گه‌شتیگ ئه‌ڕا ( سیلان گور)

شفق نيوز

ناسریاگه‌ وگشت شوینه‌ ره‌ین ودلڕفن گه‌شتوگوزاریه‌گان گریگه‌خوه‌ی .

سیلان گورهاله‌ چوارچیوه‌ی مالیزیای فدرالی وپایته‌خته‌گه‌ی ( شاعیلام )ه‌ ك بیجگه‌ سروشت دڵڕفنی شوین گرنگ بازرگانییشه‌. بیلا سه‌ره‌تا له‌باوه‌ت مه‌ردمه‌گه‌ی ئه‌ڕادان بیوشم .....

وه‌رجله‌ ئه‌وه‌گ گه‌شتیارسه‌ردان شوینه‌ گه‌شتیاریه‌گان هه‌روڵاتیگ بكه‌یگ بایه‌د مه‌ردم ناوچه‌گه‌ وپێكهاته‌گانی بناسیگ . مه‌ردم سیلانگورله‌ ره‌گه‌ز سینی وهندی ومالایی وچه‌ن ره‌گه‌زیگترجیاواز پێك تیه‌ن ؛ هه‌رچه‌ن ره‌گه‌زه‌یل جیاوازیگ له‌ی ناوچه‌ نیشته‌جان وه‌لی مه‌ردمه‌گه‌ وه‌ل یه‌كا وه‌ئاشتی ژیه‌ن و هه‌رنه‌ته‌وه‌و ره‌گه‌زیگیش پارێزگاری له‌ داب ونه‌ریت وروشنهویری خوه‌ی كردگه‌ ؛ هه‌رچه‌ن زوان ره‌سمی ونیشتمانی وڵات مالیزیه‌ زوان ( مالاییه‌) وه‌لی زوان ئنگلیزی وه‌فراوانی له‌ی وڵاته‌ قسه‌ وه‌پی كریه‌ی وهه‌رنه‌ته‌وه‌یگيش وه‌زوان خوه‌ی خوه‌نیگ ونویسیگ وقسه‌كه‌یگ ؛ ئاین ره‌سمییش له‌ی وڵاته‌ ئسلامه‌ وه‌لی ئاینه‌یلتریش وه‌ئازادی موماره‌سه‌ی ئاین خوه‌یان كه‌ن . ئمجابیلا باس شیونه‌واره‌يل سیلان گور ئه‌ڕادان بكه‌م ...

یه‌كیگ له‌ لایه‌نه‌ گرنگه‌گان سیلانگور داشتن چه‌ندین شوینه‌وار ئاینی ومێژووییه‌ ؛ هه‌ریه‌یش هیشتگه‌ هه‌رێمه‌گه‌ بایخ خوه‌ی داشتوود له‌ڕوی گه‌شتوگوزارو سه‌رنج كیشان مه‌ردم گه‌شتیار. بیلا وه‌ل چه‌ن شوینیگیان ئاشنادانه‌وبكه‌یم ...

*مه‌زارگه‌ی مه‌لك : ئی مه‌زارگه‌ ك له‌بان ته‌پوڵكه‌یگ دروس كریاس هن ( مه‌لك یاسوڵتان عه‌بدولسه‌مه‌د

مه‌زیجه‌ ) ودزاین بناسازی خوه‌رئاوای كویه‌نه‌وهندی وئسلامی له‌تی وه‌كاربریاگه‌ . ئه‌ی مه‌زاره‌گه‌ له‌ ساڵ ١٨٩٨زاینی دروس كریاگه‌ ؛ له‌ی شوینه‌ سوڵتان چوارم ( سیلانگور)هاله‌تی ك ناوی سوڵتان عه‌بدولسه‌مه‌دو ئه‌ندامه‌یلترخێزان پادشایی وه‌رین .

*كوشك شاره‌گه‌ : كوشك شارولایه‌ته‌گه‌ كه‌فیگه‌ شاریگ مێژوویی ئه‌ویش شار(جوقرا )سه‌ له‌ نزیك ده‌ریاچه‌ی سیلانگور باكور؛ وه‌خت خوه‌ی جوقرا باره‌گای پادشا كیوه‌نه‌گان بویه‌ . ئی كوشكه‌ له‌ سه‌ره‌تای سه‌ده‌ی بیسم دروسكریاگه‌ وكوشكه‌گه‌ ١٥غورفه‌ هاله‌تی وباخچه‌ی سه‌وزگه‌ورایگ دیری ؛ له‌شانیشی جامع مێژوویی سوڵتان عه‌لائدین دروس كریاگه‌ وگه‌شتیاره‌یلیش وه‌شیوه‌ی وه‌رده‌وام سه‌ردانی كه‌ن .

*جامع كه‌و : جامع كه‌و وه‌خاتركومه‌زه‌ ڕه‌نگیه‌گه‌ی ناوی نریاسه‌ ( جامع كه‌و) وه‌نه‌ هه‌ خوه‌ی جامعه‌گه‌ی سوڵتان عه‌بدولعه‌زیزه‌ ك وه‌یه‌كیگ له‌ بینا سه‌رنج كیشه‌گان دونیاس وبه‌رزترین مناره‌ له‌ جه‌هان دیری وجووره‌یل وشیوازه‌یل نه‌خشه‌سازی وه‌خه‌ت ئسلامی هاله‌تی .

* ئشكه‌فت باتۆ: ئی ئشكه‌فته‌ له‌ باكوور كوالالامپور پایته‌خته‌ و یه‌كیگه‌ له‌ ناوچه‌ گه‌شتوگوزاریه‌گان (سیلانگور) وساڵانه‌ له‌گشت جه‌هان مه‌ردم وه‌بوونه‌ی عه‌ید هندوسی سه‌ردانی كه‌ن ؛ شوینه‌گه‌ له‌ سێ ئشكه‌فت گه‌ورا پێكهاتگه‌ ك یه‌كیگیان په‌ره‌سگایگ سه‌ره‌كی هندوسی هاله‌تی ؛ ئی ئشكه‌فته‌ ری سه‌یاره‌ نه‌یری وبایه‌د وه‌پا بچیده‌ ئه‌ڕای ؛ هه‌رله‌ی شوینه‌ ئشكه‌فت رامایانا هه‌س ك دیواره‌گانی وه‌جووره‌یل هونه‌ری رازیاگه‌سه‌و.

*هندوسان بویچگ : هه‌ركه‌سیگ بتوای جنگ بی وینه‌و تایبه‌ت بسینی بایه‌د سه‌ردان ناوچه‌ی ( كلانگ )

بكه‌یگ تا وڵات هند وه‌شیوه‌ی بویچگ بوینی . ئی شوینه‌ هاله‌ ناوڕاس ماڵه‌ بازرگانیه‌ كیونه‌گان ؛ له‌ی شوینه‌ گه‌شتیاره‌یل ملله‌ت ئارام وبی ده‌نگیگ دوینن ك تائیسه‌یش له‌بان ژیان كویه‌نه‌ی خوه‌یان مه‌ننه‌ وهه‌رچی چشت كویه‌نه‌ی وڵات هندوسانه‌ لایان هه‌س جوور خواردن وئاڵه‌ت وعه‌ترو وچه‌ندین لایه‌نتر ژیان هندیه‌ كویه‌نه‌گان . هه‌میش سیلانگور موزه‌خانه‌ی سوڵتان عیلامشا هاله‌تی بیجگه‌ چه‌ندین ريستورانت ومیوانخانه‌ی ناوده‌وڵه‌تی ك توانای میوانداری له‌ ژماره‌ی فه‌ره‌یگ گه‌شتیاردیرن .