مه‌ینه‌تى كورده‌یل ده‌یشت هه‌رێم

شفق نيوز

كاره‌یل جووراو جوورى و ئه‌و كیشه‌و گرفته‌یل و ناكووكیه‌ له‌یوا له‌ئاده‌میزاد كه‌ن قیمه‌ت گرانیگ  بیه‌یگ له‌ى وه‌زعه‌و له‌لایه‌نه‌یل فره‌یگه‌وه‌ جویر: خراوى حاڵه‌ت ژیان و گوزه‌ران و نه‌وین خزمه‌تگوزراى ته‌ندروسى و پزیشكى و خراوى و كه‌مى كاره‌با ك نیگه‌ران و ناڕه‌حه‌ت مه‌ردم كردگه‌ ، یه‌یش له‌شوون ئه‌وه‌ك له‌رژیم گووڕ وه‌گووڕه‌وه‌ مه‌نده‌سه‌جى وه‌ل گشت خه‌م و مه‌ویسى و به‌دبه‌ختییگا.

ئه‌و مه‌ینه‌تیه‌یله‌ ك كورده‌یل ده‌یشت هه‌رێم دیرنه‌ى له‌كه‌س نیه‌شاریه‌نه‌وه‌ ، ئه‌ویش ئه‌وه‌سه‌ ك وه‌بوونه‌ى ئه‌وه‌ك پشتگیرى له‌ جموجویل رزگاریخواز كورد كردن و هه‌میشه‌ كوردپه‌روه‌ر و نیشتمانپه‌روه‌ر بوین و دژ فكره‌ى دكتاتۆریه‌ت و شۆڤێنیه‌ت بوین ، هه‌ر له‌وه‌ر ئه‌وه‌یش نوڕید له‌ى عراقه‌ مه‌ویس كریان وه‌دریژایى ساڵه‌یل فره‌یگ  و حكوومه‌ت تازه‌ى عراق هویچ گرینگى یا ئه‌همیه‌تیگ  وه‌كورده‌یل ده‌یشت هه‌رێم نه‌یاو له‌لایه‌ن حكوومه‌ت به‌غداوه‌ پشتگووش خریان.

كورده‌یل ده‌یشت هه‌رێم له‌ وه‌زعیگ  ژیانه‌ پڕ بویه‌ له‌ ناخوه‌شى و به‌دبه‌ختى و ترس و له‌رزه‌ ، وه‌دریژایى ساڵه‌یل دویرو دریژیگ  هه‌میشه‌ سیاسه‌ت حكوومه‌ت دكتاتۆر تواسگه‌ ئنتقام له‌لیان بكا له‌وه‌ر ئه‌و جموجویل ژیر وه‌ژیر و ئاشكرا ك له‌وه‌ر خاتر به‌رژه‌وه‌ندى ملله‌ته‌گه‌یان و له‌وه‌ر خاتر نیشتمان خوه‌شه‌ویسیان هاوردیانه‌ى كار و جویر كوردیگ  خاوه‌ن وه‌رپرسیاریه‌تى یا مه‌سئوولیه‌ت خه‌بات بى وچان كردنه‌ ئه‌را ئه‌وه‌ك رووژیگ  له‌ڕووژان به‌ر ئه‌و شه‌كه‌تى و مه‌ینه‌تى و خه‌باته‌ بخوه‌ن و بنیشنه‌ ساى وه‌زعیگ  پڕ له‌ئارامى و ئازادى و دیموكراسى.

ئه‌و كورده‌یله‌ ك له‌ده‌یشت هه‌رێم نیشته‌جا بوینه‌ ، هه‌میشه‌ خه‌ت روى وه‌ڕوى بوینه‌وه‌ یا مواجهه‌ى یه‌كم بوینه‌و ئه‌وه‌ك داشتنه‌سه‌ى ته‌نیا خوه‌شه‌ویسى ملله‌ته‌گه‌یان و نیشتمانه‌گه‌یان بویه‌و بیجگه‌ ئه‌وه‌یش له‌هویر ئه‌وه‌ بوینه‌ ك كوردستانه‌گه‌یان بكه‌فیگه‌ وه‌زعیگ  پڕ له‌خوه‌شى و ئارامى و سه‌روه‌خوه‌یى و هویچ كیشه‌و گرفتیگ  ئه‌را نیشتمان كورده‌یل دروس نه‌وگ، وه‌ل ئه‌وه‌یشا خه‌م و مه‌ینه‌تى فره‌یگ  دینه‌سه‌ چه‌و ك رووژگاره‌یلیگ  بردنه‌سه‌ سه‌ر پڕ بویه‌ له‌ده‌رده‌سه‌رى و گرفت جووراو جوور و دایم جویر غه‌ریب نوڕستنه‌سه‌ وه‌زع خوه‌یان له‌ژیر سایه‌ى حكوومه‌ت زاڵم و زووردار وه‌رین ك وه‌گشت شیوه‌یگه‌وه‌ دریغى له‌ئازارداین و گرتن روڵه‌یلیان نه‌كردگه‌و هه‌واى ئازادى له‌لیان به‌ساویگ  . هه‌ر له‌وه‌ر ئه‌وه‌یش كورده‌یل ده‌یشت هه‌رێم هه‌ق خوه‌یانه‌ ئه‌گه‌ر داواى قه‌ره‌بوو تا ته‌عویز ئه‌و حاڵه‌ته‌یل مه‌ینه‌تیه‌ ئه‌رایان بكریه‌یگ  و حكوومه‌ت هه‌رێم كوردستان وه‌چه‌و دڵسووزیه‌وه‌ بنوڕیگه‌ ئى كورده‌یل وه‌فادار و دڵسووزه‌ ك ساڵه‌هاى ساڵه‌ ناڵنن وه‌ده‌س سیاسه‌ت چه‌فت به‌عسه‌وه‌ ، هه‌ر له‌وه‌ر ه‌ه‌یش وه‌ وژدانه‌وه‌ بایه‌سه‌ مامڵه‌ وه‌ل كورده‌یل ده‌یشت هه‌رێما بكریه‌یگ  و بایه‌سه‌ گووش له‌ داواكاریه‌یلیان بگیریه‌یگ  و جویر ئه‌وسا ناهمى نه‌كریه‌ن ، چوینكه‌ ئه‌یانه‌ هه‌ر كوردن و ساڵه‌یل دویر و دریژیگ  زوڵم له‌لیان كریاگه‌و ئیسه‌یش فره‌ نیه‌ ئه‌را حكوومه‌ت ئه‌گه‌ر بایگ  و مه‌ینه‌تى كورده‌یل له‌وه‌رچه‌و بگریگ.