گفتار گه‌ورا، ره‌فتار بويچگ

شفق نيوز

ئه‌وان هه‌ڵگر ئه‌و گفته‌يل گه‌ورانه‌، وه‌لی وه‌ بوونه‌ی ته‌نگ ديده‌نی سياسيه‌و يا به‌رژه‌وه‌نديخوازی يا ده‌س له‌پشتداين نه‌ياره‌يل ئی ملله‌ته‌ بريگ له‌و حزبه‌يله‌ و جارجاريگيش كه‌سه‌يليگ ئه‌و ناوه‌نده‌يله‌ ره‌فتار ئه‌وه‌نه‌ بويچگ و نزم ئه‌نجام ئه‌يه‌ن ك نه‌ك هه‌ر له‌و ريڕه‌ و و ئامانجه‌يل سه‌ره‌كی خوه‌يانه‌ لائه‌يه‌ن ك بانگه‌واز ئه‌رای كردنه‌، به‌ڵكوو دژيشی وسيه‌ن.

ئيسه‌ كوردستان په‌يوه‌س بويه‌سه‌ جه‌نگيگ سه‌خت ناونی ريكخرياگ ترۆريستی وه‌ل جه‌هان، ك شيوه‌ی نوڕستن و مامڵه‌ی وڵاته‌يليش وه‌ل بار ئيسه‌ی هه‌رێم دو شيوه‌س، يه‌يش وه‌و مانا ك بريگ له‌ وڵاته‌يل وه‌ گه‌وراهيزه‌يليشه‌و له‌وه‌ر خاتر مقه‌يه‌تی له‌ به‌رژه‌وه‌نديه‌يليان پشتگيری له‌ سه‌قامگيری و ئاسايش كوردستان ئه‌كه‌ن و به‌شيگيش له‌ليان له‌وه‌ر مقه‌يه‌تيكردن له‌ به‌رژه‌وه‌نديه‌يل تايبه‌تيان وه‌ چه‌واشه‌وه‌ كار ئه‌را ناجيگيری و شيوانن ئه‌زموون هه‌رێم ئه‌كه‌ن.

ئی راسيه‌ ئاماژه‌يگه‌ وه‌ ئه‌وه‌ك ئمڕوو زوورم وڵاته‌يل هه‌رێمی و جه‌هانی وه‌ خاس يا خراو چه‌ويان ها بان كورستان، وه‌لی جی داخه‌ ئيمه‌ی لايه‌ن و حزبه‌يل سياسی كوردستان له‌جيای ئه‌وه‌ك فيشتر له‌ هه‌ر وه‌ختيگ تر ته‌ماشای مه‌سه‌له‌يل نيشتمانی بكه‌يم و وه‌ ئامانجيگ رووشن و يه‌كگرتگ له‌ خه‌م چاره‌نويس ئی وڵات و ملله‌ته‌ بويمن، له‌يوا وه‌ يه‌كترييه‌و خه‌ريكيم و كيشمه‌كيش وه‌ل يه‌كتری ئه‌كه‌يم خه‌ريكه‌ وه‌بی ئه‌وه‌ك هس بكه‌يم وه‌ لاڕييا بريه‌يم. ئمجا با له‌ی وه‌خته‌يل نازگه‌ ئه‌را چه‌ن سه‌عاتيگيش بويه‌ گشتلايگمان هويريگ له‌ خوه‌مان بكه‌يم و ته‌ماشا گامه‌يل گوزه‌يشت و ره‌فتاره‌يل ئيسمه‌مان بكه‌يم و له‌ خوه‌مان بپرسيم ئايا ئه‌خوازيم ئی وڵاته‌ وه‌ره‌و كاملا بووه‌يم؟

كوردستان وه‌ قوناغ له‌دايگبوين تازه‌يگ گوزه‌ر ئه‌كاو ئه‌را پيشوازيكردن له‌و رويداگ تازه‌يشه‌ وجوود سياسه‌تيگ خاس و بته‌و دبلۆماسی وه‌ل وڵاته‌يل و دووسه‌يل به‌س نيه‌، به‌ڵكوو په‌يڕه‌وكردن سياسه‌تيگ خاس و ئداره‌يگ سه‌ركه‌فتگ له‌بان ئاست ناوخوه‌يی مه‌رج له‌دايگبوين ئه‌و قوناغه‌سه‌، ئه‌ويش وه‌ دڵسووزی و ته‌بايی و يه‌كگفتاری و يه‌كخستن ستراتيجيه‌ت نه‌ته‌وه‌يی گشت لايه‌نه‌يل سياسی كوردستان و له‌چوارچيوه‌ی دمه‌زرياگه‌يل شه‌رعی و فه‌رمی كوردستان په‌يا ئه‌دێ.

د. چنار سه‌عه‌د عه‌بدوڵڵا

ج . أ