عزه‌ت دورى كییه؟
عزه‌ت دوری له قوناغه‌یل خوه‌ندن سه‌ركه‌فتگ نه‌وێه و وه‌خاتر ئه‌وه‌گ له قوناغ ناوه‌ندى دو ساڵ له بان یه‌ك ده‌رنه‌چیه ، ناچار بوێه بچوگه خوه‌نستن شه‌وانه له ناوه‌ندى میساق له ناوچه‌ێ ئه‌عزه‌میه‌ێ به‌غدا ، وه‌لێ له‌وره‌یش هه‌م نه‌توێه‌نستێه خوه‌ندن ته‌واو بكه‌ێگ و ناچار بوێه واز له خوه‌ندن بارێگ و ده‌س بكه‌ێگه یه‌خ فروشتن.
ئمجا په‌یوه‌ندى كردێه‌سه حزب به‌عسه‌وه و زوێ ناو ده‌ركردێه له‌و حزبه و بوێه‌سه ئه‌ندام سه‌ركرداێه‌تى هه‌رێماێه‌تى حزب به‌عس. عزه‌ت دوری خاوه‌ن 24 مناڵ بوێه ، 11یان كوڕ و 13یان دوێه‌تن و له ناو ڕزه‌یل حزب به‌عس وه‌ئه‌بو حه‌مزه و ئه‌بو ئه‌حمه‌د ناسریاگ.
له وه‌خت كوده‌تاگه‌ێ 17ى ته‌موز ساڵ 1968 پله‌ێ ئه‌فسه‌ر وه‌پێ دریاس ، له سه‌رده‌م ڕژیم سه‌دام حسین پوست جێگر سه‌روك ئه‌نجومه‌ن سه‌ركرداێه‌تى شورش به‌عس وه‌رگردێه ، له شوون داگیر كردن كوه‌یت له لاێه‌ن ڕژیم به‌عسه‌وه ، پوست جیگر فه‌رمانده‌ێ گشتێ هێزه چه‌كداره‌گان عراق وه‌پێ سپاریاس ، له شوون ئازادى كوه‌یت له لاێه‌ن هێزه‌یل هاوپه‌یمانانه‌ه‌وه ، پوست وه‌زاره‌یل كشتوكاڵ و ناوخوه‌ێ عراق وه‌پێ دریاس.
وه‌رجله ئازاد كردن عراق له لاێه‌ن هێزه‌یل هاوپه‌یمانه‌وه وه سه‌ركرداێه‌تى ئه‌مریكا له ساڵ 2003 كریاسه فه‌رمانده‌ێ سه‌ربازى ناوچه‌یل باكوور عراق.
له شوون ئازاد كردن عراق ، عزه‌ت دوری خوه‌ێ شارده‌و و سوپاى ئه‌مریكا 10 ملیون دولار جور پاداش ته‌رخان كرد ئه‌ڕا هه‌ر كه‌سێگ زانیارى له باوه‌ت شوونه‌گه‌ێ ئاشكراوه بكه‌ێگ.
دوری له ساڵ 2009 ڕێكخراوێگ دروس كرد وه‌ناو (جه‌بهه‌ێ جهاد و ڕزگار بوێن نیشتمانی) ، له شوون ئه‌وه‌ێش ڕێكخراو نه‌قشبه‌ندیه‌گان دروس كرد و چه‌ندین جار په‌لامار سوپاێ ئه‌مریكا له عراق و هێزه‌یل ئاسایش عراقى دا.
له ساڵه‌یل 2010 و 2012 له ساڵیاد دامه‌زرانن حزب به‌عس ، تومارێگ ڤیدیویى په‌خشه‌و كرد و باس له ده‌س وه‌ردان ئێران له عراق و دوژمنی به‌عس دژ وه ئه‌و وڵاته دواره‌وه كرد و پشتگیری ئوپوزسیون سوریه كرد.
دوێایین جار له ساڵ 2013 ده‌ركه‌فت و پشتگیری خوه‌ێ له خوه‌ی نیشانداین و ناره‌زایه‌تیه‌گان چه‌ن پارێزگاێگ سوننى نشین عراق ده‌ربڕى
دویاجار له ڕوژ 17ێ نیسان 2015 تلفزیون ڕه‌سمی عراق خه‌وه‌ر كوژیان عزه‌ت دوری له ناوچه‌ێ حه‌مرین هه‌ڵكه‌فتگ له خوه‌رهه‌ڵات پارێزگاى سه‌لاحدین بڵاو كرده‌و و ڕاگه‌یاند : دوری له جه‌نگێگ سه‌خت له ناونی هێزه ئه‌منیه‌گان و حه‌شد شه‌عبی له لاێگ و چه‌كداره‌یل تروریست له لاێگتر له كاڵگه‌ێ عه‌لاس كوژیاس.
سه‌رچاوه ئاژانسه‌یل هه‌واڵ
ج ك
