كورده‌یل فه‌یلى بایه‌سه‌ چه‌ بكه‌ن؟

شفق نيوز

  ئامار ئه‌نجام نه‌دریاگ ك تائیسه‌ جیوه‌جى نه‌ویه‌، له‌یوا كردگه‌ ك بڕیگ له‌ پیكهاته‌یل كوومه‌ڵگاى عراقى ناچار بوون شماره‌ى مه‌زنه‌كریاگ له‌وه‌رچه‌و بگرن، جوور ئه‌وه‌ك له‌لاى برایه‌یل كورد ئێزیدى وجوود دیرید.

وه‌گووره‌ى شماره‌یل مه‌زه‌نه‌كریاگ، ئه‌وه‌ ده‌ركه‌فید ك كورده‌یل ئێزیدى له‌ 500 هه‌زار كه‌س كه‌متر نین، ئنجا بیلا بویشیم وه‌ گووره‌ى مه‌زه‌نه‌ شماره‌ى كورده‌یل فه‌یلییش نزیكه‌ له‌ى شماره‌.

ئه‌گه‌ر ئیمه‌ وه‌ئاسایى نوڕستیمنه‌ مه‌سه‌له‌گه‌و له‌ڕوى ده‌ستووره‌و ته‌ماشاى بكه‌یم، ئه‌را هه‌ر 100 هه‌زار كه‌س بایه‌سه‌ یه‌ك كورسى بدریه‌یدو ئه‌و شماره‌یشه‌ ك باسى كردیم یه‌ك ملیۆنه‌، ك بایه‌سه‌ 10 كورسى داشتوود.

ئنجا له‌یرا ئویشیم ئایا ئه‌و باقى 9 كورسیه‌گه‌ى تر وه‌گووره‌ى شایسته‌یى شماره‌گه‌ بویه‌ هه‌ڵم و چیه‌ ئاسمان؟

ئاشكراس ك له‌ى پرووسه‌ وشه‌یلیگ جوور "دویره‌وخستن، فه‌رامووشكردن، بیبه‌شكردن" هویچ هه‌قیگ نایه‌یده‌ ئه‌وه‌ك رویدا، هه‌ر له‌وه‌ر ئه‌وه‌یش تویه‌نیم ناو ئى وشه‌یله‌ بنه‌یم" لاوردن" له‌وه‌ك رویدا.

دیاره‌ كیشه‌ى دویاخستن بڕیاداین له‌بان یاساى هه‌ڵوژاردنه‌یل له‌عراق ئه‌را ساڵ 2014 هووكاره‌گه‌ى وجوود ئێزیدیه‌یل و فه‌یلیه‌یل بوى له‌ عراق و هه‌ر له‌وه‌ر ئه‌وه‌یش لاوریاو كیشه‌گه‌ چاره‌سه‌ر كریا، چوینكه‌ دویا ده‌رمان چه‌وسیانه‌.

له‌لیدان ناشارمه‌و، من خوه‌شاڵ بویم هه‌ناى ژنه‌فتم ك ئه‌نجوومه‌ن خوازیار زیایكردن شماره‌ى كورسیه‌یل په‌رله‌مانه‌و ئه‌وه‌ بوى ك وه‌ڕاسى رویدا، چوینكه‌ من باوه‌ڕم له‌یوا بوى زیایكردن ئه‌و كورسیه‌یله‌ وه‌خاتر كورده‌یل فه‌یلیه‌، وه‌لى جى داخه‌ وه‌و جووره‌ ده‌رنه‌چى.

باوه‌ڕمیش ئه‌وه‌سه‌ ك ته‌رخان نه‌كردن كۆتاى گونجیاگیش ئه‌را ئێزیدیه‌یل و دیارى نه‌كردن كورسى كۆتایش ئه‌را كورده‌یل فه‌یلى، هووكار نه‌وین یه‌كدنگى بوى له‌ى مه‌سه‌له‌ى هه‌ڵوژاردنه‌، یه‌یش بیجگه‌ فه‌رزكردن به‌رژه‌وه‌ندى خودى له‌لاى مه‌ردمانیگ له‌بان به‌رژه‌وه‌ندیه‌یل گشتى كورده‌یل فه‌یلى ك ره‌سانه‌مانه‌ ئى ئاكامه‌و بویه‌ مایه‌ى دڵخوه‌شكردن ئه‌وانه‌ك كووچ وه‌ فه‌یلیه‌یل كردو ماڵ و موڵكه‌یلیان زه‌فت كرد و بویه‌ مایه‌ى دڵته‌نگى ئه‌و داڵگه‌یله‌ ك روڵه‌یلیان له‌ده‌سدان له‌بان ده‌س رژیم به‌عس له‌وه‌رجه‌ ساڵ 2003و له‌ده‌سداین نه‌وه‌ى روڵه‌یلیان له‌شوون گله‌وخواردنیان ئه‌را عراق له‌دویاى 2003 له‌ ته‌قینه‌وه‌یل سه‌دریه‌و شار سه‌در و جه‌میله‌.

هه‌ر وه‌ى خاتریشه‌ زویتر كورده‌یل فه‌یلى داوا له‌ فراكسیۆنه‌یل سیاسى و مه‌رجه‌عه‌یل ئایینى كردن له‌ ئه‌نجوومه‌ن نوێنه‌ره‌یل كورسى ئه‌ڕایان ته‌رخان بكریه‌یدو ئه‌و هه‌قه‌ ئه‌رایان زه‌مانه‌ت بكریه‌ید له‌ یاساى هه‌ڵوژاردنه‌یل نوێنه‌رایه‌تى.

عه‌دنان ره‌حمان

ج . أ