جه‌نگ جه‌هانى سێیه‌م و ده‌روازه‌ى عراقى

شفق نيوز

 

بار عراق به‌ڵگه‌ى ئى مه‌سه‌له‌سه‌، جى داخه‌ ك دوینید چینه‌یلیگ هه‌ن له‌بان سه‌خته‌وكردن قه‌یران و په‌ره‌داین وه‌ تون وتیژى ژیه‌ن و هه‌وڵ ئه‌وه‌ ده‌ن وه‌گشت شیواز و گشت توانایگیان مه‌ندنه‌وه‌ى خوه‌یان بچه‌سپنن له‌بان هساو به‌رژه‌وه‌ندى نیشتمان و هاووڵاتى، وه‌لى نوڕید مه‌ردمانیگ تر هه‌ن قين له‌لیان گرنه‌ دڵ و وه‌رپرسیارێتى رویداگ و بار خراو جوور ناهميكردن و مه‌ویسى مه‌ردم خه‌نه‌ بانیان.

به‌ڵى كه‌سه‌یلیگ هه‌ن وه‌رده‌وام ئدانه‌ى پشتگیرى تاوان و تون وتیژى كه‌ن وه‌ هه‌ر جووریگ و له‌ هه‌ر لایه‌نیگ ، چوینكه‌ تاوان هه‌ر تاوانه‌و هویچ ئایین و مه‌زه‌ویگ یا ریڕه‌ویگ فكرى دگان وه‌ تاوان نانه‌ید و پشتگیرى له‌لى ناكا.

عراق بویه‌سه‌ شوون گه‌وراى له‌خوه‌یگرتن ترۆریست و بكوشه‌یل و بيجگه‌ يه‌يش ك روى وه‌ر فراوانیگه‌ ئه‌را قوربانیه‌یل بیتاوان، ئنجا ئیمه‌ى كورد فه‌یلى سته‌مدیده‌ له‌ى دویاخره‌ دقه‌ت زیایبوین فریه‌یگ كردیم له‌ شماره‌ى قوربانیه‌یل و زوڵملیكریاگه‌یل، ك ئه‌ویش له‌ئاكام ئه‌و حاڵه‌ته‌یل مه‌ویسیه‌ ك رووژانه‌ له‌تى ژیه‌یم و له‌ساى خودپاكانه‌كردن وه‌رپرسه‌یل ناوه‌رپرس له‌باوه‌ت خراوى بار ئاسایش، دى نازانیم ئى ده‌سپیچگ و مه‌هانه‌یلیانه‌ كه‌ى ته‌واو بوودو كه‌ى دگان وه‌ دریغیكردن ئاشكراى خوه‌یان نه‌ن وه‌ل شكه‌ستیان له‌ ئداره‌ى قه‌یرانه‌یل یا وه‌لاى كه‌مه‌و بتویه‌نن ئى ئاگر ئاشووه‌ بكوشننه‌و.

ئیمه‌ى فه‌یلیه‌یل وه‌ بوونه‌ى ئه‌وه‌ك مه‌ویسى و كاره‌ساته‌یل فریه‌یگ هاته‌سه‌ تویشمان وه‌دریژایى ده‌یه‌ها ساڵ گوزه‌یشت، له‌ مه‌ردمان تر فیشتر هس وه‌ خراوى ئاكامه‌یل پڕ كاره‌سات ئه‌كه‌یم و تویه‌نیم وه‌ ئاشكرا و راسى بویشیم ك هانداین مه‌سه‌له‌ى تایفه‌گه‌رى و فه‌توایه‌یل خویناوى ك پشتگیرى له‌ ناهه‌ق و زاڵم كه‌ن، ئه‌وساو ئیسه‌ هووكار سه‌ره‌كى خراوبوین بار مه‌ترسیداره‌ له‌بان ئاست هه‌رێمى ك تویه‌نیم جوور سه‌ره‌تاى جه‌نگ جه‌هانى سێیه‌م تاریفى بكه‌یم، جه‌نگیگه‌ ك موسڵمان له‌تى سه‌رناكه‌فید و ته‌نانه‌ت ئنسانیه‌تیش، ئنجا جه‌نگ وه‌ختى ده‌س وه‌پى ئه‌كا كه‌ره‌سه‌یلى وه‌ نگه‌رانى و دڵه‌ڕاوه‌كى ئاماده‌ ئه‌كا وه‌ چه‌واشه‌ى ئاشتى ك زه‌حمه‌ته‌ هه‌وه‌جه‌و كه‌ش ئارامیگ ئه‌راى دابین بوود.

عراق تویه‌نستیاد وه‌ ته‌نیا نه‌خش دیارییگ داشتوود له‌ ناوچه‌گه‌ وه‌ ئه‌وك ده‌روازه‌ى په‌یوه‌ندى ناونى جه‌هان عه‌ره‌بى و باقى ملله‌ته‌یل ناوچه‌گه‌س وه‌خاتر ئه‌وه‌ك خاوه‌ن ده‌سپیشخه‌ریه‌ له‌گشت روییگه‌و، وه‌تایبه‌ت له‌لایه‌ن مه‌زه‌وى و نه‌ته‌وه‌یى، دى ئایا له‌وه‌رچه‌ ئى ده‌روازه‌ ئاڵشت بوى ئه‌را خوسه‌و كینه‌ت و تاقیگایگ ئه‌را ئه‌زموون كینه‌ت و زوڵم و سته‌م ك له‌تاریخ بى هاوشیوه‌س؟

عه‌لى حسێن فه‌یلى

ج . أ