وه‌رجه‌ ئه‌وه‌گ كه‌سه‌یل تر وه‌لمان بوون، بیل خوه‌مان وه‌ل خوه‌مان بویمن

شفق نيوز

دریژه‌ دامه‌ سه‌رزه‌نشتكردنى، تاڕاده‌یگ ك هه‌ڕه‌شه‌ له‌لى كردم له‌وه‌رده‌م هاوڕێیه‌یلى كه‌مه‌ى په‌ن و ئاوڕویى ئه‌وه‌م، وه‌لى خه‌نست و وت: من كه‌سێگ بێ ئاوڕوييم و  ده‌ربه‌ن نيم!.

 

وه‌ باوه‌ڕم ئى مه‌سه‌له‌ نزیكه‌ له‌وه‌گ له‌ناونى كورده‌یل فه‌یلى و لایه‌نه‌یل په‌یوه‌ندیدار حكوومى روى ئه‌یاد. ئیمه‌ى كورد فه‌یلى ئه‌و لیست هه‌میشه‌ییه‌ له‌ خواست و داواكاریه‌یل ره‌وامان دیریم ك زوورمى سێ ته‌وه‌ر گرێده‌ خوه‌ى ك ئه‌ویش شكایه‌ت و ره‌خنه‌و سه‌رزه‌نشتكردنه‌. ئیمه‌ له‌گشت بوونه‌یگ دوباره‌ى خواسته‌یلمان كردیمنه‌ له‌ناو مه‌رز نیشتمان و ئاكامه‌گه‌یشى ئاشكراس، وه‌لى له‌ده‌یشت ئیراده‌مان ره‌سیه‌ ئاست مه‌ترسى و سه‌خته‌ ئه‌رامان شماره‌ى كه‌میگ  له‌ مه‌ردم گرده‌و بكه‌یم ك چه‌نه‌ شماره‌ى په‌نجه‌یل ده‌س نادۆن له‌وه‌رده‌م هه‌ر كونسوڵخانه‌یگ عراقى و خودنیشانداینیگ ساز بكه‌یم وه‌ بوونه‌ى ئه‌وه‌ك دگان وه‌پیمان نانه‌ن و كاره‌یلمان ئاسانه‌و ناكه‌ن، جوور ئه‌وه‌ك تاوانباره‌یل و به‌عسیه‌یل و پیاوه‌یل رژیم رمیاگ و ئه‌وانه‌ك شوونیان گرتنه‌ وه‌لمانا ئه‌نجامى ئه‌یه‌ن.

 

 

ئیمه‌ ئه‌گه‌ر تویه‌نستیم خودنیشانداین له‌ ده‌وڵه‌ته‌یل مه‌نفا رێكبخه‌یم و شكایه‌ت پێشكه‌ش بكه‌یمنه‌ لایه‌نه‌یل په‌یوه‌ندیدار ناوده‌وڵه‌تى و ئامار و به‌ڵگه‌یل فه‌رمى پێشكه‌ش بكه‌یم وه‌شیوه‌یگ ك وه‌ل شماره‌ى ئه‌و قوربانیه‌یل و ده‌روه‌ده‌رى و كووچ وه‌پیكردنمان بگونجیه‌ێد، ئه‌وه‌ بیگومان ئومید گه‌ورایگ له‌لى كریه‌یدو خواست قه‌ره‌بووكردن خاستره‌و بوود له‌ئیسه‌ى دادگاو دادگاكارى عراقى ك ئه‌خوازێد بڕه‌سنێده‌مانه‌ به‌هه‌یشت له‌ڕِێ دوزه‌خ كێشه‌یل موڵكدارى و گشت وه‌خته‌یلمان له‌ده‌سمان بیاد و فه‌ن وفێڵ وه‌لمانا بكریه‌ێد له‌ساى گه‌ناته‌كارى و بازیكردن وه‌ چاره‌نویس.

 

له‌هویرمانیش ناچێ ك ڕێ وه‌ره‌و به‌هه‌یشت بایه‌د وه‌ خانى تووماره‌یل ناسنامه‌ یا ئه‌حوال مه‌ده‌نیه‌و گوزه‌ر بكه‌یم ك بوو به‌عسى له‌لى ئه‌یه‌ێد و گشت ئه‌یانه‌یش نیشانه‌ى ئه‌وه‌سه‌ ئه‌و سیاسه‌ت چه‌فته‌ ك هاووڵاتیه‌یل كردگه‌سه‌ پله‌پله‌، وه‌رده‌وامه‌و ئامانجى ئه‌وه‌سه‌ ئه‌و باقى كرامه‌ت ئاده‌میزاد فه‌یلى بشیونێ له‌ ژیان.

 

ئیمه‌ چه‌وه‌ڕێ ئه‌وه‌ كه‌یم حكوومه‌ت عراقى داواى وه‌خشین له‌لیمان بكا له‌بان ئه‌و كاره‌ساته‌یله‌ ك هاته‌ تویشمان و قه‌ره‌بوومان بكا وه‌گووره‌ى هه‌قه‌یلمان، ك یه‌یش غه‌ڵه‌ت گه‌ورایگه‌و نیشانه‌ى ئه‌وه‌سه‌ واقع ئى عراقه‌ نازانیم ك وه‌رده‌وام هه‌زاران له‌ خاوه‌ن به‌ڵگه‌یل(4/أ) له‌لى واێد و ئومیدوار شوونیگن ك شه‌ڕ هویچ وڵاتیگ نه‌خاده‌ هویریان ته‌نیا خه‌یر نه‌ود.

 

ژنه‌فیم له‌ى دویاخره‌ ك بریار تایبه‌تكردن به‌ش كورده‌یل فه‌یلى دریاگه‌ له‌ هه‌ڵوژاردنه‌یل ئه‌نجوومه‌ن پارێزگایه‌یل و ژنه‌فتیم ك بڕێگ له‌لیمان هویره‌و له‌لى كه‌ن له‌وه‌ر ئه‌وه‌ك دویره‌و خریایمنه‌و فه‌رامووش كریایمنه‌و له‌ناو ناوه‌نده‌یل بڕیار یا ده‌زگایه‌یل كاریگه‌ر ده‌وڵه‌ت نییمن و هه‌قه‌یلمان دیار نییه‌، ئه‌یه‌ له‌لایگ ، له‌لایگ تریشه‌و كه‌سه‌یلیگ هه‌ن ئویشن ئیمه‌ هه‌وه‌جه‌ وه‌ سه‌ركردایه‌تییگ دیریم گشتمان گرده‌و بكا.

 

گشت ئه‌یانه‌یش هیلێده‌مان ئاماژه‌ وه‌ ئه‌زموون سیستم هووزایه‌تى بكه‌یم له‌عراق و مه‌ردمانیگ ئیچنه‌ دوینن ك هووز و تیره‌یل دامه‌زریه‌ێد و شێخه‌یل كورد فه‌یلى، ك یه‌یش چشت تازه‌یگه‌ له‌ ڕزه‌یلمان، چوینكه‌ ئه‌وانه‌ك داواى سه‌ركردایه‌تى هووز كه‌ن شماره‌یان له‌مه‌ردم هووزه‌گه‌ زیاتره‌ جوور ئه‌وه‌ك له‌ هه‌ڵوژاردنه‌یل ئى دویاخر ته‌شریعیه‌ دیمنه‌ى له‌به‌غدا، ئه‌را نموونه‌: شماره‌مان فره‌ زیاتره‌ له‌ بڕێگ له‌و لیسته‌یله‌ ك سه‌ركه‌فتن، وه‌لى ئیمه‌ چشتیگ جیوه‌جى نه‌كردیم دیار بوود، ساڵه‌یل و ده‌رفه‌ته‌یل فره‌یگ له‌كیسمان چى ئه‌را ئه‌وه‌ك بزانیم ك تویه‌نێد نوێنه‌رایه‌تیمان بكاو ژیان خوه‌ش ئه‌رامان دابین بكا له‌وانه‌ك وه‌ شانازیه‌و ئویشن ئیمه‌ فه‌یلییم.

 

كوڵ و كوڵبڕ ئیمه‌ تواناى قورتاربوین له‌ مه‌سه‌له‌ى ره‌گه‌زى و چینایه‌تى ریشگدار نه‌یریم له‌ى عراقه‌و تواناى ئه‌وه‌ نه‌یریم باوه‌ڕ وه‌ تیرۆریستیگ باریم ك خوه‌ى له‌ناوڕاس مه‌ردم بێتاوان نه‌ته‌قنێده‌و.

 

وه‌گووره‌ى قسه‌و باسیش، ناچار حكوومه‌ت نه‌كردیمنه‌ داواى وه‌خشین بكا، وه‌ بێده‌نگییش ناچار هویچ كونسوڵخانه‌یگ عراقى نه‌كردیمنه‌ له‌بان دووسیه‌یلمان جوور هاووڵاتیه‌یل یه‌كسان له‌هه‌ق وه‌ل كه‌سه‌یل تر و بایه‌د یه‌یش له‌ هویرمان نه‌چوود ك خاوه‌ن بڕیاره‌یل وه‌ به‌راورد وه‌ل سوپاى وه‌رپرسه‌یل و كارمه‌نده‌یل له‌ى عراقه‌ فره‌ نین، ك بیگومان ئیسه‌ ئیمه‌ دویریم له‌وه‌ك هویر له‌لى كه‌ن و باوه‌ڕ وه‌پى ئه‌یه‌رن، ئمجا خاستر ئه‌وه‌سه‌ یه‌كه‌مجار رێك بكه‌فیم و یه‌كه‌و بگریم وه‌رجه‌ ئه‌وه‌ك داوا له‌كه‌سه‌یل تر بكه‌یم وه‌لمانا بوون.

 

عه‌لى حوسێن فه‌یلى

 

ج. ا