له‌ سته‌م دیكتاتۆریه‌ت ئه‌را سه‌رده‌م ئاشووگه‌رى

شفق نيوز

  دویاى وه‌سه‌ربردن 35 ساڵ له‌ سته‌م دیكتاتۆریه‌ت و حوكم ته‌كڕه‌وى و چه‌وسیان له‌لایه‌ن رژیم خوینمژ به‌عس و دارو ده‌سه‌ سته‌مكاره‌گه‌ى و زه‌فتكردن هه‌قه‌یل ره‌وا و كوشتن روڵه‌یل بیتاوان عراق و له‌ناوبردن وه‌جه‌م و ئه‌نفال و كیمیاواران كورده‌یل و زیندانیكردن جایه‌ڵ جوانه‌یل و كرده‌وه‌یل نائنسانى تر، جاریگتر دویاى رمیان ئه‌و رژیم فاشیزمه‌ سه‌رده‌میگ تر وه‌ناو سه‌رده‌م ئازادى و دیموكراسى په‌یا بوى ك ئه‌را ماوه‌ى ده‌ ساڵه‌ ته‌نیا هه‌ر ناوه‌گه‌ى دیاره‌و په‌یڕه‌وكردنى ناته‌سه‌ وجوود!!.

له‌یوا دیاره‌ ئه‌و هه‌ناس خوه‌شى و ئوخه‌یكردنه‌ ك سه‌ره‌تاى رمیان رژیم په‌یا بوى له‌لاى مه‌ردمان فریه‌یگ جگرسزیاگ و چه‌وسیاگ، هه‌ناسیگ تر پڕ له‌ ماڵویرانى و لانه‌ویزى هاته‌ بانى، چوینكه‌ له‌ى عراق تازه‌ نه‌ سیاسه‌ت به‌رهه‌مدار و نه‌یش دانیشتن و گفتگوو قاپى ره‌حمه‌ت له‌ ملله‌ت واز كردگه‌.

له‌یرا پرسیاریگ تیه‌یده‌ وجوود، ك ئه‌ویش ئه‌وه‌سه‌ وه‌ خاتر په‌یابوین ئاسایش و ئارامى ئایا ده‌وڵه‌تیگ گه‌وراهیز جوور ئه‌مریكا بایه‌سه‌ چ ده‌وریگ بیاشتوود له‌ چاره‌سه‌ركردن كیشه‌و گرفته‌یل ناونى لایه‌نه‌یل ناكووك عراقى وه‌تایبه‌ت له‌ناونى حكوومه‌ت و مه‌یدانه‌یل خوه‌ینیشانداین یا له‌ناونى حكوومه‌ت و هه‌رێم له‌باوه‌ت مه‌سه‌له‌ى بودجه‌و نه‌فت و گرفته‌یل تر؟ ئه‌یه‌ له‌لایگ .

له‌لایگ تریشه‌و هووكار چه‌ بوى بار سیاسى ره‌سیه‌ ئى گرژیه‌و په‌رچه‌م تایفه‌گه‌رى له‌تى به‌رزه‌و بوى و سه‌رله‌نوو كوشتن و بڕین و رواكانن مه‌ردم بیتاوان ده‌س وه‌پیكرد جوور ساڵه‌یل 2006 و 2007 ؟

ئه‌را جواو ئه‌و پرسیاره‌یله‌ تویه‌نیم بویشیم: مه‌سه‌له‌ى ئارامى و سه‌قامگیرى نه‌ك هه‌ر حكوومه‌ت وه‌ ته‌نیا، به‌ڵكوو ئه‌رك گشت هاووڵاتیه‌یلیشه‌ مقه‌یه‌تى له‌ى بوار گرنگیداره‌ بكه‌ن وه‌خاتر سه‌رسه‌ڵامى خوه‌یان و روڵه‌یلیان، ئه‌ویش وه‌ هاوكارى و ده‌سمیه‌تداین ده‌زگایه‌یل ئاسایشى و داین زانیارى له‌بان هه‌ر حاڵه‌تیگ گومانلیكریاگ، ك یه‌یش ئه‌ركیگ نیشتمانى و ئنسانیه‌.

دویاى ئه‌وه‌یش مه‌ردم وه‌ده‌م خاوه‌ن ماڵه‌و نوڕید، وڵاته‌یل یه‌كگرتگ ئه‌مریكایش له‌شوون به‌رژوه‌ندى خوه‌ى گه‌ردیدو خاوه‌ن ماڵ نیه‌ تا گشت تاوانیگ بخه‌یمنه‌ بانى، ئه‌وان وه‌ ئامانج تر روى له‌ى عراقه‌ كردنه‌ ك ئاشكراو دیاره‌و ناخوازن هیزیگ تر له‌ ناوچه‌گه‌ بایده‌ وجوود ركابه‌رى هیز ئه‌مریكا بكاو هه‌ڕه‌شه‌ له‌ به‌رژه‌وه‌ندیه‌یلى بكا.

ئنجا له‌یرا ده‌ركه‌فید ك خود ده‌سڵاتداره‌یل عراقى و ته‌نانه‌ت حزب و لایه‌نه‌یلیش وه‌رپرسن له‌بان هه‌ر رویداگ و كرده‌وه‌یگ ك جه‌سه‌ى ئى عراقه‌ زه‌خمدار بكاو نه‌خشه‌ى ئاشتى و برایه‌تى له‌تى بشیونید، وه‌لى جى داخه‌ جوور ئه‌وه‌ك سه‌رۆك زانایه‌یل عراق ئاماژه‌ وه‌پى كرد، ئمڕوو دوینید وه‌ ئاشكرا مه‌یدان خوه‌ینیشانداینه‌یل له‌ چه‌ن شوونیگ بویه‌سه‌ مایه‌ى زه‌مینه‌ خوه‌شكردن ئه‌را ترۆریسته‌یل سه‌ر وه‌قاعیده‌و داعش ك ئامانج له‌لى دروسكردن ئاشووگه‌رى و جه‌نگ تایفگه‌ریه‌ له‌ناونى مه‌ردمه‌یل ئى وڵاته‌، چوینكه‌ ئه‌یانه‌ پاشمه‌نده‌ى حزبه‌ خوینمژه‌گه‌ى وه‌رینن ك ده‌سڵاتداره‌یلى وه‌ ئاگر و ئاسن مامڵه‌ وه‌ل روڵه‌یل ئى عراقه‌ كردیان.

به‌ڵى دویاى خوه‌شڵه‌خوه‌شى فریه‌یگ ك گوایا ملله‌ت له‌ سته‌م دیكتاتۆریه‌ت و زوڵم و زوور به‌عس قورتار بوى، وه‌لى جى داخه‌ ئه‌و خوه‌شیه‌ ته‌نیا خه‌ویگ بوى و ترۆر و بكوشه‌یل ئنسانى خه‌ریكه‌ بار سه‌قامگیرى و ژیان هاوبه‌ش و ئاسووده‌یى ره‌سننه‌ مه‌حاڵ و ڕى نایه‌ن دار ئازادى و دیموكراسى بایده‌ به‌ر.

جه‌ماڵ ئه‌ركه‌وازى