ژن ته‌رازوى ژیانه‌

شفق نيوز

وشه‌و قسه‌یلیگ هاوردنه‌سه‌ كار جویر گوزارش كردن له‌ ته‌بیعه‌ت و جوانى و ره‌فتار و هه‌ڵسوكه‌فت ژنه‌یل له‌ى ژیانه‌.

بیگومان هویچ وه‌ختیگ ژن له‌ڕوى هه‌ق و حورمه‌ت نه‌بایه‌د له‌پیاو جیاوه‌ بكریه‌یگ، ئى دروسكریاگ یا مه‌خلووقه‌ له‌شوون ئه‌وه‌ك باوه‌ ئاده‌م دروس بوى وه‌ فه‌رمان خودا، یه‌یش له‌ ده‌نگ ئه‌و دروسكریاو بویه‌ هاولف وهاوده‌م ئه‌ڕاى، ژیانیش وه‌بى ژن ژان و سته‌مه‌، هه‌ر له‌وه‌ر ئه‌وه‌یش دوینید وه‌ شیواز جووراو جوور تاریفى كریاگه‌و ئویشن: ژن ئه‌را سه‌رسامى پیاوه‌یل دروس نه‌كریاگه‌، به‌ڵكوو ئه‌را ئه‌وه‌ دروس كریاگه‌ بووده‌ سه‌رچه‌وه‌ى به‌خته‌وه‌رى ته‌نیا پیاویگ.

له‌لایگ تره‌و وه‌گشت دڵنیاییگه‌وه‌ ئاشكراى ئه‌وه‌ كریاگه‌ ك راز به‌خته‌وه‌رى پیاو ه‌یل ته‌نیا ژنه‌یلن. ئنجا له‌وه‌ر ئه‌وه‌ك بزانید چوین ژن شایسته‌ هه‌ڵوژنید هه‌وه‌جه‌ وه‌ئه‌قڵ خاسیگ دیرید و ئه‌را ئه‌وه‌ك دڵ ژن باریده‌ ده‌س بایه‌سه‌ بزانید چوین ره‌فتار بكه‌ید، چوینكه‌ ئویشن: دڵ ژن مرواریه‌و هه‌وه‌جه‌ وه‌ ڕاوكه‌ر زانایگ  دیریگ.

بلیمه‌تى یا عه‌بقه‌ریه‌ت ژن له‌دڵى جیگیره‌و دڵیشى خاڵ كزیه‌گه‌یه‌، ئى په‌نده‌ راسیه‌و ژنه‌یل وه‌ حوكم دڵ ره‌فتار كه‌ن، وه‌لى له‌هه‌مان وه‌خت قه‌ڵاى گه‌ورایگه‌و ئه‌گه‌ر دڵى رمیا وه‌لیا رمیه‌یگ.

ته‌نیا حاڵه‌تیگ ژن ك دیریگه‌ى فره‌جار ئه‌وه‌سه‌ ك نیه‌تویه‌نیگ  چاره‌سه‌ر گونجیاگ بوینیگه‌و ئه‌را كیشه‌و گرفتیگ، هه‌ر له‌وه‌ر ئه‌وه‌یش دوینید وه‌ ئه‌سر چه‌و گه‌ردیگه‌ شوون قورتاربوین له‌و گرفته‌ ك تیه‌یگه‌ تویشى، ئنجا له‌و حاڵه‌تیشه‌ ژن وه‌ختى گیریگ، توانایى و هیز پیاو له‌ناوبه‌یگ و ناچار بایه‌سه‌ دڵى نه‌شكنیگ و ئاره‌زوو دڵى ئه‌ڕاى جى وه‌جى بكا، چوینكه‌ جویر ئه‌وه‌ك گه‌ورایه‌یل وتنه‌: ژن وه‌ك گیاى نازكیگه‌، له‌ورانوه‌ر هه‌وا چه‌میه‌یگ وه‌لى وه‌ گه‌رده‌لویل نیه‌شكیه‌یگ.

بیجگه‌ ئه‌وه‌یش ژن له‌وه‌رده‌م تاریف پیاو( ته‌رازوى ژیانه‌)و له‌ هه‌مان وه‌خت  ژن خاسیش خوه‌شى ده‌یگه‌پید و ژن ئازایش گرینگى یا ئه‌همیه‌ت، وه‌لى ئویشن ژن وه‌ ئه‌سر چه‌وه‌یلى تویه‌نیگ زاڵ بووده‌ بان وه‌هێزترین پیاو. وه‌ل ئه‌وه‌یشا دانایه‌یل له‌باوه‌ت ژن وتنه‌: گیلترین ژن تویه‌نیگ ئازاترین پیاو بخه‌ڵه‌تنیگ و ئازاترین ژنیش وه‌ ئاسانى وه‌پیاویگ شیت خه‌ڵه‌تیه‌یگ. ك ئه‌یه‌ له‌باوه‌ت ره‌فتاریه‌و وتنه‌سه‌ى، وه‌لى وه‌ هه‌ر جووریگ بوود ئى ره‌گه‌زه‌ كه‌فتیه‌سه‌ وه‌ر تاریف جوان پیاوه‌یل و به‌خته‌وه‌رى له‌ساى دوینریه‌یگه‌ چه‌و، ك بایه‌سه‌ ریز و حورمه‌ت له‌لى بگیریه‌یگ، چوینكه‌ ئازایه‌تى و ماڵدارى و كه‌سایه‌تى بڕیگ له‌ پیاوه‌یلیش ها وه‌ ژن جویر ئه‌وه‌ك پیشینه‌یل وتنه‌ هه‌ر پیاویگ گه‌ورا ژنیگ گه‌ورا ها له‌پشتى.