رژیمه‌یل یه‌ك له‌شوون یه‌ك عراق و هه‌ڵویستیان له‌ وه‌رانوه‌ر كورد

شفق نيوز

ك گوایا عراقیگ فیدراڵى و دیموكراسیه‌ وه‌تایبه‌ت نورى مالكى سه‌رۆك وه‌زیره‌گه‌ى وه‌گشتیانه‌و وه‌بى جیاوازى هه‌وڵ ئه‌وه‌ دانه‌ ملله‌ت كورد وه‌ دڕنده‌ترین شیوه‌ بچه‌وسننه‌وه‌و مه‌ردم كورد وه‌ هاووڵاتى پله‌ دو له‌ قه‌ڵه‌م بیه‌ن و هویچ هه‌قیگ نه‌یاشتوود و له‌ هه‌مان وه‌خت بیبه‌شیش بوود له‌ گشت ده‌سڵاتیگ!

 

داواكاریه‌یل كورد له‌ سه‌رده‌م پاشایه‌تى ك(عوسبه‌ت ئه‌لئومه‌م)له‌ساڵ 1925 هه‌قه‌یل سیاسى و رووشنهویرى و ئدارى كرد له‌چوارچیوه‌ى كاره‌یل ناوده‌وڵه‌تى ئه‌را لكانن ولایه‌ت موسڵ عوسمانى وه‌ عراقه‌و ك وڵات توركیا داواى كردیاد و له‌ یه‌كه‌م كومار عراق داواكاریه‌یل كورد له‌ ده‌ستوور له‌ساڵ 1958 ك ئویشید كورد هاوبه‌شن وه‌ل عه‌رب له‌ عراق، دى له‌وساوه‌ حكوومه‌ت عراقى هیز سه‌ربازى دژ كورد تیه‌ریده‌ كار ك له‌ساڵ 1961 ته‌نیا داواكارى كورد خودموختارى بوى له‌ ژیر چه‌ودیرى ناوده‌وڵه‌تى.

 

ئه‌وه‌ بوى دویاجار حكوومه‌ته‌یل عه‌بدولسه‌لام عارف و عه‌بدولڕه‌حمان عارف و به‌عسیه‌یلیش ئه‌را جه‌نگ پێشمه‌رگه‌ هه‌رچى وه‌پیان كریا له‌ كوشتن و كاولكردن و ماڵویرانى و زیندان...هتد دریغى نه‌كردنه‌و له‌ هه‌مان وه‌خت شكه‌ست هاوردنه‌، تا ئه‌وه‌ بوى دویاجار ئه‌حمه‌د حه‌سه‌ن به‌كر و سه‌دام حسێن له‌ ساڵ 1970 دگان وه‌ خودموختارى ئه‌را كوردستان نان و ریككه‌فتننامه‌ى ئازار ئمزا كرد و دویاخریش په‌شیمانه‌و بوین و ده‌سكردنه‌ گرده‌وكردن هیز و سه‌ندن تازه‌ترین چه‌ك ئه‌و سه‌رده‌مه‌و ریككه‌فتنیگ وه‌ل شاى ئیران ئه‌نجام دان ئه‌را شكه‌ست هاوردن وه‌ هیز پێشمه‌رگه‌ى كوردستان له‌ شووڕش گه‌وراى ئه‌یلوول وه‌مه‌رج داین نیمه‌ى شه‌تولعه‌ره‌ب وه‌ ئیران و ئمزاكردن ریككه‌فتن جه‌زایر 1975.

 

دویاى ریككه‌فتننامه‌گه‌ ئه‌وه‌نه‌ وه‌پى نه‌چى رژیم سه‌دام په‌شیمانه‌و بوى له‌وه‌ختیگ ك زانست شاى ئیران رمیا له‌ساڵ 1979، دى ئه‌و ریككه‌فتننامه‌ له‌لایه‌ن خوه‌یه‌و لاورد و بویه‌ مایه‌ى ده‌سوه‌پیكردن جه‌نگ عراق – ئیران ئه‌را ماوه‌ى هه‌یشت ساڵ له‌شوون ئه‌وه‌یش جه‌نگ وه‌ كوه‌یت فرووشت.

 

گشت ئه‌و جه‌نگه‌یله‌ له‌وه‌ر ئه‌وه‌ بوى ك جه‌نگ وه‌ خه‌ڵك كوردستان و سه‌ركردایه‌تیه‌گه‌ى فرووشتیان و هه‌ر وه‌و بوونه‌یشه‌و هه‌زاران كه‌س بوینه‌ قوربانى كوشتن و بى سه‌روشوونكردن و زیندانى و ماڵویرانى و كاولكارى و بیجگه‌ وه‌تاڵانداین ملیاره‌ها دۆلار له‌ جه‌نگه‌یل ناوخوه‌یى و ده‌ره‌كى.

 

له‌وه‌ر ئه‌و فكره‌یل بى مانا ك وه‌رانوه‌ر كورد په‌یڕه‌وى كردیان، ئیسه‌یش وه‌هه‌مان شیوه‌ ده‌سڵات عراق و نورى مالكى سه‌رۆك وه‌زیره‌یلى هه‌ر هه‌مان هویر وئه‌ڕاى چوین ره‌گه‌زپه‌رسیانه‌ دیرید وه‌رانوه‌ر كوردو هویچى له‌وانه‌ كه‌متر نیه‌.

 

هه‌رچه‌نى كوردستان له‌و جه‌نگه‌یل گوزه‌یشته‌ زه‌ردمه‌ن بویه‌، وه‌هه‌مان شیوه‌ عه‌ره‌ب و توركمان و كلدو ئاشووریش بیبه‌ش نه‌وینه‌ له‌ كوشتن و بڕین و ماڵویرانى، ئنجا له‌ كووتایى ئویشیم ئاشتى و ریككه‌فتن له‌بان مه‌سه‌له‌یل سیاسى ته‌نیا چاره‌سه‌رى ئه‌وه‌سه‌ جه‌نگ نه‌چه‌سپه‌ید، چوینكه‌ جه‌نگ په‌شیمانیه‌و هویچ قانجازیگ نه‌یرید، چوینكه‌ كووتایى رژیمه‌یل وه‌رین نموونه‌ى ئاشكرایگه‌ ئه‌را ده‌سڵاتداره‌یل ئیسه‌و ئاینده‌ى عراق ك بیجگه‌ فه‌وتیان و ئاوڕوى چگن خوه‌یان و رژیمه‌یلیان هویچ تر نه‌وى!

یوسف هه‌ورامى

ج. ا