فراكسیۆنه‌یل سیاسى له‌ ماوه‌ 100 ڕووژیه‌گه‌ وه‌زیره‌یل كه‌مته‌رخه‌میان ئاڵشت كه‌ن

شفق نيوز

ئه‌وه‌ ئه‌رایان سابت بوى ك كه‌مته‌رخه‌مى نیشاندانه‌ له‌ كاركردنیان له‌و ماوه‌ى 100 ڕووژیه‌ ك سه‌رۆك وه‌زیره‌یل دیاریى كردیه‌.

قسه‌كه‌ر وه‌ناو ئئتلاف فراكسیۆنه‌یل كوردستانى، موئه‌یه‌د ته‌یب له‌ قسه‌یلى ئه‌را (شه‌فه‌ق) له‌ى باوه‌ته‌ وت:"فراكسیۆنه‌گه‌ى دودڵى نیه‌كه‌ید له‌ ئه‌وه‌ز كردن هه‌ر وه‌زیریگ ئه‌وه‌ له‌بانى سابت بوود ك كه‌مته‌رخه‌مى كردیه‌ له‌ كار وه‌زارى خوه‌ى، چوینكه‌ ئى وه‌زیره‌یله‌ كاریگه‌رى دیرن له‌ بان ناودارى یا سمعه‌ت فراكسیۆنه‌یلیان چ وه‌گه‌ن بوود یا وه‌ خاس".

ئه‌وه‌یشه‌ ڕووشنه‌وكرد:"بایه‌ته‌ له‌یه‌كحالیبوینیگ وجوود داشتوود له‌ ناوبه‌ین سه‌رۆك وه‌زیره‌یل و ئه‌و فراكسیۆنه‌یله‌ ك وه‌زیره‌یل سه‌روه‌ ئه‌وانن، چوینكه‌ ئۆپه‌راسیۆن سیاسى له‌ وڵات دى ئه‌وه‌ هه‌ڵنیه‌گرى ك دوباره‌ تویش شیوایشیو و كێشه‌یل جارانى باید".

ته‌یب له‌وه‌یشه‌ وشیاركرد:" فراكسیۆنه‌یل سیاسى له‌ فۆرمه‌ى حكوومى خوه‌یان بكیشنه‌و له‌ حاڵه‌تیگ ك له‌یه‌كه‌وحالیبوینیگ پیشوه‌خته‌ نه‌ود، له‌ ناوبه‌ین ئه‌وان و سه‌رۆك وه‌زیره‌یل له‌ى باوه‌ته‌". و ئه‌وه‌یشه‌ ڕووشنه‌وكرد ك:"حكوومه‌ت حازرى حكوومه‌ت هاوبه‌شى نیشتمانیه‌ و بایه‌ته‌ فراكسیۆنه‌یل سیاسى كه‌سه‌یلیگ كارزان و پسپۆر و پیشه‌یى كاندید كردوین ئه‌را ئه‌و وه‌زاره‌ته‌یله‌ ك كه‌فتیه‌سه‌پیان".

له‌لاى خوه‌یه‌و قسه‌كه‌ر وه‌ناو لیست عیراقیه‌ شاكر كتاب له‌ په‌یوه‌ندییگى وه‌ل (شه‌فه‌ق) له‌هه‌مان باوه‌ت وت ك:"لیسته‌گه‌مان ئاماده‌یه‌ ئه‌را ئه‌وه‌زكردن هه‌ر وه‌زیریگ سه‌ر وه‌خوه‌مان ئه‌گه‌ر ئه‌وه‌ ئه‌رامان سابت بوى ك پیشه‌یى و كارزانیى نه‌یرید له‌ كاركردنى له‌ پۆسته‌ وه‌زاریه‌گه‌ى، وه‌ ئه‌وه‌یشه‌ نیه‌وسیه‌ید، به‌ڵكوو بایه‌ته‌ حساو كتاویش وه‌لیا بكریه‌ید چوینكه‌ وه‌زیره‌یل لیسته‌گه‌ قه‌وڵ دانه‌سه‌ پى وه‌ شیوه‌یگ پیشه‌یى كار بكه‌ن".

ئه‌وه‌یشه‌ ڕووشنه‌وكرد ك:" سه‌رۆك وه‌زیره‌یل نورى مالكى یه‌كم كه‌سه‌ ك كارزانى یا نه‌زانى وه‌زیره‌یل ده‌سنیشان كه‌ید".

له‌هه‌مان باوه‌ت حاكم زاملى نوێنه‌ر فراكسیۆن ئه‌حرار ك نوێنه‌رایه‌تى باڵ سه‌درى كه‌ید له‌ ئه‌نجوومه‌ن نوێنه‌ره‌یل له‌ قسه‌یلى ئه‌را (شه‌فه‌ق) وت:"فراكسیۆنه‌گه‌ خه‌ریكه‌ چاودێرى كاركردن حكوومى كه‌ید وه‌شیوه‌یگ گشتى و كاركردن وه‌زیره‌یل سه‌روه‌ فراكسیۆنه‌گه‌ وه‌تایبه‌تى". و زیاتریش وت:"وه‌شوونكه‌فتن و چاودێرى كردن مه‌یدانى وردیگ هه‌س له‌ لایه‌ن سه‌ید موقته‌دا سه‌در و ده‌سته‌ى سیاسى باڵ سه‌درى، و ئه‌وه‌ دیمن ك كاركردن وه‌زیره‌یل سه‌روه‌ فراكسیۆنه‌گه‌مان خاسه‌ و جووریگ له‌ ڕه‌زامه‌نى هه‌س له‌ لایه‌ن جاده‌ى عیراقى له‌باوه‌ت كاركردنیان".

ئاماژه‌یش وه‌وه‌دا ك :"ئه‌گه‌ر ئه‌رامان سابت بوى ك سسى یا كه‌مته‌رخه‌مى هه‌س له‌ لایه‌ن ئه‌و وه‌زیره‌یله‌، فراكسیۆن ئه‌حه‌رار ئه‌وه‌زیان كه‌ید یا ئى كاره‌ خه‌یده‌ ده‌س سه‌رۆك وه‌زیره‌یل، چوینكه‌ ئه‌یه‌ یه‌كیگه‌ له‌ ده‌سڵاته‌یل ده‌ستوورى خوه‌ى".

شایان باسه‌ سه‌رۆك وه‌زیره‌یل نورى مالكى له‌ 27 شوبات وه‌رینه‌و مووڵه‌ت ماوه‌ 100 ڕووژى داسه‌ وه‌زاره‌ته‌یل و فه‌رمانگه‌یل ده‌وڵه‌ت و ده‌زگایه‌یل و ئیداره‌ته‌یل پارێزگایه‌یل ئه‌را هه‌ڵسه‌نگاندن یا ته‌قییم شیوه‌ى كاركردنیان و ئاست سه‌ركه‌فتن و سه‌رنه‌كه‌فتنیان و جه‌ختیش كردیه‌ له‌بان جیوه‌جیكردن داخوازیه‌یل خودنیشانده‌ره‌یل له‌ نه‌هیشتن بیكارى و گه‌ناته‌كارى دارایى و ئیدارى و دابین كردن مادده‌یل كارت خوراكى (بتاقه‌ى ته‌موینى).

یاسر عماد