حه‌سویدى ده‌ردیگ دویاكه‌فتن كوومه‌ڵایه‌تیه‌

شفق نيوز

بڕیگ له‌لیان ته‌نیا كاریگه‌رى خراو له‌بان خاوه‌نه‌گه‌ى دیرن و بڕیگیشى كاریگه‌رى دیرن له‌بان مه‌ردم ده‌وروه‌ر.

شایه‌ت كه‌سه‌یلیگ بویشن باوه‌ڕ وه‌ى چشته‌ نه‌یریم، وه‌لى له‌ڕاسى ئه‌یه‌ چشتیگ واقعى كوومه‌ڵگامانه‌و هه‌ر وه‌و هووكاریشه‌و فره‌كه‌س ئارامى ده‌روینى له‌ده‌سدانه‌و چه‌نه‌ها جوور ناخوه‌شى و ناكووكى له‌لى كه‌فێده‌و، ك گشتیشى له‌ نه‌فامى و بى باوه‌ڕیه‌و دروس بوود، ئه‌گه‌ر ئاده‌میزاد خوه‌ى له‌لى مقه‌یه‌ت نه‌كاو چاره‌سه‌رى نه‌كا، ئه‌وه‌ بیگومان ریشگ له‌ ده‌روین و كه‌سایه‌تى و ئاسوده‌یى كوتن.

فره‌ ئه‌ڵڵاجه‌ویه‌ ك زوورم مه‌ردم حه‌سویدى وه‌ كه‌سه‌یل تر به‌ن و قسمه‌ت خودایى له‌ هویریان نه‌مه‌ندگه‌و باوه‌ڕیان وه‌پى نه‌مه‌ندگه‌و هویر له‌وه‌ ناكه‌ن ك خوه‌یان چه‌ دیرن و مه‌ردم نه‌یرنه‌ى؟ ته‌نیا هانه‌ هویر ئه‌وه‌ ك خوه‌یان ئه‌و چشته‌یله‌ نه‌یرن ك كه‌سه‌یلیگ تر دیرنه‌ى.

كه‌م كه‌س ته‌ماشاى خوار خوه‌ى ئه‌كا، بگر وه‌ یه‌یشه‌و رازى نیه‌ون، به‌ڵكوو ئى گریه‌ى ده‌روینیه‌ پاڵ وه‌پیانه‌و ئه‌ناد ئه‌را دوشمنایه‌تیكردن و زه‌ره‌دداین ئه‌و كه‌سه‌ ك حه‌سویدى وه‌پى بریاگه‌. ئمجا وه‌ یه‌یش شیرازه‌ى كوومه‌ڵگا وه‌ره‌و شیویان چوود.

هویچ كه‌سیگ نیه‌كریه‌ێد بووده‌ كۆپى كه‌سیگ تر، ئاده‌میزاد بایه‌د دویر له‌لى بفامیدو بزانید ك هویچ له‌و  چشته‌یله‌ تا سه‌ر نییه‌.

جووره‌یل حه‌سویدى فره‌ن، له‌وانه‌یش: حه‌سویدى بردن وه‌ پویل و موڵك و جنگ و ئۆتۆمۆبیل و دوكان و ماڵ و كه‌لپه‌ل ....و جوور تریش هه‌س ك حه‌سویدى بردنه‌ له‌ جوانى، زانین، توانا، هه‌ڵكه‌فته‌یى، ده‌سه‌ڵات، پله‌وپایه‌، باوه‌ڕنامه‌، به‌هره‌ى جووراو جوور، هویر و شیواز ژیان...هتد.

ئمجا ئیمه‌ شایه‌ت فره‌یگ له‌لیمان كه‌م تا فره‌ به‌شیگ له‌ ده‌رد و به‌ڵاى ده‌روینى داشتویم و سه‌عاتیگ ته‌ماشاى خوه‌مان نه‌كردیمنه‌و نه‌زانستیمنه‌ ك كوشك ئاسووده‌یى ده‌روینمان وه‌ره‌و رمیان چوود.

هه‌ر له‌وه‌ر ئه‌وه‌یش وجوود ئى جووره‌ باوه‌ت و نویساننه‌یلیگ ئه‌را مه‌ردم كوومه‌ڵگا وه‌ گرنگ و ئه‌همیه‌تدار زانیم و له‌هه‌مان وه‌خت قانجاز وه‌ كه‌سه‌یل فره‌یگیش ره‌سنێد و هه‌وه‌جه‌ وه‌ ئه‌وه‌یش دیریم ماناى ئاسووده‌یى راسكانى بزانیم، ك هه‌رچه‌نى له‌ كه‌سیگه‌و ئه‌را كه‌سیگ تر ئى گوزارشه‌ جیاوازى دیرید، وه‌لى ئى جووره‌ باوه‌ته‌یلیگ  بیلا ده‌روازه‌یگ بوود ئه‌را نویسه‌ره‌یل تر رووشنهویر ك ئاماژه‌ت وه‌ گشت ده‌رده‌یل كوومه‌ڵایه‌تى بكه‌ن ك كاریگه‌رى خاسیگ دیرید له‌ ئاینده‌.

ئامینه‌ خان


ج. ا