چگن پێشمه‌رگه‌ ئه‌را كۆبانی چه‌ ره‌سنيد؟

شفق نيوز

وه‌لی ئيسه‌ قوناغه‌گه‌ شيوازيگ تر وه‌رگرتگه‌، گشت دونيا باس له‌وه‌ ئه‌كه‌ن ك داعش ئه‌و گرووپ تونڕه‌وه‌ وه‌ئاشكرا هه‌رچی توانای سه‌ربازی و ئنسانی ديريد هاورده‌سه‌ی كار ئه‌را جه‌نگكردن دژ كورد، يه‌يش ئاگادار جه‌هان كرد ك مه‌راميگ ها له‌ وجوود و خوازياره‌ له‌ ڕی داعشه‌و ده‌س تر له‌ كورد بووه‌شنن، چوينكه‌ ئاشكراس ك كورد له‌ باشوور تويه‌نستگه‌ بدێده‌ ئه‌و به‌ش جه‌هانه‌ ك خاوه‌ن ئارامی و ژيان هاوبه‌شه‌ جيا له‌ ده‌وڵه‌ته‌يل عه‌ره‌بی ناوچه‌گه‌ ك وه‌رده‌وام خه‌ريك جه‌نگ مه‌زه‌وی و هوير تونڕه‌وی ئايينه‌ ئه‌را ساقه‌وكردن باڵانس سياسی حزب و سه‌رۆك ده‌وڵه‌ته‌يل.

ئی نموونه‌ی ديموكراسی و ژيان ئارام و هاوبه‌ش هه‌رێمه‌ له‌يوا كرد نه‌ياره‌يل كورد نگه‌ران بوون له‌وه‌ك دی كورد ئه‌دێده‌ خاوه‌ن قه‌واره‌يگ پيشكه‌فتگ له‌ ناوچه‌گه‌و يه‌يش جوور شكه‌ست ئه‌را خوه‌يان زانن ك چه‌نه‌ها سه‌ده‌س زوڵم له‌ كورد ئه‌كه‌ن له‌بان خاك خوه‌ی، ك هه‌رچه‌نی كورد ده‌س ئه‌را خاك كه‌س دريژ نه‌كردگه‌، به‌ڵكوو ته‌نيا خوازياره‌ له‌بان خاك خوه‌ی مه‌شق ژيان خوه‌ی بكا، وه‌لی دوينيد وه‌ربه‌س ئه‌را ئه‌و مافه‌يل ره‌وا دروس ئه‌كريه‌يد.

چگن پێشمه‌رگه‌ ئه‌را كۆبانی، نيشانه‌ی گه‌ورايگه‌ له‌وه‌ك مه‌سه‌له‌ی كورد وه‌ چه‌ن قوناغيگه‌و پيشكه‌فتن وه‌خوه‌يه‌و ديه‌، يه‌يش هاووه‌خته‌ وه‌ل ئه‌وه‌ك خود پێشمه‌رگه‌ خوه‌ی له‌ به‌ره‌ی گه‌ورايگ وه‌ل داعش كه‌فته‌سه‌ جه‌نگ ك سوپای عراق وه‌ل وجوود ئه‌و هه‌مگه‌ پويل فريه‌ ك له‌وه‌رده‌سی بوی و خاوه‌ن چه‌ك يه‌كجار فريه‌ی پيشكه‌فتگ بوی، وه‌لی رووژ له‌دويا رووژ وه‌ بوونه‌ی شكه‌ست ئه‌و سوپا داعش ئه‌دێده‌ خاوه‌ن شوون فيشتر و چه‌ك و سه‌ياره‌ خاستر په‌يا ئه‌كا ك دوياخر ئه‌و چه‌ك و هه‌وه‌جه‌له‌ له‌ جه‌نگ كوردستان وه‌كار ئه‌يه‌ريد، وه‌لی هيكان له‌ وه‌رانوه‌ر زوور پێشمه‌رگه‌ شكه‌ست خواردنه‌، چوينكه‌ پێشمه‌رگه‌ ته‌نيا ناويگ نيه‌، به‌ڵكوو ئيراده‌ی ملله‌تيگ ها وه‌ليا.

هه‌ڵبه‌ت ئه‌گه‌ر مه‌سه‌له‌ی كورد وه‌ جووريگ تر نه‌وياتاد، ئه‌وه‌ بيگومان ڕی نه‌دريا پێشمه‌رگه‌ بچيده‌ كۆبانی، ك له‌ڕوی ياساييه‌و وه‌ناو خاك وڵاتيگ تر ئه‌چێد ئه‌را كۆبانی، وه‌لی ده‌ركه‌فت ك كورد ته‌نيا ملله‌تيگه‌ وه‌ پله‌ی يه‌كه‌م له‌ ناوچه‌گه‌ ك دژ هوير تونڕه‌وی و ترۆره‌.

ئه‌وه‌سه‌ ئاشكراس ك ته‌نيا كورد سه‌رقاڵ كرياگه‌ وه‌ جه‌نگ ترۆر، مانای ئه‌وه‌سه‌ ئه‌را كورد گرينگه‌ نه‌ف له‌و ده‌رفه‌ وه‌ربگريد و خوه‌ی له‌يوا نيشان بيه‌يد ك وه‌نوێنه‌رايه‌تی جه‌هان له‌ڕوی وشكانيه‌و سه‌نگه‌ر له‌ داعش گرتگه‌و له‌ هه‌مان وه‌خت جه‌هانيش له‌و راسيه‌ ره‌سيه‌سه‌و.

دی بايه‌س له‌يه‌و دويا ته‌ماشايگ مه‌سه‌له‌ی كورد بكريه‌يد له‌ڕوی دروسكردن قه‌واره‌يگ سه‌روه‌خوه‌يی كوردی، چوينگه‌ دی سه‌رده‌م دويره‌وخستن كورد ته‌مام بوی و گشت رويداگه‌يل وه‌تايبه‌ت هاوكاری وڵاته‌يل هاوپه‌يمان له‌ مقه‌يه‌تيكردن خاك كوردستان به‌ڵگه‌ی گه‌ورايگن ئه‌را ئه‌وه‌ك دی كوردستانيش چيه‌سه‌ ناو نه‌خشه‌ی سياسی و جوگرافی جه‌هان و خه‌ريكه‌ وه‌ره‌و ئاينده‌يگ گه‌شتر گام ئه‌نه‌يد.

شاخه‌وان برايم عه‌بدوڵڵا

ج . أ