گۆتلاند و "سكه‌ى" كوردى

شفق نيوز

  ناوچه‌ى گۆتلاند یه‌كیگه‌ له‌و ناوچه‌یله‌ ك سكه‌ى كوردى له‌لى دوینریاسه‌و، وه‌گووره‌ى ئه‌و زانیاریه‌یله‌ ك له‌لاى ده‌سه‌ى له‌یه‌كه‌وده‌ر سكه‌ناسى له‌زانكۆى "ستۆكهۆڵم" وجوود دیرید، ئه‌وه‌ ده‌ركه‌فید ك گۆتلاند گه‌وراترین شوونیگه‌ سكه‌ى كوردى له‌لى دوینریاسه‌و له‌ وڵات سوید .

له‌ناونى ساڵه‌یل 1815 – 1990 له‌گشت وڵات سوید 90دانه‌ سكه‌ى مه‌روانى و چه‌ن دانه‌یگیش سكه‌ى میرنشینه‌یل تر دوینریاوه‌، سكه‌ى مه‌روانى له‌ سه‌رده‌م و شوونه‌یل جیاجیاجیا له‌گۆتلاند په‌یا كریا، بڕیگ   سكه‌ى كوردییش ك له‌ ئازه‌ربایجانه‌و هاوریانه‌ سوید ئه‌ویش په‌یا كریا، ئنجا ئه‌گه‌ر ئى هه‌مگه‌ سكه‌یله‌ ك په‌یا كریا، گردیه‌و بكه‌یم وه‌ل ئه‌و 90 دانه‌ى سكه‌ى مه‌روانیه‌، ئه‌وه‌ شماره‌ى سكه‌یل كوردى (ئه‌وانه‌ك له‌ گۆتلاند و سوید) دوینریانه‌و ره‌سنه‌ نزیكه‌ى 100دانه‌.

بیگومان گشت ئى سكه‌یلیشه‌ له‌یوا دیاره‌ له‌سه‌رده‌م ده‌سڵاتدایه‌تى "ئه‌بو عه‌لى ئه‌لحه‌سه‌ن كوڕ مه‌روان" و " ئه‌بو مه‌نسور سه‌عید كوڕ مه‌روان" دروس كریانه‌ له‌شاره‌یل "مایفارقین و جزیره‌و نسێبین"، ئنجا له‌ناونى ئه‌و سكه‌یل كوردییشه‌ ك له‌سوید دوینریانه‌و ، یه‌كیگیان له‌شار "ئامیدا"ى دیاربه‌كر ئیسه‌ دروسكریاگه‌ ، ك بڕیگیش له‌لیان جوور جه‌واهیر وه‌كار هاوریانه‌و یه‌كه‌مین سكه‌ى كوردى ك له‌سوید دوینریاوه‌ له‌ساڵ 1815 بوى ، ئه‌ویش له‌ ناوچه‌ى "برۆبى" ك ئه‌كه‌فیده‌ پاریزگاى سۆدیر ماندلاند.

گۆتلاند په‌یوه‌ندى زنگیگ وه‌جه‌هانه‌و داشت له‌سه‌رده‌م ڤێكینگه‌یل، هه‌ر له‌وه‌ر ئه‌وه‌یش له‌سوید نزیكه‌ى 80 هه‌زار سكه‌ى خوه‌رهه‌ڵاتى دوینریاوه‌، ك له‌وانه‌یش 50 هه‌زاریان له‌ گۆتلاند په‌یا كریا .

خه‌ڵك گۆتلاند فیشتر خه‌ریك بازرگانیكردن بوین وه‌شیوه‌یگ ئاشتیانه‌، ك شایه‌ت هه‌ر وه‌و خاتریشه‌ ئه‌و هه‌مگه‌ سكه‌یله‌ له‌ورا په‌یا كریانه‌، دى هه‌رچه‌نى ك شماره‌ى ئه‌و سكه‌یل كوردیه‌ ئه‌وه‌نه‌ فره‌یش نه‌وین، وه‌لى له‌گشت سكه‌نده‌ناڤیا دوینریانه‌سه‌و.

ئه‌و سكه‌یل كوردییشه‌ ك له‌لایه‌ن سكه‌ناسه‌یل جیاجیا دوینریانه‌و له‌ نه‌رویج و دانیماركیش ، له‌و سكه‌یله‌نه‌ ك له‌گشت سكه‌یل كوردى تازه‌ترن، چوینكه‌ دو سكه‌ى مه‌روانى له‌نه‌رویج و یه‌ك سكه‌یش له‌دانیمارك په‌یا كریا.

مه‌لا جه‌میل

ج . أ