پیشه‌ ئنسانیه‌گه‌ى(پزیشك)ه‌یل چه‌وه‌پیهات!!؟

شفق نيوز

ته‌واوى كردگه‌ وه‌رگرێد و ئامانجیش له‌ پیشه‌ى پزیشكى خزمه‌ت وه‌ئنسانیه‌ته‌ له‌چوارچیوه‌ى وژدانیگ پاك و بیگه‌رد. وه‌لى جى داخه‌ له‌ى رووژگاره‌ مه‌سه‌له‌ى ئنسانیه‌ت له‌لاى زوورم پزیشكه‌یل وه‌تایبه‌ت ئه‌وانه‌ك عیاده‌ واز كردنه‌ له‌ده‌یشت نه‌خوه‌شخانه‌و ده‌وامه‌ ره‌سمیه‌گه‌یان كزه‌و ڕوى له‌نه‌مه‌ندن كردگه‌.

ئه‌گه‌ر بایگ و له‌ڕوى ئه‌خلاقیه‌وه‌ ته‌ماشاى كرده‌وه‌ى بڕیگ له‌ دكتۆره‌یل ئى وه‌خته‌ بكه‌یم، ئه‌وه‌ بیگومان له‌نه‌ریت ئنسانیه‌ت و ئاست وه‌پرسیاریه‌تى ده‌رچیه‌و هه‌ڵسووكه‌فت و ره‌فتار خاسیگیش وه‌ل نه‌خوه‌شا نیارنه‌ كار و ته‌نانه‌ت له‌لیانیش هه‌س جواو پرسیاره‌یلیش نیه‌نه‌وه‌. بیجگه‌ ئه‌وه‌یش ئیسه‌ هه‌ر دكتۆریگ و جووریگ له‌ ریككه‌فتن دروس كردگه‌ وه‌ل ده‌زگایه‌یل جویر: ئه‌زموونگا یا موختبه‌ر و ئه‌شیعه‌و تاڕاده‌یگ ده‌رمانخانه‌یلیش، ك بایه‌سه‌ له‌بان رینمایى دكتۆره‌گه‌ له‌و شوونه‌یله‌ ك خوه‌ى ده‌سنیشانى ئه‌كا كاره‌یل هه‌وه‌جه‌یلد ئه‌نجام به‌ید.

پزیشك ئى وه‌خته‌یله‌ هویچ وه‌ختى له‌نه‌خوه‌ش نیه‌پرسن ئاست دارایه‌گه‌ى چوینه‌، یا گرنگ نیه‌ له‌لاى ك ئه‌و نه‌خوه‌شه‌ فه‌قیرحاڵ یا نه‌دار بوود، گرنگ ئه‌وه‌سه‌ كراده‌س خوه‌ى له‌لى بسینیگ ، وه‌ل ئه‌وه‌یشا فره‌یگ له‌ پزیشكه‌یل مامڵه‌ى خاسیگ نیارنه‌ كار وه‌ل نه‌خوه‌شا، چوینكه‌ حه‌كیم یا پزیشك ك خاوه‌ن پیشه‌یگ ئنسانیه‌ بایه‌سه‌ وه‌گشت جوانییگه‌وه‌ گرنگى یا ئه‌همیه‌ت به‌یگه‌ نه‌خوه‌ش و له‌هه‌مان وه‌خت ئه‌و نه‌خوه‌شیشه‌ هه‌ق كرامه‌ت دیریگ له‌ڕوى چاره‌سه‌ره‌كردن.

مه‌سه‌له‌یگ تر هه‌س، ك ئه‌ویش ئه‌مانه‌ت و راسگووییه‌، ك وه‌داخه‌وه‌ یه‌یش له‌قاڵب ئنسانیه‌ت ده‌رچیه‌و تاڕاده‌یگ بڕیگ له‌ پزیشكه‌یل وه‌چه‌و ئه‌مانه‌ت و راسگووییه‌وه‌ نیه‌نوڕنه‌ نه‌خوه‌شه‌وه‌و ته‌نیا ئامانجیان ئه‌وه‌سه‌ نه‌خوه‌ش بڕویتكننه‌وه‌. ئنجا گشت ئى هه‌ڵسووكه‌فت و ره‌فتاره‌یل ناجوور و ناپوخته‌ له‌لایه‌ن بڕیگ له‌خاوه‌ن پیشه‌یل ئنسانى جویر پزیشكه‌یل شایه‌ت هووكاره‌گه‌ى بچووگه‌وه‌ ئه‌را نه‌وین چه‌ودیرى یا مراقبه‌ى خاسیگ له‌لایه‌ن به‌ش چه‌ودیرى له‌ وزاره‌ت ته‌ندروستى. هه‌ر له‌وه‌ر ئه‌وه‌یش دوینید پزیشك ئه‌و كه‌مته‌رخه‌مى و چه‌ودیرى نه‌كردنه‌ وه‌ هه‌لیگ زانیگ و راسگوویى و متمانه‌ى پیشه‌گه‌یان له‌ده‌سدانه‌.

بڕیگ له‌ پزیشكه‌یل هه‌ن له‌وه‌ختى نه‌خوه‌شیگ هه‌وه‌جه‌ وه‌ نه‌شته‌رگه‌رى(عملیات) دیرى، نیه‌توان له‌و نه‌خوه‌شخانه‌ى حكوومیه‌ نه‌شتگه‌رى ئه‌ڕایان بكه‌ن ك خوه‌یان له‌تى كاركه‌ن، به‌ڵكوو توان له‌نه‌خوه‌شخانه‌ى تایبه‌ت نه‌شته‌رگه‌ریه‌گه‌ى ئه‌نجام بیه‌ن، چوینكه‌ له‌نه‌خوه‌شخانه‌ى حكوومى خه‌رجى كه‌متره‌و قانجاز پزیشكه‌یل له‌تى نیه‌ ته‌نیا ئه‌وه‌ نه‌ود هه‌ق وشكنین(فحوصات)له‌لیان وه‌رگرن و باقى ده‌واو ده‌رمانه‌گه‌یش له‌نه‌خوه‌شخانه‌گه‌ وه‌ پویل كه‌میگ وه‌رگرن. هه‌ر له‌وه‌ر ئه‌وه‌یش دوینید دكتۆر له‌ى حاڵه‌ته‌ دو ڕیگه‌ نه‌یگه‌ نواد یا ئه‌وه‌سه‌ له‌نه‌خوه‌شخانه‌ى تایبه‌ت خوه‌ى چاره‌سه‌رى بكا، یا ئویشیگه‌پى بچوو سه‌ردان دكتۆریگ تر بكه‌. ئه‌ى دى ئایا پیشه‌ ئنسانیه‌گه‌ى(پزیشك)ه‌یل چه‌وه‌پیهات و ئه‌راچه‌ وژدانیان ژه‌نگ گرده‌سه‌ى و مه‌سه‌له‌ى ئنسانیه‌ت له‌وه‌ر چه‌و نیه‌گریه‌یگ ؟ هه‌ر له‌وه‌ر ئه‌وه‌یش ئویشیم: خوه‌زگ لایه‌ن په‌یوه‌ندیدار وه‌تایبه‌ت وزاره‌ت ته‌ندروستى مه‌رزیگ ئه‌را ئى نادادگه‌رى و ناوژدانیه‌ دیارى بكاو نه‌خوه‌ش و نه‌دار له‌ته‌ماح و غروور پزیشك ره‌ها بكا.

 

جه‌ماڵ ئه‌ركه‌وازى