خودا ڕسواى ئه‌وه‌ بكا عراق ڕسوا كرد

شفق نيوز

 

رژیم به‌عس له‌ سه‌ره‌تاى ساڵه‌یل شه‌س سه‌ده‌ى وه‌رین ك له‌ كوده‌تایگ سه‌ربازى جڵه‌و ده‌سڵات گرته‌ ده‌س دیاره‌ له‌بان بنه‌ماى زوڵم و سته‌م دام و ده‌زگایه‌یلى دامه‌زران و هه‌ر له‌وه‌خت سه‌رۆكایه‌تى ئه‌حمه‌د حه‌سه‌ن به‌كر  عراق وه‌رگ نائومیدى پووشا تا ڕه‌سیه‌ ساڵ 1979، ك له‌ى ساڵه‌ سه‌دام حسێن جیگر ته‌خت ده‌سڵات گرته‌ده‌س ك وه‌ زوور حوكمه‌گه‌ له‌ده‌س به‌كر ده‌ركرد و  تاوانه‌یل بیشماریگ ده‌رهه‌ق ملله‌ت عراق ئه‌نجامدا جوور كوشتن وه‌جه‌م و زیندانیكردن و بى سه‌روشوونكردن روڵه‌یل عراق، ئه‌وه‌ بوى رووژگار هات و چى، مه‌رگ سته‌مكار نزیكه‌و بوى، دویاهه‌ناسه‌ى سه‌دام سته‌مكار  تا سه‌ره‌تاى ده‌مه‌و سوو عه‌ید قوربان 30/ 12/ 2006 بوى و له‌ى تاریخه‌ دریا له‌لایه‌ن حكوومه‌ت تازه‌ى عراقه‌و له‌بان بڕیار دادگا دریا له‌ سێداره‌.

 

مه‌ردم عراق له‌یوا هویره‌و كردن دى ته‌پڵ شادى و ئازادى وه‌رده‌وامه‌ له‌ عراق! هویر له‌وه‌ نه‌كردن جینشینى سه‌دام هه‌ر وه‌رده‌وامه‌ له‌ى عراقه‌، وه‌لى وه‌ جنگ دیموكراسیه‌و!!

مه‌رگه‌سات له‌ناكاو، ته‌قینه‌وه‌ى رووژانه‌، گه‌ناته‌كارى، كیشمه‌كیش سیاسى و ته‌نانه‌ت مه‌سه‌له‌ى تایفه‌گه‌رییش هاته‌ وجوودو كار ره‌سیه‌ ئه‌وه‌ك ئه‌ندامه‌یل په‌رله‌مانیش له‌ناو هۆڵ ئه‌نجوومه‌ن نوێنه‌ره‌یل ده‌س له‌ یه‌كترى به‌رزه‌و بكه‌ن و بكه‌نه‌ى جه‌نگ و مرافه‌و خراوداین و سووكایه‌تیكردن وه‌ یه‌كترى! ئنجا ئایا ئه‌گه‌ر ئه‌یه‌ كرده‌وه‌ى په‌رله‌منتاره‌یل عراقى بوود له‌ژیر قوبه‌ى په‌رله‌مان ئه‌ى چوین زه‌نگ عراق نه‌زڕیه‌ید له‌وه‌رچه‌و مه‌ردم وڵاته‌یل خوه‌رئاواو ده‌وڵه‌ته‌یل پیشكه‌فتگ و چوین وه‌پیمان نه‌خه‌نن؟ عراقیگ ئه‌گه‌ر دز و جه‌رده‌و تایفه‌گه‌ره‌یلیگ سه‌ركردایه‌تى وه‌ڕیه‌وبردنى بكه‌ن و حاشا له‌ به‌رژه‌وه‌ندى ملله‌ته‌گه‌ى بكه‌ن و سیاسیه‌یلى گشت رووژیگ هه‌ر خه‌ریك خراوداین و جه‌نگ و مرافه‌ بوون و له‌ دارایى ئى ملله‌ت سته‌مدیده‌ بدزن و خوزه‌شگوزرانى وه‌پى بكه‌ن، چوین بڕه‌سیده‌ كنار ئارامى و ئایایش و سه‌نگ خوه‌ى قورسه‌و بكا له‌ وه‌رچه‌و مه‌ردم بیگانه‌؟

 

وه‌ل ئه‌وه‌یشا فره‌جار وه‌بى شه‌رمانه‌ له‌ده‌م سیاسیه‌یل ئى وڵاته‌ ژنه‌فیم ك وه‌ناو ملله‌ته‌و قسه‌ كه‌ن جوور ئه‌وه‌ك بویشید خه‌م ملله‌ت خوه‌ن، وه‌لى له‌ڕاسى ئه‌یانه‌ په‌ن ده‌نه‌ عراق و ملله‌ته‌ به‌دبه‌خته‌گه‌ى و له‌وه‌رانوه‌ر خواسته‌یل مه‌ردم بى وژدان ده‌رچین و له‌ شیواز ئنسانیه‌ت ده‌رچینه‌و ڕى رسوایى گرتنه‌سه‌ وه‌ر، ئنجا خوداى رسواى ئه‌وه‌ بكا ئى عراقه‌ رسوا كرد و هیشت ك عراق له‌لاى گشت ده‌وڵه‌ته‌یل دونیا ناوى بزڕیه‌ید و له‌یوا وه‌پى كردنه‌ بووده‌ خراوترین شوون له‌ جه‌هان ئه‌را ژیان.

 

جه‌ماڵ ئه‌ركه‌وازى