دادگه‌رى سس و كاریگه‌ریى له‌بان ئاسایش كوومه‌ڵایه‌تى

شفق نيوز

له‌تى خریه‌ێد، دادوه‌ریش چه‌و ته‌ماشاكه‌ر ئه‌و سه‌ندووقه‌ وه‌گووره‌ى دیاریكردن ئه‌و دانیشتنه‌یله‌ ك دادگایه‌یل ده‌سنیشانى كه‌ن ئه‌را نوڕستن و چاره‌ى ئه‌و داواكارى و شكاته‌یله‌، ئنجا جارجاریگ واده‌ى ئه‌و دانیشتنه‌یله‌ دریژه‌و بوود و ده‌رچگن حوكم مینیده‌ بان ره‌فتار پاریزه‌ر و دادوه‌ر ك ئه‌وان په‌یوه‌سن وه‌ وه‌ڕیه‌وبردن ئه‌و كاره‌و ئه‌وان بریار كووتاییهاوردنى ده‌ن له‌هه‌ر وه‌ختیگ ، یه‌كه‌میان خه‌ریكه‌ وه‌مه‌سه‌له‌ى وه‌رگیریكردن و جواودانه‌وه‌ى پرسیاره‌یل و دویه‌میش له‌دویاخستن وه‌رده‌وام و له‌ واده‌ناین یه‌ك له‌شوون یه‌ك تا دادوه‌ر حوكم خوه‌ى له‌و باوه‌ته‌و نیشان ده‌ێد.

 

دیارده‌ى سسى له‌جیوه‌جیكردن دادگه‌رى مه‌سه‌له‌یگه‌ ك مه‌ردمان فره‌یگ وه‌ده‌سیه‌و ناڵنن، ئه‌ویش له‌وه‌ر جیوه‌جى نه‌كردن یاساو شیوازه‌یلى و دویره‌وخستنى له‌مه‌یدان جیوه‌جیكردن، وه‌تایبه‌ت ئه‌گه‌ر دادوه‌ر ئه‌و شكات و داوه‌ته‌ خسته‌ ده‌س پاریزه‌ر ئه‌را ئاڵشتكردن جواوه‌یل، ئه‌وه‌ بیگومان مه‌سه‌له‌گه‌ گه‌وراوه‌ بوودو چشته‌یل تر له‌لى كه‌فێده‌ ده‌یشت ك ئى كاریشه‌ دویاخر ترس دیرێد ئه‌را دادوه‌ر وه‌گووه‌رى قه‌واره‌گه‌ى و هه‌وڵ ئه‌وه‌ ده‌ێد له‌خوه‌ى دویریه‌و بخاو بڕیار له‌بانى نه‌یه‌ێد تا وه‌خت فره‌یگ ، هه‌ر له‌وه‌ر ئه‌وه‌یش ئه‌گه‌ر دادوه‌ره‌گه‌ ره‌فتار كوڵه‌وه‌خت هاورد كار و داوا له‌ لایه‌نه‌یل كرد به‌ڵگه‌یل خوه‌یان نیشان بیه‌ن و یه‌ك جار قه‌وڵه‌یلیان بنویسیه‌ێد، ئه‌وه‌ له‌ى حاڵه‌ته‌ زویتر كاره‌گه‌ ته‌واو بوود، چوینگه‌ گشت شكات و داواكارییگ ده‌ق یاسایى دیرێدو حوكم له‌بانى ئه‌كا.

 

دادوه‌ر سه‌روه‌خوه‌ى ئه‌و دادوه‌ره‌سه‌ ك مینه‌ى دادگه‌رى ئه‌كا له‌مه‌سه‌له‌گه‌، ئه‌ویش له‌ڕى توانایى و پابه‌ندبوینى وه‌ نه‌ریت ئه‌خلاقى. ئنجا غه‌ڵه‌ت گه‌ورایگه‌ هه‌ركه‌سیگ ده‌ور دادوه‌ر له‌ جیوه‌جیكردن یاسا وه‌ خراو بزانێد، به‌ڵكوو جیوه‌جیكردن دادگه‌رى بووده‌ مایه‌ى جیوه‌جیكردن یاسا.

 

بایه‌سه‌ له‌بان دادوه‌ر ئه‌خلاق له‌گشت مه‌سه‌له‌یگ بارێده‌ كار و دویاخر هووكاره‌یل یاسایى بگرێده‌ وه‌ر تا بڕه‌سیده‌ ئه‌و چاره‌سه‌ره‌ ك وژدانى وه‌پى ئاسووده‌ ئه‌كا. وه‌لى پاریزه‌ر بایه‌سه‌ ئیمان و باوه‌ڕ بیاشتوودو له‌ڕى یاساییه‌و ئامانجه‌ كاره‌گه‌ى ئاشكرا بكاو متمانه‌ داشتوود وه‌ نیاز خاس دادوه‌ر.

 

پاریزه‌ر یاریده‌ر دادگا نیه‌، به‌ڵكوو هاوبه‌شه‌ له‌دامه‌زرانن دادگه‌رى، ئنجا ئه‌را هه‌ر كیشه‌یگ له‌ڕوى مه‌بده‌ئیه‌و بایه‌سه‌ دو پاریزه‌ر بوود، یه‌كه‌میان له‌جیاى تاونباره‌گه‌و دویه‌میان له‌جیاى شكاتكه‌ر. له‌یرا ده‌ور پاریزه‌ر دیاره‌ ك ئه‌ویش وه‌رگیریكردنه‌ له‌بان ئه‌وه‌ك نوێنه‌رایه‌تى ئه‌كا.

 

ئنجا سسى دادگا وه‌گووه‌رى خواست هس نیگه‌رانى له‌لى په‌یا بوود له‌لاى مه‌ردمانیگ و شایه‌ت ئاڵشت بوود ئه‌را چاره‌سه‌ر هووزایه‌تى و كیشمه‌كیش له‌لى بكه‌فێده‌و ئه‌را تون وتیژى و خوسه‌و كینه‌ت، ك دویاخریش وه‌تاوان كوشتن و كاره‌سات كووتایى وه‌پى باێد، چوینكه‌ ئه‌گه‌ر ته‌ماشاى ئاماره‌یل بكه‌یم له‌بان كوشتن و هووكاره‌یلى، دوینیم سه‌ره‌تا وه‌ ناكوكى ئاساییگ ده‌س وه‌پیكردگه‌و نه‌ دادگا تویه‌نستگه‌ یه‌كلاى بكاده‌و نه‌یش شیواز هووزایه‌تى چاره‌سه‌رى كردگه‌، ئنجا دویاخریش كاریگه‌رى خراویگ نه‌ێده‌ بان ئاسایش كوومه‌ڵایه‌تى.

 

ریاز هانى به‌هار

ج