سه‌ختیه‌یل سه‌رده‌م

شفق نيوز

وچانداینمان فريه‌ن، وه‌لى وه‌خته‌یلمان كه‌م و بێ به‌ره‌كه‌تن، باوه‌ڕنامه‌مان فریه‌س، وه‌لى گفت و لۆژیكمان كه‌مه‌، شاره‌زاو پسپۆره‌یلمان فریه‌ن، وه‌لى كێشه‌و گرفته‌یلمانیش زیاترن، ده‌رمانمان فریه‌س، وه‌لى له‌شساقى و ته‌ندروسیمان شیویاگه‌، فریه‌ پویل خه‌رج ئه‌كه‌یم، كه‌م خه‌نیمن، ئۆتۆمۆبیله‌یل وه‌ تونى رانیه‌ن، زوى تویڕه‌ بویمن، شه‌وانه‌ دێر خه‌فیمن و شه‌وه‌كیان وه‌ زه‌حمه‌ت هه‌ڵسیم.

 

كه‌م خه‌ریك خوه‌ندنیم، فره‌ ته‌ماشاى ته‌له‌فزیۆن ئه‌كه‌یم، خودا په‌ره‌سیمان كه‌مه‌و بویه‌، ماڵ و سامان و كه‌ره‌سه‌یل جووراوجوور چه‌ن قاتیگ زیاى كردگه‌، وه‌لى نرخ و ئاكام و ره‌فتاره‌یل كه‌مه‌و كردنه‌.

 

فریه‌ قسه‌ ئه‌كه‌یم، سووز و خوه‌شه‌ویسیمان كه‌مه‌، فریه‌ دروو ئه‌كه‌یم، هووكاره‌ بویمنه‌ چوین رزق و رووزى بیه‌ریمنه‌ ده‌س، وه‌لى هووكاره‌ى ئه‌وه‌ نه‌ویمنه‌ چوین بژیه‌یم، ساڵه‌یلیگ خستیمنه‌ بان ژیانمان، و ژیان نه‌وه‌خشایمنه‌ ساڵه‌یل عومرمان.

 

ماڵ و ته‌لار به‌رز دیریم، وه‌لى ته‌بیعه‌تیگ زبر و تون دیریم، ڕێ وبان فراوان دیریم، وه‌لى دید كوڵ و ته‌نگیگ دیریم، فره‌ خه‌رج كه‌یم و كه‌میش دیریم، چشت فره‌یگ سینیم، وه‌لى تام كه‌میگ وه‌رگریم، چیمنه‌ بان مانگ و هاتیمنه‌و، وه‌لى بێزار و بێ تاقه‌تیم و تاقه‌ت ئه‌وه‌ نه‌یریم سه‌ردان هاوسایگمان بكه‌یم.

 

له‌بان فه‌زاى ده‌یشت سه‌ركه‌فتیم، وه‌لى زاڵ نه‌ویمنه‌ بان ده‌روین خوه‌مان، كه‌م هووكاره‌ بویمن، زیاێ پلان دانه‌یم، كه‌م جیوه‌جى ئه‌كه‌یم، هووكاره‌ى هه‌ڵه‌په‌ڵه‌ بویمنه‌، هووكاره‌ى چه‌وه‌ڕێ نه‌ویمنه‌، داهات به‌رز دیریم، وه‌لى ره‌فتار نزمیگ نیشان ئه‌یه‌یم، ئامێر كۆمپیته‌ر پێشكه‌فتگ دروس كه‌یم ئه‌را هه‌ڵگرتن و مقه‌یه‌تیكردن زانیاریه‌یل، وه‌لى ناونى خوه‌مان و خێزانمان سس و كزه‌.

نه‌ف فره‌، په‌یوه‌ندى كه‌م، وه‌خت به‌تاڵمان فریه‌س و له‌زه‌ت بردنمان كه‌م، داهاتمان به‌رزه‌، دیارده‌ى جیابوینه‌وه‌و ته‌ڵاق فریه‌س، ئمجا بیلا له‌ئیسه‌ هویچ چشتیگ هه‌ڵنه‌گریم ئه‌را بوونه‌یگ دیاریكریاگ، چوینكه‌ هه‌ر سات و رووژیگ ك ژیه‌یم بوونه‌یگ تایبه‌ته‌، خاستر ئه‌وه‌سه‌ نه‌ف له‌لى وه‌ربگریم و بگه‌ردیمنه‌ شوون زانست و فره‌یش بخوه‌نیم و له‌ شوونیگ خوه‌ش و به‌رز بنیشیم و له‌دیمه‌نه‌یل له‌زه‌ت بوه‌یم.

 

وه‌ل ئه‌وه‌یشا بتویه‌نیم وه‌خت خاسیگ وه‌ل خێزان و هاوڕێه‌یلمان بوه‌یمنه‌ سه‌ر و ئه‌و خواردنه‌یله‌ ك دووسیان دیریم بخوه‌یم و سه‌ردان ئه‌و شوونه‌یله‌ بكه‌یم ك دووسیان دیریم. ژیان پێكهاتگه‌ له‌ زنجیره‌یگ له‌ وه‌خته‌یل خوه‌ش و تامدار، نه‌ك ته‌نیا مه‌ندنه‌وه‌ له‌ژیان.

 

یاسین ئه‌حمه‌د زه‌نگنه‌