به‌شدارن له‌ حكوومه‌ت یا ئۆپۆزیسیۆنیگن جوور به‌ندووڵ

شفق نيوز

هه‌ڕه‌شه‌ بیه‌یده‌ ئۆپه‌راسیۆن سیاسى وه‌گشتى و له‌ى دویاخریشه‌ قسه‌یل چه‌ن كاروه‌ده‌سیگ حكوومى له‌مه‌یدانه‌گه‌ زاڵه‌و بویه‌؛ ك ڕه‌خنه‌گرن له‌ هاوبه‌شه‌یلیان له‌ بڕیار و ڕه‌سمكردن سیاسه‌ت حكوومى، هه‌مان ئى لایه‌نه‌یلیشه‌ ناوه‌ناویگ هه‌ڕه‌شه‌ى خودكیشان ده‌ن له‌ ئۆپه‌راسیۆنه‌گه‌ و په‌نابردن ئه‌را مانگرتن و خودنیشانداین جوور فشارخستنیگ له‌سه‌ر لایه‌نه‌یلیگتر ك مه‌هانه‌گ ئه‌را ئه‌وه‌ نیه‌ویننه‌و ك هاوبه‌شه‌یل سیاسییان ئى جووره‌ هه‌ڵوێسته‌یل خوار و بانه‌ داشتوون.

ئه‌ندامیگ له‌ ئئتلاف ده‌وڵه‌ت قانوون له‌بان ئه‌وه‌ جه‌ختكرد ك بڕیگ له‌ى هێزه‌یل سیاسیه‌ بایه‌ته‌ كار خوه‌یان یه‌كلاوه‌ بكه‌ن له‌ به‌شداریكردن له‌ حكوومه‌ت، نه‌ك پایگیان له‌ ناو حكوومه‌ت بوود و ئه‌و پاگه‌یان له‌ ناو ئۆپۆزیسیۆن.

له‌ى باوه‌ته‌ عه‌دنان سه‌راج له‌ په‌یوه‌ندییگى وه‌ل شه‌فه‌ق وت:"ئه‌زموون دیموكراتى نوو له‌ عیراق هێزه‌یلیگ له‌لى كه‌فته‌و ك وه‌ختى ده‌سكه‌فت وه‌ده‌سى نه‌كه‌فى چووده‌ ڕیز ئۆپۆزیسیۆن و له‌هه‌مان وه‌ختیش به‌شیگه‌ له‌ حكوومه‌ت".

سه‌راج زیاتریش وت:"من هامه‌ بان ئه‌و باوه‌ڕه‌ ك ئۆپه‌راسیۆن سیاسى وه‌شیوه‌یگ گشتى هه‌وه‌جه‌ى ها ئه‌وه‌ ك دوباره‌ هه‌ڵسه‌نگاندن یا ته‌قییم بكریه‌ید، چوینكه‌ وجوود ئۆپۆزیسیۆن له‌وه‌رانوه‌ر حكوومه‌ت كار گرنگیگه‌ له‌ دیموكراسى". وتیش:"ئه‌وه‌گ پشتڕاس ئه‌و قسه‌مانه‌ كه‌ید ك بڕیگ هێز سیاسى ئامانجیان گیرهاوردن ده‌سكه‌فته‌ و ئاكامه‌گه‌یشى ئه‌وه‌سه‌ ئى لایه‌نه‌یله‌ به‌شبه‌شه‌و بوون و ململانێ كه‌فتیه‌سه‌ ناوبه‌ینیان له‌بان ئه‌و ده‌سكه‌فته‌یله‌؛ چوینكه‌ بڕیگیان هویچ وه‌ده‌سى نه‌كه‌فتیه‌ و بڕیگتر فره‌چشت گیرهاوردیه‌".

له‌لاى خوه‌یه‌و چالاكوان و شیه‌وكه‌ریگ سیاسى وت:"زوورمى سیاسه‌تمه‌داره‌یل نه‌خش و ده‌وریگ دیارى نه‌یاشتن له‌ حكوومه‌ت و له‌ ئۆپۆزیسیۆن چوینكه‌ خاوه‌ن پرنسیپ یا (مبدأ) نین ك چشتیگ گرنگه‌ ئه‌را سیاسه‌تمه‌داره‌یل له‌ ناو فراكسیۆن و لایه‌نه‌یل خوه‌یان و له‌ ئۆپه‌راسیۆن سیاسى".

زیا شه‌كه‌رچى له‌ په‌یوه‌ندییگى وه‌ل شه‌فه‌ق له‌ى باوه‌ته‌ ئویشى:"كار ئه‌ڵاجه‌وى ها له‌ورا ك فراكسیۆنه‌یلیگ هه‌س چه‌ن ڕه‌وتیگ هاتیان هاودژ یه‌كترن له‌ ڕا و ئه‌راى چوینه‌یلیان، وه‌لى ئه‌گه‌ر ئى فراكسیۆنه‌یله‌ له‌ سه‌ر بنه‌مایگ هاوبه‌ش و دیارى گرده‌وبیاتان ئى دیارده‌ روى نه‌یاد، و ئه‌گه‌ر وه‌ بنه‌مایه‌یل سه‌ره‌كى پابه‌ند بیاتان وله‌لى نه‌یانه‌ لا ، ئۆپه‌راسیۆن سیاسى له‌ ڕیگه‌ى راس و دروس خوه‌ى رى كردیاد".

شه‌كه‌رچى هووكار ئى هه‌ڵوێسته‌یل سیاسیه‌ ئه‌را چه‌ن خاڵیگ به‌یده‌وه‌ و ئویشید:"ئى هه‌ڵوێسته‌یله‌ شایه‌ت لاوازى یا زوعف هوشیارى سیاسى سیاسه‌تمه‌داره‌یل و نه‌وین به‌رنامه‌یگ دیاریكراى هاوبه‌ش ئاشكرا بكه‌ید ، یا ئه‌وه‌سه‌ ك قه‌یرانیگ هه‌س له‌ بنه‌مایه‌یلیان له‌ پابه‌ندنه‌وین وه‌ خاڵه‌یل هاوبه‌ش و نه‌گۆڕ".

له‌لاى خوه‌یه‌و عه‌بدولمه‌هدى خه‌فاجى نوێنه‌ر ئئتلاف ده‌وڵه‌ت قانوون زویتر گوزارش له‌ ئه‌ڵاجه‌وى هاتن خوه‌ى كرد له‌وه‌گ بڕیگ فراكسیۆن سیاسى ئاشكراى كردن ك نیاز ئه‌وه‌ دیرن حكوومه‌ت سایه‌یگ دامه‌رزنن، و له‌هه‌مان وه‌خت خوه‌یان به‌شدارن له‌ حكوومه‌ت حازرى، و ئه‌وه‌یشه‌ پرسى ك ئه‌گه‌ر ئى لایه‌نه‌یله‌ حه‌ز كه‌ن ئۆپۆزیسیۆنیگ په‌رله‌مانى دامه‌رزنن ئه‌را ئه‌و كاره‌یله‌ ك خزمه‌ت وه‌ ملله‌ت ڕه‌سنن، ئیمه‌یش له‌ ده‌وڵه‌ت قانوون هایمن وه‌لیانا و پشتگیرى له‌لیان كه‌یمن.

خه‌فاجى زیاتریش وت:"ئئتلاف ده‌وڵه‌ت قانوون یه‌كم نه‌یار هه‌ر له‌ق بوین یا خه‌له‌لیگه‌ له‌ كار حكوومه‌ت و پشتگیرى له‌ گشت وه‌زیره‌یل كه‌ید چ له‌ "هاوپه‌یمانى نیشتمانى" بوود یا له‌ "عیراقیه‌". و له‌بان ئه‌وه‌یشه‌ جه‌ختكرد ك:"ئه‌را هویچ لایه‌نیگ نیه‌ ك حكوومه‌ت سایه‌ دامه‌رزنید و له‌هه‌مان وه‌خت به‌شدار بوود له‌ حكوومه‌ت حازرى؛ چوینكه‌ یه‌ حكوومه‌ت خوه‌یه‌، و ئه‌گه‌ر بتواید حكوومه‌ت سایه‌ دامه‌رزنید بایه‌ته‌ یه‌كم جار له‌ى حكوومه‌ته‌ خوه‌ى بكیشیده‌وه‌ تا حكوومه‌ت سایه‌یگ دامه‌رزید ئه‌را چاودێرى كردنى.

له‌لاى خوه‌یه‌و محه‌مه‌د سه‌عدون سه‌یهود نوێنه‌ر ئئتلاف ده‌وڵه‌ت قانوون ڕه‌خنه‌ یا ئنتقاد له‌و لایه‌نه‌یل سیاسیه‌ گرد ك قسه‌ وه‌حكوومه‌ت كه‌ن و له‌هه‌مان وه‌خت خوه‌یان به‌شیگن له‌تى. و وت:"بڕیگ سیاسه‌تمه‌دار پایگیان هاناو حكوومه‌ت و ئه‌و پاگه‌یان ها ناو ئۆپۆزیسیۆن هه‌رچه‌نى پۆسته‌یل باڵایگیش وه‌رگردنه‌ و فره‌ له‌لیان وه‌گووره‌ى به‌رژه‌وه‌ندى تایبه‌ت خوه‌یان كار كه‌ن و ئه‌جندایگ ده‌ره‌كى كار كه‌ن، له‌وه‌ر ئه‌وه‌ هویچ ئه‌ڵاجه‌وى نیه‌ ك بوینیده‌یان له‌كه‌ناڵه‌یل ڕه‌سانن دژ وه‌حكوومه‌ت سه‌رۆكه‌گه‌ى قسه‌ بكه‌ن".

سه‌یهود زیاتریش وت:"ئه‌یانه‌ هه‌لپه‌رست یا(ئنتهازى)ین، چوینكه‌ وه‌ختى حكوومه‌ت ده‌سكه‌فت و شاكاریگ ئه‌نجام بیه‌ید، كه‌نه‌ى هن خوه‌یان چوینكه‌ به‌شیگن له‌لى، وه‌لى وه‌ختى حكوومه‌ت له‌ لایه‌نیگ دیاریكریاى سه‌رنه‌كه‌فى؛ ئویشن تاوان سه‌رۆك حكوومه‌ته‌ و هه‌وڵ ده‌ن ئه‌را ڕاى گشتى جوور خزمه‌تكار ملله‌ت خوه‌یان نیشان بیه‌ن، وه‌لى ئه‌یانه‌ وه‌ئه‌وه‌زى و پیچه‌وانه‌ى قسه‌یلیانن". وه‌گووره‌ى قسه‌یلى