كورد فه‌یلی، سته‌م وه‌رده‌وامه‌...

شفق نيوز

لیستێگ كوردی یا كوردستانی، له‌ هه‌ڵوژاردنه‌یل په‌رله‌مانی، ته‌نیا كورسییگ له‌و ناوچه‌یله‌ ناده‌نه‌ پیان؟ تۆ بویشی كورد فه‌یلی، ئنتیمای مه‌زهه‌بییان، له‌ ئنتیمای نه‌ته‌وه‌ییان وه‌هێزتر بوود؟ وه‌ڕای من جوواو ئی پرسیاره‌یله‌ یه‌سه‌‌:

تا‌ ده‌سته‌واژه‌ی (كورد فه‌یلی) ژنه‌فیم، چه‌ن خاڵێگ فره‌ گرنگ ئه‌یه‌یده‌‌ زه‌ینمان، یه‌كه‌م فره‌تر كورده‌یل فه‌یلی‌ شیعه‌ مه‌زهه‌بن، دویه‌م: له‌و زوڵم و سته‌مه‌ ك‌ رژیم به‌عس وه‌ دریژایی زیاتر له‌ 30 ساڵ حوكمڕانی ده‌رهه‌ق وه‌ ملله‌ته‌یل عێراق ئه‌نجامی دا، كورد فه‌یلی فره‌ترین به‌ش كه‌فته‌ پی، له‌لایگه‌‌و‌ وه‌خاتر كوردبوین و له‌لایگ تره‌و‌ وه‌خاتر شیعه‌بوین، له‌یباره‌و‌ زوڵمه‌گه‌ ڕه‌سیه‌ راده‌یگ ك بێجگه‌ له‌ كوشتن و له‌سێداره‌داین و زندان و شكه‌نجه‌داین وه‌جه‌م و ته‌عریب و ته‌رحیل، به‌شێگ فره‌یان ره‌گه‌زنامه‌ی عێراقی له‌لێان سه‌نریا‌وه‌، له‌ ساڵه‌یل ده‌یه‌ی هه‌یشتا به‌راورد وه‌ تویژه‌یل تر كومه‌ڵگا‌ی عێراقی ئه‌ووه‌خته‌، فره‌تر كورده‌یل فه‌یلی له‌ زندانه‌یل به‌عس بوین، وه‌ هه‌زاران ژن و دویه‌ت كورد فه‌یلی، له‌ زندان فزه‌یلییه‌ رویوه‌ڕوی گه‌و‌راترین سووكایه‌تی وه‌پێكردن بوینه‌و‌، یه‌كیگ له‌ فراوانترین ئه‌و ناوچه‌یل كوردییه‌ ك كه‌فنته‌ وه‌ر په‌لامار ته‌عریب و، ئیسه‌ و ئه‌وسا نه‌هاتنه‌و‌ ئه‌ڕا بان نه‌خشه‌ی هه‌رێم كوردستان، ناوچه‌یل كورده‌یل فه‌یلی بوی، خاڵ سێیه‌م ك‌ وه‌ل هاوردن ناو (كورد فه‌یلی) تیه‌ێده‌ خه‌یاڵمان، زرنگی و توانایی كورد فه‌یلییه‌، له‌ بوار بازرگانی، هه‌ركه‌س له‌ ساڵه‌یل ده‌یه‌ی حه‌فتا و هه‌شتا گوزه‌رێگ وه‌ناو شار به‌غدا و شاره‌یل تر باشوور و ناوڕاس عێراق كردوید، خاس ئی راسییه‌ فامستیاد، ئه‌و قسه‌‌ زیایه‌‌ڕه‌وی نه‌وی ك‌ ئه‌وتریا: فه‌یلییه‌یل جویله‌ی بازرگانی به‌غدا كۆنترۆڵ كردنه‌، بێجگه‌ گشت یانه‌یش وه‌ هه‌زاران كوڕ و دویه‌ت ئازای كورد فه‌یلی له‌ رز پێشمه‌رگه‌یل و رێكخستنه‌یل پارتی و یه‌كیه‌تی و حزب شیوعی شه‌هید بوین و بڕێگیان بوینه‌سه‌ سیمبول، سه‌ركرده‌یل وه‌توانا و دیار فه‌یلی له‌ دامه‌زرنه‌ره‌یل حزبه‌یل گه‌ورای كوردستانن و له‌ پیاوه‌یل ده‌وڵه‌ت وه‌رین عێراق و ئه‌كادیمییه‌یل ناسریاێ بوین.

وه‌لی ئیسه‌ له‌ شوون ئی هه‌مگه‌ی زوڵم و سته‌مه‌گ له‌لییان كریا، دویای ئه‌و رۆڵ‌ گه‌ورا ك له‌ رووژه‌یل سه‌خت داشتنه‌ی، ئمڕوو كورد فه‌یلی هانه‌ كووره‌ی ئی كومه‌ڵگای‌ نوو سه‌رده‌م ئازادی كوردستانه‌ و پێگه‌یان چه‌س‌؟ ئه‌رێ وه‌ڕاس له‌ناو سه‌ركردایه‌تی و مه‌كته‌ب سیاسی پارتی و یه‌كیه‌تی، به‌ش كورد فه‌یلی چه‌نیگه‌؟ ئه‌گه‌ر بوونیش!! چه‌ ئه‌را مه‌ردم و ناوچه‌یل خوه‌یان كردنه‌؟ ته‌نانه‌ت له‌ هه‌ڵسڕیاگه‌یل باڵا و ناوڕاس و خوارگ جمشت گۆڕانیش چه‌ن كورد فه‌یلی هه‌ن؟ ئه‌ی له‌ په‌رله‌مان كوردستان، چه‌ن ئه‌ندام دیرن‌؟ له‌ كابینه‌ی ئیسه‌ی حكوومه‌ت هه‌رێم كوردستان، چه‌ن وه‌زیر فه‌یلی، چه‌ن وه‌ڕێه‌و‌به‌ر گشتی فه‌یلی و چه‌ن و چه‌ن وه‌رپرس فه‌یلی هه‌ن؟ له‌‌ گشت ئه‌وانه‌ گرنگتر، ئیمه‌ ئویشیمن كورد فه‌یلی له‌ بازرگانی پسپۆرن، وه‌‌ڕاس له‌ی هه‌مگه‌ جویله‌ی فراوان بازرگانی كوردستانه‌، له‌ هه‌ولێر و سلێمانی و دهۆك، له‌ی هه‌مگه‌ی ملیار دۆلاره‌گ له‌ كوردستان تیه‌ێد و‌ چوود، له‌ی هه‌مگه‌ پرۆژه‌یل گه‌ورای كوردستانه‌، به‌ش كورد فه‌یلی هاكوو؟ مه‌ردمێگ له‌وپه‌ڕ دنیاوه‌ تیه‌ن له‌ هه‌ولێر و سلێمانی وه‌به‌رهاوردن كه‌ن و ئه‌ڕایان ئاسانه‌، تۆ بویشی كوردێگ فه‌یلی نه‌ود هویر له‌ پرۆژه‌یگ گه‌ورا له‌ی شاره‌یله‌ بكاده‌و‌؟ ئه‌ی هه‌زاران كۆمپانیا له‌ی شاره‌یل كوردستانه‌، كه‌سابه‌ت وه‌ خه‌ێر و به‌ێریه‌و‌ ‌كه‌ن، خاون چه‌نیگیان كورد فه‌یلین؟ ئه‌گه‌ر هویر له‌ جوواو ئی پرسیاره‌یله‌ بكه‌یمنه‌و‌، ئه‌وسا ‌زانیمن ئه‌راچه‌ له‌و به‌غدا‌ ك‌ گوایا‌ یه‌ك ملیۆن كورد فه‌یلی هاتێ‌، لیست كوردستانی هویچ وه‌ هویچ ناكا، ئاخر هس ئه‌كریه‌ێ، به‌شێگ له‌و سته‌مه‌ ك له‌ سه‌رده‌م به‌عس له‌ كورد فه‌یلی ئه‌كریا، تا ئیسه‌یش وه‌رده‌وامه‌، وه‌داخه‌و‌ حزبه‌ ئسلامییه‌ شیعه‌ عه‌ره‌به‌گان، فره‌ وه‌ جوانی كار له‌بان (شیعه‌بوین) كورد فه‌یلی كردنه‌، وه‌لی حزبه‌یل كوردی خوه‌مان، له‌ وه‌رانوه‌ر كار له‌بان (كوردبوین)ی فه‌یلییه‌گان نه‌كردنه‌، له‌ بارودوخ ئیسه ‌كورد فه‌یلی ئه‌گه‌ر جوور (شیعه‌) هویره‌و بكا‌ ها له‌ ده‌سه‌ڵات‌ و هاووڵاتییگ پله‌ یه‌ك عێراقه‌، وه‌لی ئه‌گه‌ر جوور (كورد) هویره‌و بكا‌، له‌ بوود هه‌ردو جه‌ژنه‌گه، له‌ولاوه‌ مالكی ئه‌كاده‌ی‌ پله‌ دو و له‌یلایشه‌و له‌ پله‌ دو خوارتر بوود، ئه‌وه‌ كار سه‌ركردایه‌تی كوردستانه‌، ئی هاوكێشه‌‌ له‌لای كورد فه‌یلی چه‌واشه‌ بكاده‌و‌.

به‌رهه‌م عه‌لی
ا. ج