كى پشتگیرى له‌ كه‌ناڵه‌یل زه‌رد ئاسمانى عراقى ئه‌كا؟

شفق نيوز

مه‌ركه‌زى وه‌ خوه‌یه‌وه‌ دیه‌، ك وه‌ جووریگ وزاره‌ت ره‌سانن ئه‌ڵڵاجه‌ویى هات و شماره‌ى فره‌یگ له‌ رووژنامه‌یل كه‌فته‌وه‌و چشته‌یل خاس له‌تى نه‌مه‌ند، ته‌نانه‌ت كه‌ناڵه‌یل ئاسمانى و رادیۆ و ماڵپه‌ڕه‌یل ئه‌لكترۆنى فره‌یگ ئه‌وه‌نه‌ زیاى كردگه‌ زه‌حمه‌ته‌ بشماریه‌یگ و ڕیك بخریه‌یگ له‌ كاره‌یلیان، وه‌لى مه‌سه‌له‌گه‌ مه‌عنایگ  تر دیریگ و زیاتر مه‌ترسیداره‌، چوینكه‌ كاره‌گه‌ ئه‌وه‌سه‌ ك عه‌یب و ئه‌ڵڵاجه‌وى نیه‌ گشت ئه‌و سه‌كوه‌یل ره‌سانن یا ئعلامیه‌ زیاتره‌و بوینه‌ و هووكاره‌یلیان جووراو جووره‌، ك یه‌یش هه‌ر وجوود دیریگ له‌ژیر سایه‌ى دیموكراسى، وه‌لى ئه‌ڵڵاجه‌وى ها له‌وراو پرسیاریگ هه‌س له‌ مه‌سه‌له‌گه‌ ك بایه‌سه‌ جواوه‌و بدریه‌یگ وه‌ ته‌واوى، ك ئایا ئه‌و هووكاره‌یل ره‌ساننه‌ ئى هه‌مگه‌ ملیۆنه‌ها دۆلاره‌ له‌ كوورا تیه‌رن ئه‌را دامه‌زرانن ئى شماره‌ى فره‌ له‌ كه‌ناڵه‌یل ئاسمانیه‌ ك بڕه‌ پویل فره‌یگ توایگ و ده‌وڵه‌تیگ گرینگ نیه‌تویه‌نیگ دابینى بكاو نه‌ته‌وه‌یل یه‌كگرتگ دگان وه‌پیا بنه‌یگ؟ هه‌میشه‌ ئى پرسیاره‌ دوباره‌وه‌ كه‌یم و ئویشیم: ئه‌وانه‌ ئى بڕه‌ پویل فره‌ له‌ كوورا تیه‌رن و ده‌نه‌ى ئه‌و كه‌ناڵه‌یل و باقى هووكاره‌یل ره‌ساننه‌؟ پرسیار تر ئه‌وه‌سه‌ ك په‌یوه‌ندى دیریگ وه‌ ئامانج و به‌رژه‌وه‌ندى و ئه‌و ده‌سه‌یله‌ ك پشتگیرى له‌لیان كه‌ن و ملیۆنه‌ها پویل خه‌رج كه‌ن له‌بان ئه‌و هووكاره‌یله‌ یا كه‌ناڵه‌یله‌ ك ناو عراق هه‌ڵگرتنه‌، وه‌لى له‌ڕاسى جى وه‌جى مه‌رام ده‌سه‌یل ده‌ره‌كى كه‌ن و له‌وانه‌یش ریكخریاگه‌یل تیرۆرستى ك ئامانجیان ئه‌وه‌سه‌ كاریگه‌رى بكه‌ن بان هویروڕا یا وژدان مه‌ردم و له‌هه‌مان وه‌خت كوومه‌ڵگاى عراقى له‌یه‌كترى بچه‌كنن و بیجگه‌ ئه‌وه‌یش وه‌رده‌وامى بیه‌نه‌ گرفت و ناكووكى، ك بیگومان یه‌یش بووگه‌ وه‌ربه‌س له‌نواى سه‌قامگیرى ده‌وڵه‌ت و یه‌كڕزى ملله‌ت، له‌وه‌یش زیاتر كرده‌وه‌یگه‌ له‌وه‌ر خاتر كووچ وه‌پیكردن خاوه‌ن ئه‌قڵه‌یل پڕ زانستى و شاره‌زایه‌یل، ك یه‌یش دروسكردن زه‌مینه‌یگه‌ ئه‌را چه‌كیان و ته‌رفتوینكردن پیاوه‌یل وڵات، وه‌ى جووریشه‌ توان عراق ك وڵاتیگ ژیارى یا حزاراته‌ ئاڵشتى بكه‌ن ئه‌را ئه‌مبار گه‌ورایگ  نه‌فت و قه‌ورسان زنگه‌یل و بازاڕیگ ئه‌را كاڵاى ناپه‌سه‌ن و هاوریاگ و له‌هه‌مان وه‌خت ئه‌را وڵات ملله‌تیگ ته‌نیا بخوه‌ن و هویچ نارنه‌ به‌رهه‌م.

بیگومان له‌ناوبردن و كپه‌وكردن ئى ده‌رده‌یل پیس ره‌سانن یا ئعلامیه‌ له‌ لاشه‌ى عراقى بووده‌ یه‌كه‌م گام بنیاتناین ئه‌را عراق تازه‌و به‌تاڵ له‌گشت ئه‌و نه‌خوه‌شیه‌یله‌ ك هاته‌ تویشى وه‌ سه‌به‌ب ده‌ركه‌فتن ئى كه‌ناڵه‌یل گومانلیكریاگه‌ ك مه‌شق خراوه‌كارى كه‌ن وه‌ناو فره‌یى و ئازادى ڕاده‌رخستن.

 

 

ت: جمال ئه‌ركه‌وازی