باكوور و باشوور عراق ڕاس ئویشن!!

شفق نيوز

و ژیر زوى و یه‌كیگه‌ له‌وڵاته‌یل خوه‌رهه‌ڵات ناوڕاس، ك وه‌رده‌وام بویه‌سه‌ جى چه‌وبڕین هیز ده‌وڵه‌ته‌یل داگیركه‌ر، ئه‌گه‌ریش لاپه‌ڕه‌یل تاریخ به‌یمنه‌ یه‌كا دوینیم ئمپراتۆریه‌ت و داگیركه‌ره‌یل فره‌یگ له‌بان ئى خاكه‌ ك وه‌پى ئویشن(وڵات ناونى دوچه‌مان)جه‌نگ و كیشمه‌كیش كردنه‌.

له‌ده‌مه‌ته‌قه‌یگ له‌ناونى باشوور و باكوور ئى وڵاته‌ وه‌ى جووره‌ باس له‌خه‌یر و به‌یر خوه‌یان كه‌ن و یه‌كه‌مجار باكوور جویر سته‌مدیده‌و چه‌وسیاگیگ ك هه‌میشه‌ كه‌فته‌سه‌ وه‌ر په‌لامار دوشمن ئویشیگه‌ باشوور من ئه‌وه‌ك دیرم ئه‌ڕاد ئویشمه‌ى و تنیش ئه‌وه‌ك دیرید له‌لیم مه‌شاره‌وه‌ى بابزانیم تویه‌نیم مه‌ردم خوه‌مان ڕازى بكه‌یم له‌خوه‌مان:

باكوور: من ئه‌و خاكه‌مه‌ ك وه‌پیم ئویشن به‌هه‌یشت و خاوه‌ن كه‌ش وهه‌واى خوه‌شیگم و هه‌میشه‌ حه‌ز كه‌م ڕیوار و ڕه‌وه‌ن له‌سروشتم بیبه‌ش نه‌ون.

- باشوور: منیش ئه‌و خاك چه‌وره‌مه‌ ك ئنگلیز و داگیركه‌ره‌یل تر وه‌ زوور تواسنه‌ ناهمى بووم له‌ملله‌ته‌ جه‌ور كیشه‌گه‌م.

- باكوور: من وه‌جه‌وه‌ڵ و داره‌ به‌ڕوى و گرده‌كان و گوڵه‌نه‌رگس و گژوگیاى سروشتى و سه‌رچه‌وه‌ى كانیاوه‌یل و تافگه‌و ئه‌شكه‌فته‌یل تاریخى و شوون یه‌كه‌مین كشتوكاڵى له‌دونیا ناودارم.

- باشوور: منیش خاوه‌ن ده‌یشت به‌ره‌كه‌تدار و داره‌ خورماو زه‌لگاوه‌یلم ك سه‌رچه‌وه‌ى په‌یاكردن زنده‌گى خیزانه‌یله‌و دو سه‌رچه‌وه‌ى ئاو گه‌ورا(دجله‌و فورات)ره‌سنمه‌ ئاخرین كه‌سیگ له‌ له‌باشوور له‌وه‌ر خاتر زه‌وى كاڵى و ئاویارى و ده‌سه‌وه‌ركردن ژیان.

- باكوور: من هه‌رچه‌نى باوه‌گوڕگوڕم داوڕیاگه‌و خانه‌قینم هیمان ناته‌سه‌وه‌، وه‌لى وه‌ل ئه‌وه‌یشا تویه‌نیم سوته‌مه‌نى ته‌واویگ دابین بكه‌م ئه‌را مه‌ردمه‌گه‌م جویر نه‌فت و غاز و بیجگه‌ سامانه‌یل سروشتى تر و بیجگه‌ ئه‌وه‌ك شوونیگم ئه‌را گه‌شتیارى و سه‌رچه‌وه‌ى وه‌ده‌سهاوردن ئابوورى.

- باشوور: منیش تویه‌نم فره‌ترین نه‌فت له‌سه‌رچه‌وه‌ى (رومه‌یله‌و زوبه‌یر و گرنه‌و مه‌جنوون و ئه‌بو زه‌رقان و دجه‌یله‌و ناسریه‌و...هتد)په‌یا بكه‌م بیجگه‌ فۆسفات و كبریت و جیوه‌ یا زئبه‌ق قرمز ك ئمڕوو له‌گشت دونیا ره‌واجه‌.

- باكوور: من له‌ به‌دره‌و جه‌سانه‌وه‌ تا ڕه‌سیگه‌ ئاخر وژه‌ له‌لیم موڵك ئه‌و ملله‌ته‌مه‌ ك له‌وه‌ر خاتر من فره‌جار درده‌سه‌رى و ئاواره‌یى و ماڵویرانى دینه‌سه‌ چه‌و.

- باشوور: منیش موڵك ئه‌و مه‌ردمانه‌مه‌ ك له‌باوگ باپیره‌وه‌ له‌بانم ژیان و نه‌یشتنمه‌جى نه‌ك موڵك ئه‌وانه‌ك له‌وه‌ر ته‌ماح و داگیركردن زه‌وى مه‌ردمان تر پشت له‌بنه‌و باوان خوه‌یان كردن و ئیسه‌ په‌شیمانن.

- باكوور: من له‌ساڵ 1991 تائیسه‌ ئازادم و مه‌ردمه‌گه‌م توان سه‌روه‌خوه‌یى داشتوون و سه‌رفراز بوون له‌به‌دبه‌ختى و كیشمه‌كیش و توان ته‌ز شه‌كه‌تى له‌گیانیان ده‌رچوود و له‌یوا بزانم غه‌ڵه‌ت نه‌كردنه‌ له‌ى قسه‌.

- باشوور: نه‌وه‌ڵڵا هویچ وه‌ختیگ غه‌ڵه‌ت نه‌كردنه‌و ت له‌به‌دبه‌ختى و گه‌رده‌لویلان جه‌نگ و كیشمه‌كیش زیاتر هویچ تر وه‌چه‌و نه‌یده‌و مه‌ردمه‌گه‌دیش هه‌ق خوه‌یانه‌ له‌سایه‌د خه‌یرو خوه‌شى بویننه‌ چه‌و، خوه‌زگ منیش مه‌ردمه‌گه‌م ته‌ماشاى ئه‌زموون مه‌ردمه‌گه‌ى تن بكه‌ن و قورتارم بكه‌ن له‌ى هه‌مگه‌ زوڵم و ته‌قینه‌وه‌و به‌دبه‌ختیه‌.

 

جه‌ماڵ ئه‌ركه‌وازى