ژان كورده‌یل فه‌یلى

شفق نيوز

  كورده‌یل فه‌یلى وه‌رگه‌ى ژانه‌یل فریه‌یگ گردن و سه‌بر فریه‌یگیش كردن، گشت ئه‌و ژان و سه‌بریشه‌ ده‌ردیان چاره‌ نه‌كردو خه‌م دڵه‌یلیان ساڕیژ نه‌كرد، چوینكه‌ متمانه‌ وه‌ دادگه‌رى كیشه‌و هه‌قه‌یل سروشتى خوه‌یان دیرن وه‌ گووره‌ى یاسایه‌یل ناوده‌وڵه‌تى له‌باوه‌ت هه‌قه‌یل ئاده‌میزادو هه‌قه‌یل تر جه‌هانى جوور هه‌ق هاووڵاتیبوین و قسه‌كردن وه‌ زووان داڵگى و دامه‌زرانن بنگه‌یل رووشنهویرى و خوه‌ندنگا ئه‌را روڵه‌یلیان تا زانست وه‌ زووان خوه‌یان له‌تى وه‌ربگرن و هه‌قه‌یل تر جوور ره‌گه‌زنامه‌.

ژانیگ تر ك پلكیا ئه‌و ژانه‌و، ئه‌ویش ئه‌وه‌شه‌ ك نوێنه‌ر له‌ په‌رله‌مان عراقى نه‌یرن، ك یه‌یش دویره‌وخستن و فه‌رامووشردن و زوڵمیگه‌و گشت ئه‌یانه‌یش كاریگه‌رى دیریدد له‌بانیان، ئایا ئه‌ڕاچه‌؟ ئه‌یا كورده‌یل فه‌یلى له‌ پیكهاته‌یل ملله‌ت ره‌سه‌ن عراقى نین ك دژ دیكتاتۆریه‌ت و حوكم ته‌كڕه‌وى و فاشیست خه‌بات كردن؟ ئایا له‌ نواى گشت قوربانیه‌یل نه‌وین له‌وه‌ر خاتر عراق و سه‌روه‌ریه‌گه‌ى؟ ئایا ئه‌وان و كورده‌یل وه‌ گشتى دروشم(دیموكراسى ئه‌را عراق و خودموختارى ئه‌را كوردستان)به‌رزه‌و نه‌كردن؟ ئایا ئه‌یه‌ خه‌باتیگ نیه‌ له‌وه‌ر خاتر ئازادى و دیموكراسى؟ ئایا زیندانه‌یل پڕ نه‌وى له‌ جایه‌ڵ جوان و ژن و پیره‌یلیان؟

به‌ڵى ئه‌یانه‌ ئه‌و پیكهاته‌ بوین ك زه‌ره‌د گه‌ورایگ وه‌پیان ره‌سى له‌ڕى حكوومه‌ته‌یل یه‌ك له‌ شوون یه‌ك عراق و له‌وه‌خت رژیم به‌عس گه‌وراترین زه‌ره‌د وه‌پیان ره‌سان و تائیسه‌یش له‌و زوڵم و جه‌وره‌ قورتار نه‌وینه‌ له‌ ئاكام سیاسه‌ته‌یل وه‌رته‌نگ حزبى.

زویتریش كورده‌یل فه‌یلى داواى ته‌رخانكردن كۆتا كردن له‌ چوارچیوه‌ى بازنه‌ى هه‌ڵوژاردنه‌یل وه‌ جووریگ ك نوێنه‌رایه‌تیان كه‌متر نه‌ود له‌ 5% له‌ مه‌ردم عراق، وه‌لى ئه‌و داواكاریه‌ جیوه‌جى نه‌كریاو ئه‌وه‌ بوى كورد فه‌یلى بى ئومید كریاو بیبه‌ش كریان له‌ هه‌قه‌یل ده‌ستوورى له‌ نوێنه‌رایه‌تیكردن له‌ ئه‌نجوومه‌ن نوێنه‌ره‌یل عراقى، ك یه‌یش زوڵم و سته‌مه‌ ده‌رهه‌ق ئى پیكهاته‌ ك هیمان شانازى وه‌ عراقیه‌ت و نه‌ته‌وایه‌تى ره‌سه‌ن خوه‌ى ئه‌كا.

ئنجا له‌ ئاكام بیبه‌شكردن فه‌یلیه‌یل له‌ نوێنه‌رایه‌تى له‌ په‌رله‌مان عراقى ئه‌وه‌ بوى موقته‌دا سه‌در سه‌ركرده‌ى ره‌وت سه‌درى رینمایى دا ئه‌را وازكردن قاپى كاندیدكردن كورده‌یل فه‌یلى له‌ چوارچیوه‌ى لیسته‌یل فراكسیۆن ئه‌حرار وه‌خاتر چاره‌سه‌ركردن ئى مه‌سه‌له‌، ئنجا ئه‌حرار ئى رینماییه‌ وه‌ خاڵ زانست:

1- كورده‌یل فه‌یلى شماریه‌ن له‌بان كورسیه‌یل كۆتا ك یه‌یش هه‌ق خوه‌یانه‌.

2- شماره‌یان كه‌م نیه‌ وه‌ به‌راورد وه‌ل كه‌مینه‌یل تر.

هه‌ر له‌وه‌ر ئه‌وه‌یش فراكسیۆن ئه‌حرار قه‌وڵ وه‌پیان دا نوێنه‌رایه‌تى داشتوون له‌ چوارچیوه‌ى لیسته‌یلى، وه‌ل ئه‌وه‌یشا ئه‌حرا له‌ لێدوانه‌یلى وت: ئى كاره‌ ئه‌ركیگه‌و كورده‌یل فه‌یلى روڵه‌یل ئى وڵاته‌نه‌و بایه‌سه‌ له‌ بانمان و له‌بان گشت هیزه‌یل نیشتمانى و فراكسیۆنه‌یل سیاسى پشتگیرى له‌لیان بكه‌ن، هه‌ر وه‌و خاتریشه‌ داین هه‌ق وه‌پیان و نوێنه‌رایه‌تیكردنیان له‌ ئه‌نجوومه‌ن نوێنه‌ره‌یل هه‌قیگ سروشتیه‌و هه‌ر له‌وه‌ر ئه‌وه‌یش بایه‌سه‌ له‌بان لایه‌نه‌یل وه‌رپرس حكوومى كار له‌بان راسه‌وكردن ئه‌و مه‌سه‌له‌ بكاو كارئاسانى بكا ئه‌را گله‌وخواردن ئاواره‌یلیان و هاوردنه‌وه‌ى ده‌ركریاگه‌یل سیاسى ئه‌را بان وه‌زیفه‌یلیان، چوینكه‌ كه‌سه‌یلیگ شاره‌زا دیرن و نه‌ف له‌ ئه‌زموون و شاره‌زاییان وه‌رگیریه‌ید، بیجگه‌ ئه‌وه‌یش ئه‌وان خه‌بات كردنه‌ له‌وه‌ر خاتر ئى وڵاته‌و له‌وه‌ر خاتر دادگه‌رى و ئازادى و ریزگرتن له‌ ئنسانیه‌ت.

محه‌مه‌د عه‌لى سه‌ماوى

ج . أ