دڵنیایى چه‌س؟

شفق نيوز

  دڵنیایى به‌رهه‌م گله‌وخواردن وزه‌یگه‌ ك ئاده‌میزاد تویه‌نستیاد له‌ وه‌رپه‌رچدانه‌وه‌ى هه‌ڕه‌شه‌یل ده‌ره‌كه‌ باوردیاده‌ى كار، وه‌لى له‌ ئاكام كه‌شیگ دڵنیابه‌خش و ئاسووده‌ییه‌و ك ئه‌و ئه‌و هه‌ڕه‌شه‌یله‌ له‌لى دویره‌و ئه‌خا ئه‌و وزه‌ ئه‌را وه‌رگرتن و یایگرتن و گه‌شه‌وه‌پیداین خوه‌ى تیه‌ریده‌ كار.

مه‌سه‌له‌ى خه‌نستن نه‌ك هه‌ر متمانه‌به‌خش و ئازادیبه‌خشه‌، به‌ڵكوو دڵنیاییش به‌خشید. ئنجا دڵنیایى ئه‌و وه‌خته‌یله‌سه‌ له‌ ئه‌زموون ژیان ك له‌تى ئاده‌میزاد هس وه‌ ئه‌وه‌ ئه‌كا ك هه‌ر چشتیگ ئه‌كا هه‌ر ئه‌وه‌سه‌و هه‌ر بایه‌سه‌ ئه‌نجامى بیه‌ید.

هسكردن وه‌ ئه‌وه‌ك من هامه‌ بان ڕى راس و دورسیگ و وزه‌ى خوه‌م ئه‌را پیشكه‌فتنم له‌ژیان و بواره‌گه‌م خه‌رج كه‌م و ئه‌نجام یه‌یش له‌ژیان و سه‌ركه‌فتنم دوینمه‌و، ئه‌یه‌ خوه‌ى له‌خوه‌ى ره‌سینه‌ وه‌ دڵنیایى.

زووانیگ ئه‌را ده‌رخستن ئى دڵنیاییه‌ له‌ بوار په‌روه‌رده‌ پیكهاتگه‌ له‌ خه‌نستن و شادى و به‌خته‌وه‌رى و تام وه‌رگرتن له‌ پرووسه‌ى هووكاره‌بوین و یایگرتن.

تاموه‌رگرتن، به‌رهه‌م ئسراحه‌ت و بیكارى نیه‌ ئه‌وه‌نه‌ى ئه‌وه‌ك به‌رهه‌م شه‌كه‌تبوینه‌. ئاده‌میزاد له‌ پرووسه‌ى په‌روه‌رده‌یى هه‌وه‌جه‌ وه‌ ئه‌وه‌ نه‌یرید هس وه‌ ئه‌وه‌ بكا هیچ چشتیگ ده‌سگیرى نیه‌ود، یا وه‌خته‌گه‌ له‌لى وه‌ تاڵان چوود یا خوه‌ى له‌ ئه‌ركه‌یل كوومه‌ڵایه‌تى دزیده‌و، هه‌وه‌جه‌ وه‌ ئه‌وه‌ دیرید هس بكا ك شه‌كه‌ت كریه‌ید و ئه‌رك ها له‌بانى.

له‌ سستمیگ په‌روه‌رده‌یى ئنسانى، تاكه‌كه‌س شه‌كه‌ت كریه‌ید، وه‌لى فشار ناخریه‌یده‌ بانى، به‌ڵكوو ئه‌و كه‌سه‌ خود خوه‌ى فشار ئه‌خاده‌ بان خوه‌ى وه‌بى ئه‌وه‌ك هس بكا كۆنترۆڵ ها له‌بانى، له‌وه‌ر ئه‌وه‌یش هه‌رچى ئه‌كاد تامبه‌خش و دڵنیابه‌خشه‌و تویه‌نید وه‌ خوه‌ى بویشید: ئه‌وه‌ك له‌ده‌سم هات، تویه‌نستم و ئه‌نجامى دام.

ریبوار سوه‌یلى

ج . أ