ئیمه‌ و پادشایه‌یل ئى وه‌خته‌!!

شفق نيوز

وه‌ناو عیراقه‌ وه‌ تایبه‌تى، هه‌رچه‌نى ك پڕه‌ له‌ ده‌رس و عبره‌ت، وه‌لى پڕیشه‌ له‌ كار وفه‌رمانه‌یل ئه‌ڵاجه‌وى وكه‌موینه‌، وه‌ تایبه‌ت وه‌ل ئه‌یانه‌گ تازه‌ ده‌سیان له‌ له‌ ده‌سڵات به‌غدا به‌ن بویه‌ و زوورمیان ده‌یان ساڵ پارچه‌یگ له‌و نانه‌ ڕه‌قه‌ و جامیگ له‌و ماس ودووه‌ كریاسه‌ به‌شیان ك كورد وه‌ هه‌زار حاڵ په‌یاى كردیاد،  وه‌ختى په‌نا وه‌ كوردستانه‌گه‌مان بردیان... ئه‌یانه‌ ئیسه‌ ته‌قالا كه‌ن وه‌ هه‌ر شیوه‌یگ بوود زه‌ره‌د وه‌ كورد بڕه‌سنن وهویچ خاسییگ له‌وه‌ر چه‌ویان نییه‌ و پشت كه‌نه‌ ئه‌و مێژووه‌ ك عاریان ئه‌یه‌ید ئمڕوو ناوى بیه‌رن وهه‌میش عاریان ئه‌یه‌ید له‌ سه‌ركه‌فتن ئى به‌شه‌ له‌ كوردستان ك وه‌ ڕه‌نج وخوین وئاره‌ق ناو تیوڵ مه‌ردمه‌گه‌ى خه‌ریكه‌ وه‌ره‌و ئاسوو ئاینده‌یگ پرشنگدار پا نه‌ید… له‌ په‌ند و وه‌سه‌رهاته‌یل كوردى خوه‌مان باسیگ هاتیه‌ ك ئیجووره‌ ڕه‌فتاره‌یله‌ شه‌رمه‌زار ئه‌كا و ئه‌خوازێ بكاده‌ى په‌ند وعبره‌تیگ ئه‌را ئى جووره‌ كه‌سه‌یلیگ، ك گومان كه‌م ڕه‌فتاریان جوور ڕه‌فتار پاڵه‌وان ئى وه‌سه‌رهاته‌ بوود ك پیشینه‌یلمان ئه‌رامان باسى كردنه‌ و ئویشن: پادشاى یه‌كیگ  له‌ وڵاته‌یل فه‌رمان وه‌ داردوده‌سه‌ى ده‌وروگردى دا ك 10 سه‌گ هار  و دڕنه‌ ئه‌راى په‌یا بكه‌ن و بخه‌نه‌یانه‌ شوونیگ تایبه‌ت؛ تاگه‌ر هه‌ر وه‌ختى یه‌كى له‌ وه‌زیره‌یلى یا له‌ داروده‌سه‌گه‌ى غه‌ڵه‌ت بكا بخاده‌ى وه‌رده‌م ئى سه‌گه‌یله‌ تا له‌وه‌رچه‌و خوه‌ى له‌ت و په‌تى بكه‌ن.
ڕووژیگ له‌ ڕووژان یه‌كیگ له‌ وه‌زیره‌یلى ڕاى له‌ باوه‌ت كاریگه‌و ئه‌را پادشا به‌یان كرد، وه‌لى پادشا قسه‌ و ڕاى ئى وه‌زیره‌ وه‌ غه‌ڵه‌ت و نادروس دا قه‌ڵه‌م و بڕیار دا ئى وه‌زیره‌ بخریه‌یده‌ وه‌رده‌م ئه‌و سه‌گه‌یل هاره‌، تا له‌ت وپه‌تى بكه‌ن.
وه‌لى كابراى وه‌زیر  وته‌ پادشا: سه‌روه‌رم من یه‌ 10 ساڵه‌ هامه‌ خزمه‌ت جه‌نابد و ئیسه‌ تو وه‌ى جووره‌ وه‌لما ڕه‌فتار كه‌ید؟!.. من قه‌بوولمه‌ وه‌ ئه‌مر و فه‌رماند؛ وه‌لى داوا له‌ لید كه‌م له‌ پاداشت ئه‌و 10 ساڵه‌ ك خزمه‌تد كردمه‌ ته‌نیا 10 ڕووژ مووڵه‌ت بیه‌یده‌ پیم!!.. پادشایش ئى داوكاریه‌ ئه‌راى جیوه‌جیكرد و وته‌ پى قه‌ى نه‌یرى ئى 10 ڕووژیشه‌ ئه‌را تو بزانم چه‌ كه‌ید؟!
وه‌زیریش چوى ئه‌را لاى پاسه‌وان سه‌گه‌یل و وته‌ پى خوازم من خوه‌م ئه‌را ماوه‌ى 10 ڕووژ خزمه‌ت ئى سه‌گه‌یله‌ بكه‌م و تو بچوو ئه‌را خوه‌د ئى 10 ڕووژه‌ له‌ ناو ماڵ ومناڵ خوه‌د بووه‌ سه‌ر.. كابراى پاسه‌وانیش وت: ئمجا ئى كاره‌ چ نه‌فیگ ئه‌را تو دیرێ؟ وه‌زیریش وت: له‌ وه‌خت خوه‌ى ڕه‌سیده‌و، و دویاخر زانید نه‌فى ئه‌را من چه‌س!.
وه‌زیر له‌ى ماوه‌ى 10 ڕووژه‌ ده‌س كرده‌ ئیوه‌تكردن سه‌گه‌یل و خواردن دا پیان و پاكیانه‌و كردیاد و شوون خه‌فتن و ئسراحه‌تكردنیان خوه‌ش كردیاد.
دویاى ته‌واو بوین 10 ڕووژه‌گه‌، پادشا فه‌رمان دا ك وه‌زیره‌گه‌ بخه‌نه‌ وه‌رده‌م سه‌گه‌یل هار و خوه‌یشى هات تا وه‌چه‌و خوه‌ى بوینى ئى سه‌گه‌یله‌ چوین وه‌زیره‌گه‌ له‌ت وپه‌ت كه‌ن، وه‌لى وه‌ختى وه‌زیر خریا وه‌رده‌م سه‌گه‌یل هار پادشا سه‌رى سڕ مه‌ن، وه‌ختى نووڕست سه‌گه‌یل له‌وه‌ر پاى وه‌زیر كرووزیه‌ن و وه‌ده‌وریه‌و سویڕ خوه‌ن و خوه‌یان چه‌سپننه‌ قه‌یه‌و !! ئمجا پادشا له‌ وه‌زیر پرسى: تو چه‌ وه‌ل ئى سه‌گه‌یله‌و كردیده‌ ك وه‌ى جووره‌ وه‌لدا ڕه‌فتار كه‌ن؟! وه‌زیریش جوواوى دا و وت :جه‌ناب پادشا من ته‌نیا ئه‌را 10 ڕووژ خزمه‌ت ئى سه‌گه‌یله‌ كردم و ئه‌وان خاسى من له‌ وه‌رچه‌ویان بوى و له‌ هویریانه‌و نه‌چیم!! ، وه‌لى من 10 ساڵ خزمه‌ت جه‌نابد كردم وتونیش هاتید ته‌نیا له‌وه‌ر یه‌ك قسه‌ و ڕایگ خوه‌د وه‌ته‌نى غه‌ڵه‌ت گشتى له‌ هویره‌و بردید، پادشایش سه‌ریگ له‌لى له‌قانه‌وه‌و و فه‌رمان به‌خشین وه‌زیره‌گه‌ دا!!  

ماجد سوره‌میرى