خه‌رج ئاڵشتكردن باوه‌ڕه‌يل كورد فه‌يلى

عه‌لى  حسێن فه‌يلى

شه‌فه‌ق نيوز/ له‌ى ساڵه‌يل دوياخره‌ گشت چشتيگ وه‌ناو كورده‌يل فه‌يلى پشتگيرى حكومى وه‌پى نه‌ڕه‌سى، هه‌ر وه‌و خاتريشه‌ بايه‌سه‌ له‌بانيان بگه‌ردنه‌ شوون ئه‌و هووكاره‌ ك ئاماده‌گييان و چاره‌سه‌ر كيشه‌يل سه‌ختيان كزه‌و كرد.

 

له‌ى دوياخره‌ كه‌سايه‌تييگ فه‌يلى له‌ پايه‌ى وه‌رپرسيگ حزبى وه‌ سه‌رسوڕمه‌نينيگه‌و باس له‌ جووريگ مه‌ردم ئه‌رام كرد ك هه‌ميشه‌ بانگه‌واز ناڕه‌زايى ئه‌كه‌ن له‌بان حاڵه‌ت گرينگى نه‌داين وه‌ كورده‌يل فه‌يلى و له‌ هه‌مان وه‌خت دوينێد كه‌سه‌يل تر له‌ وه‌رانوه‌ر بڕيگ پويل ئاماده‌ ئه‌را ده‌سميه‌تداين، ك يه‌يش ئه‌خاده‌مانه‌ وه‌رده‌وامى مناكردن، ئمجا كه‌سايه‌تييگ ئازاى جوور مونيره‌ ئومێد خاوه‌ن ماڵپه‌ڕ گلگامش و پياويگ له‌ نه‌وه‌ى خاوه‌ن ره‌فتاره‌يل خاس جوور ئه‌نوه‌ر عه‌بدولڕه‌حمان خاوه‌ن ماڵپه‌ڕ ده‌نگ عراق دوياى ساڵه‌يليگ له‌ هه‌وڵه‌يل بى ته‌كليف و كاريگه‌ر ئه‌را فه‌يليه‌يل، ته‌نيا به‌ر مناكردن چنينه‌ نه‌ك چشتيگ تر، ئى مه‌سه‌له‌يشه‌ فريه‌يش جياواز نيه‌ له‌ مه‌سه‌له‌ى كه‌سيگ جوور هيوا زه‌ندى خاوه‌ن به‌رنامه‌ى "وه فه يلى" ك جه‌فا كيشا وه‌ل مه‌وسميه‌يل فه‌يلى، وه‌ل ئه‌وه‌يشا هيمان ليسته‌گه‌ى له‌ دڵسووزه‌يل ته‌مام نه‌ويه‌ ك هه‌وڵه‌يليان نادياره‌.

 

بيگومان له‌ نه‌وين ئاماده‌گى وه‌جه‌ممان، ئاماده‌گى تاكه‌كه‌سى سته‌م كرد، ك وه‌ تعداد خوه‌ى شماره‌ى حزب و قه‌واره‌يل نزيكه‌و كرد، يه‌يش نه‌ك له‌وه‌ر ئه‌وه‌گ په‌يوه‌سبوين سياسى و حزبى حه‌رام نيه‌و زه‌مه‌تكرياگ نيه‌ وه‌ وه‌رده‌وام، به‌ڵكوو بايه‌سه‌ خوه‌شاڵ نه‌ويم ته‌نيا له‌وه‌ر ده‌رخستن مسته‌ڵح سه‌روه‌خوه‌ى ك خه‌ت ئه‌كيشێده‌ بان باقى مه‌ردمان تر و ئه‌دێده‌ كليليگ ئه‌را گشت چاره‌سه‌ره‌يل، ئمجا له‌ وڵاتيگ وه‌ل ريز و حورمه‌تم ته‌نانه‌ت چايچييش وه‌ ته‌زكيه‌ دامه‌زريه‌ێد.

 

له‌ هه‌ردوگ ديارده‌ى رووژگگرتن بيده‌نگى چه‌سپياگ و ئاژاوه‌ى وه‌رده‌وام ناقوناغى، دوينێد زوورم سه‌روه‌خوه‌يه‌يلمان له‌جياى ئه‌وه‌گ فكره‌و به‌رنامه‌يگ كار بخه‌نه‌ ڕوى، ده‌س ئه‌كه‌نه‌ حاشاكردن له‌ كه‌سان تر هه‌ر له‌ يه‌كه‌م قسه‌يليانه‌و، ئمجا دوياى وه‌رگرتن ئمتيازات شه‌خسييش وه‌ ته‌كبير موورى ئه‌كه‌ن، مه‌سه‌له‌گه‌يش دوير نيه‌ له‌ ته‌ور كورده‌يل فه‌يلى له‌وانه‌گ بوينه‌ شايه‌تيده‌ر مه‌حكوم و تومه‌تبار.

 

له‌ساڵ 2016، دو روێداگ په‌يا بوى له‌ مه‌يدان سياسى عراقى و وه‌ناو كورده‌يل فه‌يلى رازياوه‌، سه‌ره‌تا وه‌ل "وچان جه‌نگاوه‌ر" لوقمان فه‌يلى باڵوێز عراق له‌ ئه‌مريكا ك سه‌ر وه‌ حزب ده‌عوه‌سه‌و خاوه‌ن مێژوو كويه‌نه‌ له‌ خه‌بات دژ به‌عس، دويه‌ميش هه‌ڵسيان ئاراس حه‌بيب فه‌يلى دوياى هه‌ڵوژاننى ئه‌را سه‌رۆك كۆنگره‌ى نيشتمانى و پلاندانه‌ر پرووژه‌ى رمانن رژيم وه‌رين، ك وه‌و خاتريشه‌ به‌شدارى و تيكه‌ڵبوين له‌ پرووسه‌ى سياسى شايه‌ت له‌وه‌ فروانتر بدێ ك دوينيمنه‌ى، ئمجا پرووژه‌يل فه‌يلى تايبه‌ت نيه‌ وه‌ وه‌خت يا شوونيگ دياريكرياگ يا كه‌سه‌يليگه‌و، به‌ڵكوو هه‌وه‌جه‌ وه‌ توانايى و ده‌سميه‌ت چه‌سپياگ و هه‌ميشه‌يى ديرێد، له‌ى بواريشه‌ دو ڕاى هه‌س، يه‌كه‌ميان بايه‌سه‌ وه‌ ديد فكره‌يل شاز و هه‌ڵه‌يگ به‌شدار بويم و دويه‌ميش فه‌رزكردن به‌ڵگه‌و ده‌ليل، دى وه‌ چه‌واشه‌ى ئه‌يانه‌ باوه‌ڕه‌يل نواگيريگ دامه‌زريه‌ێد ئه‌را په‌يوه‌سكردن ئامانجه‌يل و ئاماده‌گى.

 

وه‌ى قسه‌يليشه‌ چشت ئاساييگه‌ مكوڕى بكريه‌ێد له‌بان شه‌راكه‌ت وه‌جه‌م ئه‌را هه‌ر ئامانجيگ له‌ به‌رژوه‌ندى پيكهاته‌گه‌مان بدێ، دى هه‌رچه‌نى سه‌رچه‌وه‌يل فريه‌يگ بدێ ئه‌را خه‌بات و يه‌كلاكردنه‌وه‌ى كيشمه‌كيشه‌يل سياسى و كۆمه‌ڵايه‌تى، دوينێد بنه‌ماگه‌ى بنيات له‌بان ته‌رازوى له‌يه‌كڕه‌سينه‌وه‌و پابه‌ندى و هيز و تواناو ئاماده‌گى نرياگه‌، چوينكه‌ وه‌بى ئه‌يانه‌ وه‌راسى غه‌ريبيم، وه‌ل ئه‌وه‌يشا بايه‌سه‌ يه‌يش له‌ هوير نه‌وه‌يم ك له‌وڵات كاره‌ساته‌يل ته‌نيا يادكردن كاره‌ساته‌گه‌ چاره‌سه‌ر نيه‌.

عه‌لى حسێن فه‌يلى