سه‌خون داین وه‌كورد نه‌ریته‌ یا خو

شفق نيوز


وه‌ختێگ سه‌ددام له‌ ساڵ 1987 شار هه‌ڵه‌بجه‌ێ شه‌هید بوردومان كیمیاوی كرد ووت : تاقمه‌گه‌ێ تاڵه‌بانی سوپای ئێران هاوردنه‌سه‌ ناو عراق و فه‌وجێگ له‌ هێزه‌یل جه‌یش شه‌عبی وه‌ چه‌ك كیمیاوی كوشت و هه‌ر له‌وره‌ له‌ گوڕسانێگ ده‌سه‌جه‌می خاكیان كرد تا كه‌س نه‌زانێ.  
مه‌به‌سم له‌ێ پێشه‌كیه‌ ئه‌وه‌سه‌ په‌رله‌مانتاره‌یل ڕێزدارێگ جور عه‌لی ئه‌دیب و عه‌باس به‌یاتی ك ژنه‌ێ كورده‌ و عالیه‌ نسه‌یف و حه‌نان فه‌تلاوی و ناهده‌ داینی ته‌نیا ئه‌ركیان ئه‌وه‌سه‌ ، بگه‌ردنه‌ شوون كه‌مو كورتیه‌یل هه‌ریم و سه‌ركرده‌گانێ و له‌ میدیاگان گه‌ورایه‌و بكه‌ن و چمانی خوه‌یان له‌ وڵاتێگ پێشكه‌فتگ و شارستانی ژیه‌ن  و زانست و مه‌عرفه‌ت له‌ باپیره‌یلیان هوكاره‌ بوێنه‌.
په‌یوه‌ندی سیاسی وه‌ل وڵاته‌یل یا وه‌ل لایه‌نه‌یلتر وه‌ واتای دبلوماسیه‌ ، یانی ئایم بایه‌د قسه‌گانێ ڕه‌ین و پاك وباو بوون ، له‌وه‌ر ئه‌وه‌گ په‌یوه‌ندی دبلوماسی ، جورێگ په‌یوه‌ندی جه‌نگیه‌ ، وه‌لێ وه‌شێوازێگ نه‌رمتر، كیشه‌گه‌ هاله‌وره‌ ك ئیمه‌ هایمه‌ وه‌رده‌م كه‌سه‌یلێگ ك گشت چشتێگ خوه‌نستنه‌ بێجگه‌ زانست سیاسی ، ئمجا له‌وه‌ر ئه‌وه‌گ زه‌حمه‌ته‌ ده‌وره‌یل چڕوپڕ سیاسی و دبلوماسی ئه‌ڕایان بكه‌یده‌و ، خاستره‌ ئه‌وه‌سه‌ كه‌سه‌یل ئه‌ڵگر بڕوانامه‌ی زانست سیاسی له‌ شوونه‌گه‌یان دانه‌ێ تا بفامیده‌یان و بفامنه‌د.
ئایا ئه‌و په‌رله‌مانتاره‌یل  ته‌نیا ئه‌ركیان ئه‌وه‌سه‌ ، سه‌خون و قسه‌ێ ناشرین وه‌ سه‌ركرده‌یل هه‌ریم بكه‌ن و له‌ كه‌ناڵه‌ ئاسمانیه‌گان شیت شات بنه‌نه‌و تا مه‌ردم نه‌فام جور خوه‌یان فیكه‌ ئه‌ڕایان بكیشن  و چه‌پله‌ ئه‌ڕایان بكوتن ، ئه‌وانه‌ له‌خوه‌یانا هالی هانه‌ سه‌رده‌م ڕژیم به‌عس ، و ملله‌ت عراق ته‌نیا ته‌ماشای یه‌ك كه‌نال تلفزیونی ئه‌كا و شه‌و و ڕوژ سیمای ناشرین و قێزه‌وه‌ن (قاید زه‌روره‌) دوێنین .
ئمڕوژه‌ هه‌زاران له‌لێان ڕوی ئه‌كه‌نه‌ كوردستان پێشكه‌فتگ و شارستانی ، ئه‌ڕا چاره‌سه‌ر كردن نه‌خوه‌شیه‌یلیان و گه‌شتوگوزار و قورتار بوێن له‌ ده‌س تروریزم، ك ئمڕو شایان ئه‌وه‌سه‌ وه‌هه‌ریم كوردستان بوێشیم گوڵستان ، چوێن ڕوێ كه‌یده‌ هه‌ر شوون و شه‌قام وبازار و نه‌خوه‌شخانه‌ و پاركێگ گشتێ ئاوه‌دان و پاك و له‌ گشت گرنگتر ئارام و سه‌قامگیره‌.
ته‌نانه‌ت كه‌ركوكیش ك له‌ سه‌رده‌م  به‌عس له‌ ناوچگ دوچار كوشتن و برین و ته‌عریب و گشت سیاسه‌ته‌یل سه‌ركوت كه‌رانه‌ هات ، ئمڕو عه‌ره‌وه‌یل و توركمانه‌یل و نه‌ته‌وه‌ و تایفه‌یلتر شاره‌گه‌ له‌ هه‌ر بوونه‌ێگ ئاماده‌یی خوه‌یان نیشانده‌ن ئه‌ڕا ئه‌وه‌گ بده‌ونه‌ به‌شێگ له‌و وڵات ئاوه‌دانه‌ ك شایان ئه‌وه‌سه‌ بوێشیمه‌پێ گولستان.
ئاواره‌یل ئه‌نبار ك 600 كیلومه‌تر له‌ كوردستانه‌وه‌ دوێره‌ هاوار ئه‌كه‌ن له‌ به‌غدا ڕه‌یمان بكه‌ن و ئه‌ڕا هه‌ریم كوردستان كلمان بكه‌ن ، ئه‌و هه‌رێم تازه‌ پا گرتگه‌ ، بوێه‌سه‌ قبله‌گای گشت عراقیه‌یل و ئیوه‌ سه‌خوه‌نده‌ره‌یل هان حكومه‌ت ده‌ین تا مووچه‌ێ فه‌رمانبه‌ره‌یل كوردستان بوڕێ.
وه‌لێ كورد میوان نه‌وازه‌ و ئاماده‌س نانه‌گه‌ێ وه‌ل ئه‌وانه‌گ له‌لیان قومیاس بكه‌ێگه‌ دو كوته‌و ، وه‌خت مناڵی هاله‌ هوێرم به‌شێگ له‌ شام شه‌ومان ب وه‌پێ ووتیان (شام غه‌ریبان)  ك ئه‌و خوراكه‌ ئه‌ڕا ئه‌وانه‌ بوێ ك هه‌ژار و نیازمه‌ند بوێن.
له‌ كوتایی ئوێشمه‌ ئه‌وانه‌گ سه‌خوه‌ن ئه‌ده‌نه‌ كورد ، سه‌خون كیشه‌ و گرفته‌یل ئیوه‌ چاره‌سه‌ر ناكا ، بیه‌ن له‌ جی سه‌خون داین ، له‌ كورد یاگ بگرن چوێن وڵات و شار و ئاوایه‌یلدان ئاوه‌دانه‌و بكه‌ین ، ملله‌ت كوردستان وه‌بێ كاره‌با ناخه‌فێ و شه‌قامه‌یلیان پاك و ڕێك وپێكن ، ئیوه‌یش بان ده‌رس حكمه‌ت وپیشكه‌فتن له‌ێ ملله‌ته‌ هوكاره‌ بده‌ون ك له‌ ده‌ریای خوێن وه‌ره‌و كه‌نار ئارامی و ئاوه‌دانی په‌ڕیه‌سه‌و.

سه‌لاح مه‌نده‌لاوی
ج ك