ دونیایگ ناڕه‌وا

شفق نيوز

نه‌ك هه‌ر باوه‌ڕ به‌شیگ له‌ جاده‌، به‌ڵكوو قسه‌ى كوردیش له‌ باوه‌ت عراقه‌و له‌بان ئه‌و ئه‌گه‌ره‌ بنیات نریاگه‌ ك شكه‌ست مه‌سه‌له‌ى سیاسى و ئاسایش و خزمه‌تگوزارى عراقیش وه‌ جووریگ له‌ جووره‌یل یه‌كسانه‌ وه‌ هه‌ل و مه‌رج سیاسى گونجیاگ ئه‌را كوردستان، چوینكه‌ له‌ بنه‌ڕه‌ته‌و عراق جوور ده‌وڵه‌ت له‌بان په‌یوه‌ندییگ چه‌واشه‌ دامه‌زریاگه‌ وه‌ به‌رژه‌وه‌ندى كورده‌و، وه‌لى وه‌گووره‌ى ئه‌زموون 10 ساڵ گوزه‌یشت چشته‌یل تر ئسپات ئه‌كا، وه‌ تایبه‌ت له‌ى ماوه‌ ك كیشه‌یل ناونى به‌غداو هه‌رێم سه‌ختره‌و بوون و له‌هه‌مان وه‌خت كوردستانیش چیه‌سه‌ ناو قه‌یران تازه‌. ماناى ئه‌وه‌سه‌ له‌ى وه‌خته‌یله‌ كوردستان نه‌ویه‌سه‌ ئه‌و دویرگه‌ ك گه‌رده‌لویلان عراق نه‌گریده‌وه‌ى.

 

 

بیگومان دروسكردن ده‌وڵه‌تیگ مه‌ركه‌زى و گرده‌وكردن ده‌سڵاته‌یل له‌یه‌ك شوون و هیز و ره‌نگ سیاسى نه‌ك هه‌ر مه‌ترسییگ جددیه‌ ئه‌را بان كوردو ده‌سكه‌فته‌یلى، به‌ڵكوو هیز گه‌ورایگیشه‌ ئه‌را زینگه‌وكردن ئه‌و دیكتاتۆریه‌ت و مه‌یل خوینڕشاننه‌ ك ده‌وڵه‌ت عراق له‌ دڵ خوه‌ى شارده‌سه‌وه‌ى، وه‌لى ده‌س شلكردن ئه‌ڕا ئه‌و باوه‌ڕ سیاسیه‌ ك له‌یوا هویره‌و ئه‌كا جیهیشتن به‌غدا له‌ناو قه‌یرانه‌یلى ره‌سیده‌ كووتاییگ دڵخوه‌شكه‌ر ئه‌را كورد، ئه‌وه‌ بیگومان په‌ل ئه‌را كیشه‌یگ تر پڕ مه‌ترسیدار كوتید له‌ى كیشه‌ى ئیسه‌ زیاتر، چوینكه‌ بیجگه‌ له‌و قویلایى هه‌رێمى و ناوچه‌ییه‌ ك عه‌ره‌ب وه‌ شیعه‌و سونیه‌و دیریده‌ى هیمان وه‌ل ئه‌وه‌یشا لایه‌نه‌یل سیاسى عه‌ره‌ب له‌ى عراقه‌ ماوه‌ى فره‌یگ ها وه‌رده‌میان ئه‌را فراوانكردن وازى سیاسى و سه‌خته‌وكردن كیشه‌یل. وه‌ل ئه‌وه‌یشا تا تیه‌ید عراق بووده‌ ئه‌و مه‌یدان لایه‌نه‌یل هه‌رێمیه‌ ك جارجاریگ راسه‌وخۆ و جارجاریگیش ژیر وه‌ژیر خوه‌یان له‌تى تاقیه‌و كه‌ن.

 

ئیسه‌ كورد ها وه‌رده‌م قه‌یرانیگ سه‌خت و دویر له‌ چاره‌سه‌ر وه‌ل به‌غدا، شایه‌ت به‌شیگ له‌ى قه‌یرانه‌ له‌ فۆرم كیشه‌ى نه‌فت و غاز و بودجه‌و مادده‌ى 140 ده‌ربكه‌فید، یا له‌ دامه‌زرانن فه‌رمانده‌یى ئۆپه‌راسیۆن دجله‌ گوزارش له‌ خوه‌ى بكا، وه‌لى له‌ بنه‌ڕه‌ته‌و گرفته‌گه‌ گرفت وه‌یه‌كه‌وه‌ ژیانه‌و گرفت نه‌وین دیموكراسى و مه‌سه‌له‌ى نه‌گونجیان و جیاوازیه‌یله‌، دى وه‌ى جووره‌ تویه‌نیم بویشیم نه‌ كورد له‌ى وه‌خته‌یله‌ تیكه‌ى فره‌ ئاسانیگه‌ قویته‌و بدریه‌ید، نه‌ تائیسه‌یش ریككه‌فتنیگ خاس ئه‌را ده‌سه‌وه‌ركردن به‌شدارى لایه‌نه‌یل عه‌ره‌ب ها له‌ وجوود له‌ پرووسه‌ى حوكمڕانى، هه‌ر له‌وه‌ر ئه‌وه‌یش نوڕید له‌ى قه‌یرانه‌ عه‌ره‌ب گیر خواردگه‌و دونیا له‌وه‌رده‌میان تیه‌ریكه‌.

 

ئمجا پرسیار له‌یره‌ ئه‌وه‌سه‌ له‌ى وه‌خته‌یله‌ سیاسه‌ت كوردستانى له‌بان چ ئه‌گه‌ریگه‌؟ چوین ره‌فتار وه‌ل كیشه‌یلا ئه‌كاو ئایا كورد تویه‌نید بیلایه‌ن بوود و هه‌ ر وه‌گووره‌ى به‌رژه‌وه‌ندیه‌یل خوه‌ى هه‌ڵسووكه‌فت بكا وه‌ تایبه‌ت له‌ دونیایگ ناڕه‌وا ك وه‌ته‌نیا جه‌نگ ره‌وا په‌زنیده‌ى؟

 

توانا ئه‌حمه‌د

ج. ا