ئه‌راى چه‌ حه‌ز كه‌م ئه‌ردوگان بووه‌یده‌و؟

شفق نيوز

حكوومه‌تیگ نوو، و فره‌ له‌ چاودێره‌یل سیاسى پیشبینى (توقع) ئه‌وه‌ كه‌ن ك پارت داد و په‌ره‌وه‌پیداین، وه‌ سه‌رۆكایه‌تى سه‌رۆك وه‌زیره‌یل حازرى ڕه‌جه‌ب ته‌یب ئه‌ردۆگان بتویه‌نى ئیجاریشه‌ له‌ى هه‌ڵوژاردنه‌یله‌ بووه‌یده‌و. ومنیش له‌یرا ئویشم خوه‌زه‌و ئى پیشبینیه‌ بایده‌ دى و جاریگتر ئه‌ردۆگان بووه‌یده‌و و بووده‌ سه‌رۆك وه‌زیره‌یل توركیا وه‌بى ڕكابه‌ر. شایه‌ت فره‌ كه‌س بپرسى ئه‌ى تو چ په‌یوه‌ندییگ وه‌ ئه‌ردۆگانه‌و دیرید یا چ به‌رژه‌وه‌ندییگ ها له‌ سه‌ركه‌فتن ئه‌ردۆگان؟

به‌ڵى، حه‌ز كردن من له‌وه‌ر ئه‌وه‌ نیه‌ ك ئى پیاوه‌ یه‌كیگه‌ له‌ گرنگترین و كاراترین پیاوه‌یل سیاسه‌ت و ئابوورى له‌ توركیا ك له‌ ماوه‌ى ئى 10 ساڵ گوزه‌یشته‌ كاریگ كردیه‌ ك وه‌ وه‌رچه‌رخانیگ تاریخى له‌ ژیان ئى وڵاته‌ دریه‌یده‌ قه‌ڵه‌م له‌ هه‌ردوگ لایه‌ن سیاسى و ئابوورى و تویه‌نست توركیا له‌ وڵاتیگ پڕ له‌ قه‌یران ئابوورى و كووده‌تایه‌یل سه‌ربازى بكاده‌ یه‌كیگ له‌ بازیكه‌ره‌یل سه‌ركى له‌ مه‌یدان سیاسى و ئابوورى له‌ ناوچه‌ى ڕووژهه‌ڵات ناوڕاس و له‌ى ماوه‌ وه‌گووره‌ى ڕاپۆرته‌یل پسپۆره‌یل ئابووریناس داهات هه‌ر هاوڵاتى توركى په‌نج قات زیاى كردیه‌ و سه‌قامگیرى وه‌رچه‌ویگ داشتیه‌ و له‌روى قه‌یران دارایى جه‌هانى وه‌رگرى كردیه‌و وه‌ بى زه‌ره‌د له‌لى خوه‌ى پاراستیه‌... له‌وه‌ر ئه‌وه‌یشه‌ نیه‌ ك ئى پیاوه‌ تویه‌نستیه‌ توركیا وه‌ پارتیگ ئسلامى میانڕه‌و له‌ وڵاتیگ علمانى بووه‌یده‌ ڕییه‌و ولقاو جه‌نه‌ڕایل سه‌ربازى بگریده‌ ده‌س و جڵه‌و ئه‌و ئه‌سپ پڕ هه‌یه‌جانه‌ تون بگرید و جویله‌ى بووڕید و ئه‌و سه‌رده‌مه‌ له‌ ناوبووه‌ید ك جه‌نه‌ڕاڵه‌یل سیاسه‌تمه‌داره‌یل كۆنترۆڵ كردیان و تا ڕاده‌یگ له‌شكر له‌ سه‌نگه‌ره‌یل خوه‌ى وسان... له‌وه‌ر ئه‌وه‌یشه‌ نیه‌ ك ئه‌زموون دیموكراتى توركیا جوور وڵاتیگ موسڵمان كرده‌ نموونه‌یگ له‌ وه‌رانوه‌ر نموونه‌یل نه‌رێنى یا سلبى وڵاته‌یلیگتر ك وه‌ ناو ئسلامه‌و حوكمڕانى كه‌ن جوور تاڵه‌بان له‌ ئه‌فغانستان و ئه‌زموون سۆماڵ و ڕژیمه‌یل دیكتاتۆرى ناوچه‌گه‌ى ك ئسلام كردنه‌سه‌ په‌رده‌یگ له‌ پشتیه‌و كاره‌یل ناڕه‌واى خوه‌یان ئه‌نجامده‌ن... له‌وه‌ر ئه‌وه‌یشه‌ نیه‌ ك ئى پیاوه‌ تویه‌نست وه‌ كاروان كه‌شتى ئازادى ئه‌را غه‌زه‌ ختى متى هه‌ست و شعوور مه‌ردم ناوچه‌گه‌ بیه‌ید و ئه‌وه‌ له‌ خه‌یاڵیان خوه‌ش بكا ك (پاڵه‌وانیگ تر له‌ ناوچه‌گه‌ هه‌س ك تویه‌نید ڕوى وه‌ڕوى ملهوڕى و زووردارى و سه‌رسه‌ختى ئسرائیل بوود)...

به‌ڵى له‌وه‌ر ئه‌وه‌یشه‌ نیه‌ ك ئى پیاوه‌ له‌ ناو جه‌رگه‌ى مه‌ردم هه‌ژار و نه‌داره‌و سه‌رهه‌ڵدایه‌ و له‌ باوگیگ په‌یا بویه‌ له‌ ده‌ریاى سیه‌ كه‌شتیوانى كردیه‌ و له‌ مناڵیه‌و ئه‌را ئسته‌نبوول كووچ كردیه‌ و له‌ نان فرووشى و شه‌ربه‌ت فرووشى كار كردیه‌ تا خه‌رجى خوه‌نینى له‌ مه‌دره‌سه‌ى دینى بووه‌یده‌ه‌و ڕى و له‌ گه‌ڕه‌كیگ له‌ ئه‌سته‌نبوول ژیایه‌ ك پڕ بویه‌ له‌و ده‌یشته‌كیه‌یله‌ ك ئه‌را مینه‌ى كاركردن هاتنه‌ ئه‌را شار... له‌وه‌ر ئه‌وه‌یشه‌ نیه‌ ك من دووس بازیكه‌ره‌یل تووپان دیرم و ئى پیاوه‌ وه‌رزشوانیگ بویه‌ و جنگ تووپان پووشایه‌ وبازى كردیه‌ و نیمچه‌ پرۆفیشناڵیگ بویه‌ له‌ى بازیه‌ له‌ وه‌خت جایڵ جوانى...

شایه‌ت بپرسین ئه‌ى دى له‌وه‌ر چه‌ تو ئه‌وه‌نه‌ حه‌ز ئه‌كا ك ئى پیاوه‌ دوباره‌ بووده‌ سه‌رۆك وه‌زیره‌یل توركیا؟

به‌ڵى ئه‌زیزه‌یل ئمڕوو 51 میلیۆن كه‌س له‌ توركیا چن ئه‌را سه‌ندووقه‌یل ده‌نگداین ئه‌را ڕه‌سمكردن سیماى سیاسه‌ت وڵاته‌گه‌یان له‌ چوار ساڵ ئاینده‌ و له‌ 199 هه‌زار بنكه‌ى ده‌نگداین له‌ هه‌فت شه‌وه‌كى تا په‌نج ئیواره‌ وه‌ به‌شدارى كردن 15 پارت سیاسى وه‌ 7492 كاندید و 203 كاندید بیلایه‌نه‌و له‌بان 550 كورسى له‌ په‌رله‌مان توركیا ركابه‌رى كه‌ن و پیشبینى ئه‌وه‌ كریه‌ید ك پارت داد و په‌ره‌پیداین وه‌سه‌رۆكایه‌تى ئه‌ردۆگان 367 كورسى بووه‌یده‌وه‌ و ئه‌گه‌ریش وه‌ى جووره‌ بوود، یه‌ مه‌عناى ئه‌وه‌سه‌ ك زیاتر له‌ دوكوت كورسیه‌یل به‌یده‌وه‌و و دى تویه‌نید ده‌ستوور ساڵ 1982 هامار یا ته‌عدیل بكا وه‌بى ڕاپرسى جه‌ماوه‌ر توركیا... ئه‌گه‌ر ئه‌وه‌ بخه‌یمنه‌ هویر ك ئه‌ردۆگان قه‌وڵ ئه‌وه‌ داس ك ده‌ستوور نوو له‌ بان بنه‌مایه‌یل دیموكراتى و فره‌یى بنیات نریاس ك توركیا له‌ پێوه‌ر یا معیاره‌یل یه‌كێتى ئۆروپا نزیكه‌و ئه‌كا و مه‌سه‌له‌ى چوین توركیا ئه‌را ڕزه‌یل یه‌كێتى ئۆروپا ك خه‌و چه‌ن ساڵه‌ بوى، تیه‌ریده‌ دى ... و یه‌یشه‌ دو مه‌نفه‌عه‌ت گه‌ورا وه‌ ئیمه‌ى كورد دیرى: یه‌كمیان ئه‌وه‌سه‌ ك به‌شه‌ گه‌وراگه‌ى ملله‌ت كورد له‌ باكوور كوردستان (كوردستان توركیا) ڕه‌سنه‌ زوورمى هه‌قه‌یل نه‌ته‌وه‌یى خوه‌یان و خوین و خه‌بات ده‌یان ساڵه‌یان سه‌مه‌ر گرید و به‌شیگتر له‌ كوردستان هه‌ناس كیشید و وه‌ ئازادى  ژیه‌ید ك بووده‌ هانده‌ریگ ئه‌را ئه‌و به‌شه‌یلتر كوردستان ك ئه‌وانیش داواى هه‌قه‌یل ڕه‌واى خوه‌یان بكه‌ن و پشت وپه‌ناى خاسیگ داشتوون... دویم مه‌نفه‌عه‌تمانیش ئه‌وه‌سه‌، وه‌ختى له‌ ئاینده‌یگ (ئنشاڵڵا) نزیك توركیا بووده‌ به‌شیگ له‌ یه‌كێتى ئۆروپا، سنوور هه‌رێم كوردستانیش بووده‌ هاوسنوور یه‌كێتى ئۆروپا و جه‌هان پیشكه‌فتن و دیموكراسى و ماف ئاده‌میزاد و كوردستان بووده‌ ده‌روازه‌یگ واز ئه‌را گشت ناوچه‌یل عیراق و ئه‌و دوبه‌شه‌گه‌ى كوردستان و ئى ناوچه‌ گۆڕانكارى گه‌ورایگ وه‌خوه‌یانه‌و دوینن ك هاله‌ به‌رژه‌وه‌ندى گشت لایگ .... ئه‌وه‌ مه‌نیه‌ بپرسم ئایا هه‌قمه‌ ئه‌گه‌ر خوه‌شى بكه‌م ئه‌ردۆگان بووه‌یده‌و تا من فره‌ گه‌شبین یا متفائلم؟!!!

ن: ماجد سوره‌میرى