كورده‌یل فه‌یلى و ده‌رفه‌ت خود چه‌سپانن

شفق نيوز

دریا كورده‌یل فه‌یلى له‌چوارچیوه‌ى سیستم(كۆتا)و هه‌رچه‌نى یه‌یش له‌ئاست ئه‌و ئاره‌زووه‌یله‌ نییه‌، وه‌لى ئیمه‌ ئومیده‌واریم لایه‌نیه‌ل فه‌یلى كار له‌وه‌ر خاتر وه‌دیكردن نوێنه‌ره‌یل راسكانى بكه‌ن ئه‌را خوه‌یان چ له‌ به‌غدا یا واست، وه‌ل وجوود زیاتر له‌ لایه‌نیگ سیاسى وه‌ناو فه‌یلیه‌یله‌و خوه‌ى كاندید ئه‌كا چ هه‌ردوگ حزب كوردى یه‌كێتى نیشتمانى و پارت دیمۆكرات كوردستان چ حزبه‌یل ئسلامى ك ئه‌را یه‌كه‌مجاره‌ له‌ى هه‌ڵوژاردنه‌ به‌شدارى كه‌ن.

 

 

ئمجا وه‌ل ئه‌و ماوه‌ى كه‌مه‌ ك مه‌ندگه‌، ئیمه‌ دوینیم هیمان ناو كاندیكریاگه‌یل ئاشكرا نییه‌و له‌لاى مه‌ردم فه‌یلى نائاشكراس جوور ئه‌وه‌ك بویشید مه‌سه‌له‌ى تایبه‌ت وه‌پیان نییه‌ جوور كاره‌یل تر. هه‌ر له‌وه‌ر ئه‌وه‌یش پرسیاره‌یل فره‌یگ هه‌س له‌ى باوه‌ته‌وه‌و چه‌وه‌ڕێ جوواودانه‌وه‌ كه‌ن و له‌وانه‌یش: ئایا ئاشكرا نه‌كردن ناوه‌یل كاندیدكریاگ ئه‌را چه‌، له‌وه‌ر به‌رژه‌وه‌ندى كى؟

 

زیاتر له‌ چوار لایه‌ن ركابه‌رى له‌بان ئه‌و كورسى یه‌تیمه‌ كه‌ن ك فه‌یلیه‌یل له‌لى ناهمى بوینه‌و زوڵم له‌لیان كریاگه‌و ئمڕوو هه‌وڵ ئه‌وه‌ ئه‌یاد ده‌نگ راسكانییگ بوینیده‌و هس وه‌ ژانه‌یلیان بكا و بڕێگ له‌و هه‌قه‌یلیانه‌ بیه‌رێده‌و ك له‌لیان زه‌فتى كریا، یا بووده‌ سه‌ره‌تاى یه‌كه‌وخستن رزه‌یلیان، وه‌لى دیاره‌ مه‌سه‌له‌گه‌ ته‌ماویه‌و راز خوه‌ى ئاشكرا ناكاو هه‌ر جووریگ بوود دویاخر هه‌ر ده‌ركه‌فێد.

 

له‌یه‌كه‌وداین و شیه‌وكردن ئى هه‌ڵوێسته‌ ئاشكراى وجوود ده‌ركه‌فتن ترسیگ كرد له‌ ده‌ركه‌فتن كه‌سایه‌تییگ بته‌و فه‌یلى ك كار وه‌ ئاینده‌ى عراق سیاسیه‌و داشتوودو جوور ئه‌وه‌ك بویشێد گشت لایه‌نه‌یل رێككه‌فتنه‌ له‌بان دابه‌شكردن نه‌خش یا ده‌ور له‌بان كه‌سایه‌تیه‌یل دیاریكریاگ ك بڕیگ له‌لیان وه‌ گووره‌ى باره‌گه‌ به‌شدارى بكاو بڕێگیانیش هه‌ڵگر به‌رنامه‌یلیگ بوون لایه‌ندار، ئمجا ئایا كورده‌یل فه‌یلى له‌ى مه‌سه‌له‌ ره‌سینه‌سه‌و؟ ك مه‌رام له‌ فه‌یلیه‌یل وه‌گشتى هه‌ر له‌ هووز و تیره‌یلیان بگر تاره‌سێده‌ فكرمه‌ن و رووشنهویره‌یلیان ك بایه‌سه‌ له‌یه‌كه‌وداین گورجیگ ئى مه‌سه‌له‌ بكه‌ن ئه‌را ئه‌وه‌ك بزانن چه‌ روى ئه‌یاد.

 

بیگومان لایه‌نه‌یل سیاسى هه‌زار هساو كه‌ن ئه‌را كورسییگ ك وه‌ منه‌ته‌و دریاسه‌ فه‌یلیه‌یل، وه‌ل ئه‌وه‌یشا هویر له‌وه‌ كه‌ن و ترسیه‌ن ك كورده‌یل فه‌یلى سه‌روه‌خوه‌یان بوون و بوونه‌ خاوه‌ن هێز ئه‌را ركابه‌ریكردن هاوبه‌شه‌یل پرۆسه‌ى سیاسى ئه‌را هه‌ڵوژاردنه‌یل ئاینده‌ى په‌رله‌مانى، یا جوور هووكاریگ قانجاز له‌لى بكه‌ن له‌ كیشمه‌كیش و هه‌ر وه‌ختیگ بخوازن وه‌كارى بیه‌رن، دى نووڕید چشته‌یل فره‌یگ هه‌س ئه‌را باسكردن و چه‌وه‌ڕێ جوواو كه‌یم له‌ خاوه‌ن بڕیار و نوێنه‌ر فه‌یلیه‌یل وه‌تایبه‌ت ئه‌وانه‌ك سفه‌ت ئنتمابوین وه‌لیانا دیریم، ئمجا ئایا ئى مقه‌یتیكردن و چه‌ودێریه‌ هه‌ر ئیچنه‌ مینیده‌ى یا كاره‌یل تر هه‌سه‌و خریاسه‌ گره‌و ؟

 

سه‌ڵاح شمشیر به‌درى

ج. ا