كورده‌یل فه‌یلى و ئاسانى هه‌ڵوژاردن و سیاسه‌ت

شفق نيوز

ئه‌را ركابه‌رى له‌ هه‌ڵوژاردن ئه‌نجوومه‌ن پارێزگایه‌یل عراق ك بڕیاره‌ له‌ مانگ نیسان ئاینده‌ ئه‌نجام بگرێد، ئه‌و قه‌واره‌یلیشه‌ ك داواكارى پێشكه‌ش كردنه‌ له‌لایه‌ن كۆمسیۆن باڵاى سه‌روه‌خوه‌ى هه‌ڵوژاردنه‌یل ره‌زامه‌نى له‌بانى دریا وه‌ ئه‌وه‌ك قه‌واره‌یلیگ سیاسیین و ناو كورده‌یل فه‌یلى هه‌ڵگرتنه‌و چوار لایه‌نن، ئمجا له‌وه‌ر ئه‌زموونه‌یل ئه‌وسام وه‌ل كورده‌یل فه‌یلى چه‌وه‌ڕێ ئه‌وه‌ ناكه‌م ئى لایه‌نه‌یله‌ ئسبات وجوود خوه‌یان بكه‌ن یا وه‌لاى كه‌مه‌و ئه‌و وه‌رپرسیاریه‌تییه‌ بگرنه‌ مل ك چه‌سپیه‌ێد له‌بانیان جوور گرنگده‌ر و چالاكوان له‌ بوار فه‌یلى، ئمجا هه‌رچه‌نى دڵم پڕه‌ له‌ ئه‌زموونه‌یل وه‌رین، وه‌لى له‌ڕوى ئه‌خلاقیه‌و له‌وه‌رانوه‌ر ئى پێكهاته‌ى فه‌یلیه‌ باس له‌ راى خود خوه‌م كه‌م له‌وه‌ك دوینمه‌ى نه‌فداره‌ ئه‌را به‌رژه‌وه‌ندى گشتى.

بیلا سه‌ره‌تا رووشنایى بخه‌یمنه‌ بان ئه‌و چوار لایه‌نه‌و دویاخر باس له‌و چشته‌یل خاسه‌ كه‌یم ك بایه‌د روى بیاد، یه‌كیگ له‌ى چوار لایه‌نه‌ قه‌واره‌یگ تومار كریاگه‌ هه‌ر له‌ هه‌ڵوژاردنه‌یل ئه‌نجوومه‌ن نوێنه‌ره‌یل گوزه‌یشته‌ و ئه‌واكانیش چالاكى جووراوجوور دیرن وه‌گووره‌ى رێژه‌و گرنگى، وه‌لى جوور قه‌واره‌یگ فه‌رمى و توماركریاگ سه‌روه‌خوه‌ى ئه‌را یه‌كه‌مجاره‌ ده‌ركه‌فن. یه‌كه‌میان كۆنگره‌ى نیشتمانى گشتى كورده‌یل فه‌یلیه‌ وه‌ سه‌رۆكایه‌تى شێخ نوعمانى و ئه‌واكانیش لیست برایه‌تى كورده‌یل فه‌یلى و رێكخریاگ سه‌لام كورده‌یل فه‌یلى و فراكسیۆن عه‌هد كورده‌یل فه‌یلى.

لیست برایه‌تى وه‌سرۆكایه‌تى كاك ئسماعیل سایه‌میر لیست پارت دیموكرات كوردستانه‌و ئه‌گه‌ر له‌ نزیكه‌و ته‌ماشاى ئى لیسته‌ بكه‌یم مه‌زه‌نه‌ى ئى لیسته‌ ئه‌رامان ده‌ركه‌فێد، له‌وه‌ختیگیش پارتى باێده‌ ناو مه‌یدان ركابه‌رى بایه‌د ئه‌واكان تر وه‌خوه‌یانا بچنه‌وه‌و بایه‌د بزانن ك تواناى پارتى چه‌نیگه‌، ئمجا هه‌رچه‌نى پارتى و یه‌كێتى وه‌و تواناییه‌و نه‌توه‌ینستن كورسییگ له‌ ئه‌نجوومه‌ن پارێزگایه‌یل وه‌رین بارنه‌ ده‌س له‌ به‌غدا، وه‌لى ئیمه‌ جوور چه‌ودیر خاس زانیم ك ئى جاره‌ جیاوازه‌ له‌شوون راسه‌وكردن یاساو داناین دو كورسى ئه‌را فه‌یلیه‌یل یه‌كیگیان له‌ به‌غداو ئه‌واكه‌یش له‌ واست له‌ڕێ سیستم كۆتا. دى له‌بان ئى بنه‌مایشه‌ ئه‌و كورسیه‌ ك ئه‌را به‌غدا تایبه‌ت كریاگه‌ فره‌ نزیكه‌، چوینكه‌ بووده‌ به‌ش پارتى، وه‌تایبه‌ت ئى پارت كویه‌نه‌ ئى جاره‌ ستراتیجیه‌تى وه‌رانوه‌ر كورده‌یل فه‌یلى ئاڵشت كردگه‌، له‌باوه‌ت واستیش تویه‌نیم بویشیم ئى كاره‌ وه‌ گام خاسیگ ئه‌را پارتى هساوه‌.

دى ئایا لایه‌نه‌یل تر فه‌یلى له‌وه‌رانوه‌ر ئى راسیه‌ چه‌ تویه‌نن بكه‌ن..؟ ئه‌گه‌ره‌یل سیناریۆگه‌یش وه‌ى جووره‌سه‌: ئه‌گه‌ر ئه‌واكانتر ركابه‌رى له‌بان كورسیه‌یل گشتى بكه‌ن ئه‌یه‌ وه‌ خودكوشتنیگ سیاسى دانریه‌ێد، چوینكه‌ ئه‌وان دویاخر هویچ چشتیگ وه‌ده‌س نیارن و هه‌وڵ و ته‌قلایان وه‌ تاڵان چوود، ئه‌گه‌ریش ركابه‌رى پارت دیموكرات كوردستان بكه‌ن له‌بان كورسى كۆتا یه‌یش هه‌ر  ئه‌خاده‌یانه‌ دویاى گشت ركابه‌ره‌یل، هه‌ر له‌وه‌ر ئه‌وه‌یش سیناریۆى سێیم ك ته‌نیا سیناریۆیگه‌ بایه‌د ئه‌نجامى بیه‌ن ك ئه‌ویش ئه‌وه‌سه‌ له‌ناونى خوه‌یان یه‌كه‌و بگرن ئه‌را هه‌ڵوژاردن و ئئتلافیگ پێكبارن ئه‌را ركابه‌رى ئه‌و لایه‌نه‌یل تر له‌بان كورسیه‌یل گشتى، له‌ى حاڵه‌تیشه‌ ئه‌گه‌ر سه‌ركه‌فتن و كورسییگ وه‌ده‌سهاوردن ئه‌وه‌ له‌ى حاڵه‌ته‌ دو كورسى وه‌ده‌س تیه‌ریم، ئه‌گه‌ریش سه‌رنه‌كه‌فتن ئه‌وه‌ هه‌ر كورسییگ دیریم و ئیچنه‌ دیاره‌ كه‌فێده‌ به‌ش پارتى، له‌ واستیش وه‌ هه‌مان جوور.

ئئتلاف فه‌یلى ك خوازیاریم ئه‌ڕاى، ده‌سكه‌فت گه‌ورایگ وه‌ده‌س ئه‌یه‌رێد له‌و كورسیه‌ له‌ ئه‌نجوومه‌ن پارێزگا ك پێكهاتگه‌ له‌ 58كورسى، ئمجا ئه‌گه‌ر فه‌یلیه‌یل یه‌كه‌و بگرن بوونه‌ نه‌فكه‌ر گه‌وراو ئاینده‌یش له‌بانى بنیات نریه‌ێد وه‌تایبه‌ت له‌ هه‌ڵوژاردنه‌یل گه‌وراى ئه‌نجوومه‌ن نوێنه‌ره‌یل عراقى.

عسام ئه‌كره‌م فه‌یلى
ج. ا