كوومه‌ڵگاى عراقى له‌ناونى مه‌رگ تاك و به‌رهه‌مهاوردن تاكیگ هاوچه‌رخ

شفق نيوز

 

یه‌یش له‌وه‌ختیگ ئه‌گه‌ر كوومه‌ڵگاو تاك له‌پرووسه‌یگ وه‌رده‌وام بوون جوور ته‌واوكه‌ر یه‌كترى، ئه‌وه‌ خه‌و دروسكردن كوومه‌ڵگایگ خاس و چالاك له‌بان گشت ئاسته‌یل ماحاڵه‌ ئه‌گه‌ر له‌ گوزه‌یشت ئه‌و كوومه‌ڵگاو له‌پرووسه‌ى گه‌شه‌كردنى نه‌تویه‌نستوید تاكیگ هوشیار و پڕ ماریفه‌ت باریده‌ به‌رهه‌م.

له‌ى ئه‌وه‌ك تویه‌نید وه‌رده‌وام جموجویلده‌ر یه‌كه‌م بوود له‌ دروسكردن كوومه‌ڵگایگ پیشكه‌فتگ ، ئه‌وه‌ خود كه‌سیگ پیشكه‌فتگه‌ ك زوى وه‌خت له‌وه‌ر پاڵنه‌ره‌یل سروشتى و ده‌سكرد و ده‌ره‌كى و سیاسى و كوومه‌ڵایه‌تى یا له‌مه‌شقكردن ژیان و ئه‌زموونكردن ژیان وه‌رده‌وام خه‌ریك رووشنهویركردن و ره‌سانن خوه‌ى بویه‌.

ئى مه‌سه‌له‌ له‌لاى مه‌ردمانیگ خاوه‌ن ئه‌ڕاى چوین و نه‌زه‌رى جى متمانه‌سه‌و ماناگه‌یشى وه‌شیوه‌یگ تر له‌یه‌كه‌و دریه‌ید جوور ئه‌وه‌ك ئویشن" ئاده‌میزاد كوڕ ژینگه‌گه‌یه‌"، ئه‌ویش ئه‌و ژینگه‌ى كوومه‌ڵایه‌تیه‌سه‌ ك خود خیزان و كوومه‌ڵگا تویه‌نن هووكار یه‌كه‌م بنه‌ڕه‌تى بوون له‌ په‌روه‌رده‌كردن تاك له‌تى، ئنجا ئه‌گه‌ر هات و كوومه‌ڵگا له‌ڕوى پیشكه‌فتنه‌و نه‌تویه‌نیدتاكیگ باریده‌ به‌رهه‌م ك هه‌ڵگر ماریفه‌ت و دونیادیده‌ى تایبه‌ت و گه‌ورایگ بوود ئه‌را گشت چیان و ئه‌زموونكردن پشهاته‌یل ژیان، ئه‌وه‌ وه‌ چه‌واشه‌وه‌ دوینید ك هه‌ڵگر ئاره‌زوو كوومه‌ڵگایگ خاس و مۆدێرن وه‌ل بار سه‌رده‌م و جه‌هانا سته‌م و مه‌حاڵ بوود، ئنجا له‌ى دیده‌و ره‌سیمنه‌ هاوكیشه‌یگ راسى ك له‌بار یه‌كه‌م خه‌و هه‌ڵگرتن ناسنامه‌ى كوومه‌ڵگایگ مۆدێرن له‌ دید تاكیگ چالاك وه‌دى كریه‌یدو له‌بار دویه‌میش ره‌سانن تاكیگ پڕ ماریفه‌ت له‌ دڵ كوومه‌ڵگاوه‌ ده‌ركه‌فید، وه‌لى ئه‌گه‌ر ئى هاوكیشه‌ له‌هه‌ر باریگ نه‌ڕه‌سیده‌ ئه‌نجام و شكه‌ست بارید، ئه‌وه‌ خه‌و كوومه‌ڵگایگ نموونه‌یى و تاكیگ نموونه‌یى له‌بار چوودو شكه‌ست تیه‌رید.

له‌عراق وه‌گووره‌ى ئه‌وه‌ك پرووسه‌ى كوومه‌ڵگایگ نموونه‌یى له‌ وجوود نیه‌و كوومه‌ڵگایگ كز دوینریه‌ید له‌ڕوى رووشنهویرى و زانستیه‌و، ئه‌وه‌ ماناى ئه‌وه‌سه‌ ك خه‌و ره‌سانن و په‌روه‌رده‌كردن تاكیگ رووشنهویر و پڕ ماریفه‌ت له‌ناو دڵ ئى كوومه‌ڵگا مه‌حاڵ و سته‌مه‌.

له‌ كوومه‌ڵگایگ ك رووح كیشمه‌كیش ناونى نه‌وه‌یل و كیشمه‌كیش سیاسى بته‌وه‌و په‌ل كوتاسه‌ ناو جه‌سه‌ى كوومه‌ڵگاو ده‌روین تاكه‌یل، مه‌حاڵه‌ تاك رووشنهویر و پڕ زانستى باریده‌ به‌رهه‌م و یه‌یش له‌یوا ئه‌كا هویچ وه‌ختیگ كوومه‌ڵگایگ مۆدێرن و شارستانى نایده‌ به‌رهه‌م.

كوومه‌ڵگاى عراقى ك هیمان نه‌تویه‌نستگه‌ خوه‌ى قورتار بكا له‌ كیشمه‌كیش مه‌زه‌وى و سورشت كوومه‌ڵگا رووحیگ مه‌زه‌وى كریاسه‌ وه‌رى، ئه‌وه‌ بیگومان ئى فۆرمه‌ تا تیه‌ید هه‌ر فراوانتر بوود و تاكه‌یلیش ناخوازن وه‌ ئاسانى واز له‌خوه‌شه‌ویسى خوه‌یان بارن ئه‌را مه‌رجه‌ع و مه‌زه‌و تا بتویه‌نن خه‌و كوومه‌ڵگایگ تازه‌و دروس بارنه‌ به‌رهه‌م، ئى مه‌سه‌له‌یشه‌ وه‌رده‌وام بویه‌سه‌ چه‌مك كوومه‌ڵگاى عراقى و وه‌رده‌وامیش دوینیم ئه‌و تاكه‌ ك له‌ى كوومه‌ڵگا وجوود دیرید تاكیگ كز و نا دونیادیده‌سه‌و هه‌ر له‌وه‌ر ئه‌وه‌یش تواناى ئه‌وه‌ نه‌یرید وه‌و حاڵه‌وه‌ كوومه‌ڵگایگ شارستانى له‌ ره‌وڕه‌وه‌ى تاریخ دروس بكا.

ئازاد ئبراهیم

ج . أ