شار عه‌زیزیه‌

شفق نيوز

دویرى (88)كم له‌كنار ئاو دجله‌و كه‌فیگه‌ بان ڕیگه‌ى سه‌ره‌كى به‌غداو شاره‌یل تر باشوور عراق. شار عه‌زیزیه‌ى تاریخى، شار دامه‌زریاگ كویه‌نیگه‌و ئاوایه‌یل فره‌یگ گریگه‌ خوه‌ى، وه‌ل ئه‌وه‌یشا زه‌ویه‌یل نه‌ختیگ دیریگ ئه‌را كشتوكاڵ و سه‌رچه‌وه‌ى ئاوى فره‌یگیش دیریگ.

ئى شاره‌ له‌وه‌ر پایه‌و هه‌ڵگه‌فتنى له‌بان ئاو دجله‌ گرنگى یا ئه‌همیه‌ت فره‌یگ دیریگ هه‌ر له‌زه‌مانه‌ى زویه‌وه‌ له‌وه‌ختى ك مه‌ردم وه‌ به‌له‌م له‌ڕیگه‌ى ئاوه‌وه‌ كاڵا جیواز كردیان، له‌شوون ئه‌وه‌یش تا كووتایى ساڵه‌یل شه‌س سه‌ده‌ى گوزه‌یشت هه‌ر له‌ڕیگه‌ى ئاو دجله‌وه‌ وه‌سه‌ڵامه‌تى كاڵاى خوه‌یان ره‌سانیانه‌ جى.

شوونه‌واره‌یل كویه‌ن و فره‌یگ له‌ ده‌وره‌وه‌ر شاره‌گه‌ وجوود دیریگ، له‌وانه‌یش: شوونه‌واریگ له‌ باشوور شاره‌گه‌ وه‌ناو( ته‌په‌ى پیشه‌سازى) ك پاشمه‌نده‌ى شوونه‌وار و ته‌په‌ى گه‌ورایگ بویه‌ وه‌ناو(ئیشان)ك كه‌فیگه‌ هه‌ردوگ دیم جاده‌ى گشتى ده‌وڵه‌تى.

له‌ بیاوان نزیك شاره‌گه‌یش له‌ڕووژهه‌ڵاته‌وه‌ شوونه‌وار وه‌ربه‌س نه‌هره‌ین دیاره‌، ك ئه‌ویش پاشمه‌نده‌ى شوونه‌وار ده‌وڵه‌ت عه‌باسیه‌ ك هه‌رچه‌نى ئیسه‌ پشتگووش خریاگه‌و ده‌س تازه‌كردن وه‌پى نه‌ڕه‌سیه‌.

له‌ نزیك شاره‌گه‌ مه‌زارگه‌ى یه‌كیگ له‌ پیاوخاسه‌یل خوداناس وه‌ناو( سه‌ید تاجه‌دین) كریه‌یگه‌ دى، ك مه‌ردم ناوچه‌گه‌ وه‌(تاج) ناوى به‌ن و بنه‌چه‌كى چووگه‌وه‌ ئه‌را ئیمام عه‌لى كوڕ ئه‌بو تالب(سڵام خودا له‌لى)، ك كه‌فیگه‌ باشوور ناحیه‌ى حه‌فریه‌ له‌پشت بوسان ده‌فته‌رى و مه‌ردمان فره‌یگ له‌ناوچه‌گه‌و شوونه‌یل تره‌وه‌ سه‌ردانى كه‌ن له‌ڕووژه‌یل عه‌ید و بوونه‌یل دینى. له‌ناوڕاس شاره‌گه‌یش مزگفت گه‌ورایگ  دیاره‌و گومه‌زى به‌رزیگ دیریگ له‌وه‌رانوه‌نر بازاڕ عه‌سرى. له‌ناوچه‌ى (جیزان)یش ك كه‌فیگه‌ شان شار عه‌زیزیه‌ له‌لاى خوه‌رهه‌ڵاتیه‌وه‌، مه‌زارگه‌ى یه‌كیگ تر له‌پیاوخاسه‌یل خوداناس كریه‌یگه‌ دى وه‌ناو(گورزه‌دین)ك یه‌یش بنه‌چه‌كى چووگه‌وه‌ ئه‌را ئیمام جه‌عفه‌ر كوڕ ئه‌بو تالب(سڵام خودا له‌لى).

له‌ناوچه‌ى عه‌زیزیه‌ وه‌هه‌ردوگ زووان عه‌ره‌بى و كوردى قسه‌ كریه‌یگ ، چوینكه‌ هه‌ر له‌ زویه‌وه‌ بڕیگ له‌ كورده‌یل فه‌یلى له‌و شاره‌ نیشته‌جى بوینه‌و تاریخیگ ره‌سه‌نایه‌تى دیرن له‌ورا جویر باقى شاره‌یلیان و تا ئیسه‌یش له‌بان داب ونه‌ریت خوه‌یان چنه‌ ڕیه‌وه‌و ژیان هاوبه‌ش وئاشتیانه‌یگ دیرن وه‌ل باقى مه‌ردم شاره‌گه‌یا.