ژيانيگ له‌ قه‌ورسان!

شفق نيوز

وه‌ باوه‌ڕ ئه‌و پياو گه‌وراساڵه‌، شار بی كه‌ڵك بويه‌و ره‌فيقايه‌تی وه‌ل مردگه‌يل فريه‌ بی وه‌يه‌و مردگه‌يليش كه‌سه‌يليگ خاس و بيده‌نگن، نه‌ خوسه‌و كينه‌ت زانن چه‌س نه‌ دڵيان ژه‌نگ داگه‌و نه‌ ته‌قاس له‌ليد ئه‌كه‌ن و نه‌يش قسه‌ له‌باند هه‌ڵوه‌سن!

تاويگ له‌لای مام عومه‌ر له‌وه‌ ڕه‌سيمنه‌و ك له‌شوون له‌ده‌سداين هاوسه‌ره‌گه‌ی وه‌رجه‌ ٢٠ساڵ دی جوور وه‌فايگ ئه‌را مه‌رگ ئه‌و ئاده‌ميزاده‌ بڕيارداگه‌ له‌ شانيه‌و قه‌وريگ وه‌ده‌س خوه‌ی هه‌ڵكه‌نيد و وه‌دريژايی ژيان وه‌ ته‌نيا له‌و كه‌لاوه‌ بژيه‌يد و هويچ وه‌ختيگيش ترس له‌ مردن نه‌يريدو هه‌ميشه‌ وه‌ زه‌رده‌خه‌نه‌يش پيشوازی له‌ مه‌رگ خوه‌ی ئه‌كا.

مام عومه‌ر وه‌و جووره‌ ژيه‌يد و مه‌ردمانيگيش باوه‌ڕيان ئه‌وه‌سه‌ ك چوين ئه‌دێ ئاده‌ميزاد له‌ قه‌ورسان بژيه‌يد و ئه‌وه‌ چ خه‌ياڵيگه‌؟ وه‌لی ئه‌و ئويشيد: من وه‌ی ژيانه‌ به‌خته‌وه‌رم ك باوه‌ڕ وه‌پی ديرم و ئيمه‌ گشتمان ميوانيگ ئاواره‌يم و بايه‌سه‌ بچيم، ئيمه‌ هاتيمنه‌سه‌ ژيان و بايه‌سه‌ له‌ ژيانيش نه‌مينيم.

شايه‌ت فره‌جار دانايی و فه‌لسه‌فه‌ی گه‌ورايگ له‌ ئاده‌ميزاده‌يل خاس بژنه‌فيم، ك شايه‌ت له‌ هويچ سه‌رچه‌وه‌و كتاويگ نه‌ود، ئمجا له‌گشتی گرينگتر ئه‌وه‌سه‌ ك ئه‌گه‌ر ئاده‌ميزاد له‌ی سه‌رده‌مه‌ بڕه‌سيده‌ ئه‌و ئاكامه‌ ك ژيان له‌ قه‌ورستان جوانتره‌، ئايا ئه‌وه‌ بايه‌سه‌ چه‌ له‌يوا له‌لی كردويد وه‌ی جووره‌ رووحی بسزيه‌يد و بتاويه‌يده‌و؟

شێرزاد عه‌بدولڕه‌حمان

ج . أ