میدیاى كوردى و توخه‌وكردن جیاوازیه‌یل

شفق نيوز

 

هه‌رچه‌نى پاڵنه‌ره‌ ئاشكراگه‌ى ئه‌نجامداین ئى جووره‌ به‌رنامه‌یله‌ ده‌رخستن جیاوازیه‌یل و ره‌سینه‌ وه‌چه‌ن راسییگ ئه‌را مه‌ردم، وه‌لى له‌ هه‌مان وه‌خت پاڵنه‌ر مه‌یلكیش فیشترین دوینه‌ر ئه‌را كه‌ناڵه‌گه‌ پاڵنه‌ر سه‌ره‌كیه‌، ئه‌نجا ئه‌را وه‌دیهاوردن ئى مه‌رامیشه‌ هه‌میشه‌ باوه‌ت پیشكه‌شكاره‌یل ئى جووره‌ به‌رنامه‌یله‌ وه‌ جووریگه‌ ك فره‌ترین هانده‌ر دروس بكه‌ن و كار له‌بان میوانه‌یل به‌رنامه‌گه‌یان بكه‌ن ئه‌را تویڕه‌كردن و سه‌رده‌وكردن و شیوانن هویر و ئه‌ڕاى چوینه‌یل وه‌رانوه‌ر و خود زاڵكردن له‌بان ئه‌واكه‌ى تر.

بیگومان هویچ وه‌ختیگ ئه‌و به‌رنامه‌یله‌ ك وه‌ى شیوازه‌یله‌ كار كه‌ن نه‌ك هه‌ر نه‌تویه‌نستنه‌ مۆدێل و قدوه‌ى خاسیگ بوون ئه‌را دروسكردن پیه‌ڵیگ له‌ گفتگوو بنیاتنه‌ر، به‌ڵكوو نه‌خش گه‌ورایگ دینه‌ له‌ تێكداین و شیوانن ئاشتى كوومه‌ڵایه‌تى كوومه‌ڵگاى كوردى.

بیگومان بار سایكۆلۆجى ئاده‌میزاد كوردیش گونجیاگه‌ ئه‌را ئه‌و روى وه‌ڕوى بوینه‌وه‌یله‌ وه‌ل نه‌یار و هه‌میشه‌ ته‌ماشاى هه‌گبه‌ى هه‌ر تاكیگ بكه‌ید دوینید پڕه‌ له‌و قسه‌یله‌ ك نه‌یاره‌یلى وه‌پى سه‌خت و تویڕه‌ بكاو هه‌وڵ ناشرینكردنى بیه‌ید.

ئیسه‌یش له‌بان تووڕه‌یل كوومه‌ڵایه‌تییش جووره‌یلیگ له‌ قسه‌یل سووكایه‌تى و ناشرینكردن وه‌ یه‌كترى له‌یوا وه‌پى هاتگه‌ بویه‌سه‌ سیمایگ ئاشكرا له‌و په‌یجه‌یله‌ ك كار له‌بان گرژه‌وكردن بار سیاسى و كوومه‌ڵایه‌تى هه‌رێم كوردستان كه‌ن.

جاران ئه‌گه‌ر جه‌نگه‌یل ناوخوه‌یى له‌بان ته‌په‌و جه‌وه‌ڵه‌یل كریاو ته‌نیا جه‌نگاوه‌ر لایه‌نه‌یل له‌تى به‌شدار بوین، وه‌لى ئیسه‌ نوڕید ئه‌و جه‌نگه‌ هاته‌سه‌ ناو گشت ماڵیگه‌و له‌ڕى ئه‌و جه‌نگه‌یل ئه‌لكترۆنیه‌ ك لایه‌نه‌یل ناكووك و دژ وه‌یه‌كترى ئه‌نجامى ده‌ن، وه‌ یه‌یش ئاشتى كوومه‌ڵایه‌تى و تواناى گفتگوو راسكانى له‌ناونى ئه‌ڕاى چوین و ره‌نگه‌یل جیاواز له‌ خاڵ سفر نزیكه‌و بویه‌، ئه‌ویش وه‌ راده‌یگ تاك كورد ئه‌و هویره‌یله‌ له‌لاى دروس بویه‌ ك هویچ خاڵیگ هاوبه‌ش و هویچ چین و لایه‌نیگ و هویچ ریكخریاگیگ سیاسى وه‌ل یه‌كا پیه‌وه‌س ناكا، ك هه‌رچه‌نى گشتمانیش هاونه‌ته‌وه‌و هاوخاك و هاو چاره‌نویسیم.

سامان سوه‌یلى

ج . أ