هه‌رێم كوردستان چوین بویه‌ قبڵه‌ى جه‌هان تازه‌؟

شفق نيوز

ئه‌زموون دیموكراسى فیدراڵى وه‌گووره‌ى ده‌ستوور عراقى، ئى كاریشه‌ له‌ئاكام ئه‌و قوربانى فره‌ ده‌ركه‌فت ك كورد پیشكه‌شى كرد، ك ئه‌وه‌سه‌ ئمڕوو له‌ساى ئه‌و ئه‌زموون سه‌ركه‌فتگه‌ ژیه‌ن وه‌شایه‌تى زوورم ده‌وڵه‌ته‌یل جه‌هان، یه‌یش بیجگه‌ ئه‌و سه‌قامیرى خاسه‌ له‌بار ئاسایش له‌هه‌رێم ك وه‌ل ئه‌وه‌یشا هه‌ولێر پایته‌خت و پاریزگایه‌یلى جموجویلیگ پیشكه‌فتگ له‌ڕوى بنیاتناین و مه‌یدان سه‌رمایه‌گوزارى وه‌خوه‌یه‌و دیه‌ بیجگه‌ خاسبوین كاره‌باو ئاو و دامه‌زرانن پیه‌ڵه‌یل و خاسسازى ڕى وبان و جاده‌یلى.

 

هه‌رێم كوردستان شوونیگ ستراتیجى و سروشتیگ جوان گرتيه‌سه‌ خوه‌ى تاڕاده‌یگ ك مه‌یل ده‌وڵه‌ته‌یل جه‌هان كیشاگه‌ وه‌ره‌و خوه‌ى، هه‌ر له‌وه‌ر ئه‌وه‌یش له‌لایه‌ن ریكخریاگه‌یل ناوده‌وڵه‌تیه‌و داواكارى فه‌رمى ئه‌را تیه‌ێد جوور داواكارى كۆنگره‌ى ناوده‌وڵه‌تى ئه‌را بازرگانى و سه‌رمایه‌گوزارى ك ئامانج له‌لى ئاشكراس له‌باوه‌ت به‌شداریكردن له‌و كۆنگره‌ ك له‌1/ئایار ئاینده‌ له‌میرنشینیه‌یل یه‌كگرتگ  ساز كریه‌ێد وه‌به‌شدارى 72 ده‌وڵه‌ت، ئنجا ئى داواكاریه‌ رویدایگ گرینگیگه‌ له‌بان ئاست په‌ره‌داین په‌یوه‌ندیه‌یلا بازرگانى له‌ناونى هه‌رێم كوردستان و عراق و ناونى ده‌وڵه‌ته‌یل جه‌هان، یه‌یش بیجگه‌ ئه‌وه‌ك ده‌رفه‌ت خاسیگه‌ ئه‌را خستنه‌ڕوى به‌رنامه‌یل فره‌یگ له‌لایه‌ن وه‌رپرسه‌یل له‌ وزاره‌ت بازرگانى هه‌رێم له‌باوه‌ت وجوود ده‌رفه‌ت سه‌رمایه‌گوزارى له‌هه‌رێم كوردستان و له‌وه‌ر خاتر كیشانن كومپانیایه‌یل جه‌هانى و عه‌ره‌بى ئه‌را مه‌سه‌له‌ى سه‌رمایه‌گوزارى له‌هه‌رێم.

 

وه‌ل ئه‌وه‌یشا ریكخریاگ گه‌شت وگوزار جه‌هانى سه‌ر وه‌نه‌ته‌وه‌یل یه‌كگرتگ كۆنگره‌یگ گه‌شت وگوزار جه‌هانى ریكخست له‌مه‌درید پایته‌خت ئسپانیاو ده‌سه‌ى گه‌شت و گوزار له‌هه‌رێم كوردستانیش وه‌ شاندیگ له‌تى به‌شدارى كردو ئه‌و شانده‌ تویه‌نست په‌یوه‌ندى وه‌ل چه‌ن ده‌وڵه‌تیگ به‌شدار دروس بكا له‌باوه‌ت كه‌رت گه‌شت وگوزارى و له‌هه‌مان وه‌خت كومپانیایه‌یل مه‌یدان گه‌شت وگوزار ئاماده‌یى خوه‌یان نشاندان ئه‌را هاتن وه‌ره‌و هه‌رێم. هه‌ر له‌وه‌ر ئه‌وه‌یش سكرتێر گشتى ریكخریاگه‌گه‌ له‌وتاره‌گه‌ى له‌و كۆنگره‌ ئشاره‌ت كرده‌ ئه‌وه‌ك هه‌رێم كوردستان ناوچه‌یگ گه‌شتیارى پیشكه‌فتگه‌ له‌خوه‌رهه‌ڵات ناوڕاس و شایسته‌ى گرینگداین ریكخریاگه‌یل ناوده‌وڵه‌تیه‌ وه‌پى. بیجگه‌ ئه‌وه‌یش سكرتێر گشتى ریكخریاگه‌گه‌ ئه‌وه‌یش ده‌رخست ك هه‌رێم جوور ئه‌ندامیگ له‌تى وه‌رگیریه‌یدو گشت هه‌ق و ئه‌ركه‌یلى یه‌كسانه‌ وه‌ل ده‌وڵه‌ته‌یل ئه‌ندام ك ئى ریكخریاگ گه‌شتیارى جه‌هانیه‌ نوێنه‌رایه‌تى(155)ده‌وڵه‌ت و(355)ریكخریاگ و كومپانیاو ئه‌كا له‌جه‌هان.

 

له‌لایگ تره‌و له‌بان ئاست په‌یوه‌ندیه‌یل ناونى هه‌رێم و ریكخریاگه‌یل ناوده‌وڵه‌تى، وكاله‌ى ناوده‌وڵه‌تى هانایه‌یل ئه‌مریكى دانیشتنیگ وه‌رفراوان له‌هه‌ولێر ریكخست ك له‌تى وه‌زیر كار و كاروبار كومه‌ڵایه‌تى له‌حكوومه‌ت هه‌رێم و نوێنه‌ر وزاره‌ته‌یل په‌یوه‌ندیدار له‌تى ئاماده‌ بوین، ك یه‌یش ته‌ئكیدیگه‌ له‌بان هاوكارى و ریككه‌فتن له‌ناونى حكوومه‌ت هه‌رێم و ریكخریاگه‌یل ناوده‌وڵه‌تى ئه‌را وه‌ڕیه‌وبردن كاره‌یل وه‌تایبه‌ت له‌مه‌یدانه‌یل كوومه‌ڵایه‌تى.

 

له‌و ده‌وڵه‌ته‌یلیشه‌ ك ئاماده‌ بوین هاوكارى وه‌ل هه‌رێم كوردستانا بكه‌ن، ریكخریاگ یه‌كێتى ئۆرپى بوى ك شاندیگى سه‌ردان هه‌رێم كرد ئه‌را ته‌ماشاكردن بار هه‌رێم و ئاشكراكردن ئامانج به‌رنامه‌یل ئاینده‌ى ئه‌را وزاره‌ت نه‌خشه‌كیشان. بیگومان ده‌ور نوێنه‌رایه‌تى یه‌كێتى ئۆرپى جوور پیه‌ڵیگه‌ ئه‌را هاوكارى و ریككه‌فتن وه‌ل حكوومه‌ت هه‌رێم و هه‌ر له‌وه‌ر ئه‌وه‌یش خوازیار پشتگیریكردن بوى له‌حكوومه‌ت هه‌رێم كوردستان له‌ى لایه‌نه‌و.

 

محه‌مه‌د عه‌لى سه‌ماوى

ج