زه‌نگه‌نه‌: هه‌ڵويست عه‌ره‌ب و ده‌زگايل ره‌سانن له‌باره‌ی مه‌سه‌له‌ی كورده‌يل فه‌يلی له‌ ئاست گوجياگ نه‌ويه‌

شفق نيوز

ناونيشان(په‌يوه‌نديه‌يل كوردی- عه‌ره‌بی له‌ ده‌يشت هه‌رێم كوردستان) و وه‌ ئاماده‌بوين عه‌بدولخالق زه‌نگه‌نه‌ وه‌رپرس په‌يوه‌نديه‌يل كوردی- عه‌ره‌بی له‌ به‌غدا و ئه‌ندام وه‌رين په‌رله‌مان ڕێكخست.

له‌سه‌ره‌تای كۆڕه‌گه‌ وه‌رپرس په‌يوه‌نديه‌يل كوردی- عه‌ره‌بی له‌ به‌غدا وته‌‌يگ پێشكه‌ش كرد و له‌تی ئشاره‌ت كرده‌ په‌يوه‌نديه‌يل ناونی دو نه‌ته‌وه‌گه‌ و خاسی و خراويه‌يل له‌سه‌رده‌م عوسمانيه‌يل تا ئيسه‌ و له‌هه‌مان وه‌ختيش له‌ هه‌ڵويست سياسيه‌يل ئه‌را كار كردن ئه‌را مه‌سه‌له‌ی كورد وه‌گشتی و سه‌ختييه‌يل كورد فه‌يلی وه‌تايبه‌ت ره‌خنه‌ گرت.

عه‌بدولخالق زه‌نگه‌نه‌ و‌ت: خه‌بات نه‌ته‌وه‌يل كورد و عه‌ره‌ب له‌ خه‌بات چه‌كدارانه‌ی كورد وه‌ سه‌رۆكايه‌تی بارزانی نه‌مر نيشان ده‌يگ ك ئستراتيژی ئه‌ی خه‌باته‌ سه‌روه‌خوه‌يی گشت عيراق بويه‌ نه ‌ته‌نيا هه‌رێم كوردستان.

هه‌ميش ئعلان كرد: دروشم خه‌بات كورد، ديموكراسی ئه‌را عراق و مافه‌يل نه‌ته‌وه‌ی كورد بوی وه‌لی هێزه‌يل سياسی عيراق له‌وه‌راوه‌ر ئه‌ی دروشمه‌ هه‌ڵوێست تونديگ نيشاندان و لايه‌نه‌يل شوڤينی عه‌ره‌ب تويه‌نستن عه‌بدولكه‌ريم قاسم رازی بكه‌ن ك هێرش بكاده‌ بان ملله‌ت كورد، ئه‌وه‌يش له‌وه‌ختيگ فيشتر لايه‌نه‌يل عه‌ره‌ب له‌دژ ئه‌ی جه‌نگه‌ بوين و فيشتر سياسه‌تمه‌داره‌يل و رووشه‌نهويره‌يل عه‌ره‌ب وه‌خاتر به‌رزه‌وكردن دروشم (ئاشتی وه‌ل كوردستان) زندانی كريان.

زه‌نگه‌نه‌ هه‌ميش له‌ هه‌ڵوێست مه‌رجع دينی موحسن حه‌كيم ستايش كرد ك وه‌ توندی له‌دژ فه‌توای حه‌ڵاڵكردن خوين كورده‌يل و بڕيار ده‌سه‌ڵات ديكتاتۆری ئه‌را كوشتار كورده‌يل وسا و ئه‌ی وته‌ی تاريخيه‌ و‌ت ك(كورد موسڵمانه‌ و كوشتنی حه‌رامه‌).

ناوبرياگ هه‌ميش ئاماژه‌ كرده‌ سه‌ختييه‌يل كورد فه‌يلی و و‌ت: عه‌ره‌ب عێراق له‌وه‌راوه‌ر ئه‌و تاوانه‌يله‌ ك له‌دژ كورده‌يل فه‌يلی ئه‌نجام گرت جوور كوشتن و ئاواره‌ كردن و بردن داراييه‌يل و ماڵ و مۆڵكيان و بیبه‌ش كردنيان له‌گشت هه‌قه‌يليان ئعلان داخ و په‌ژاره‌ كردن وه‌لی نه‌ڕه‌سينه‌سه‌ قوناغ ئيدانه‌كردن و تاوانباركردن ئه‌ی كرده‌وه‌يل نائنسانيه‌ ك له‌دژ ئه‌ی پێكهات مه‌زڵوومه‌ جيوه‌جی كريا و له‌هه‌مان وه‌ختيش له‌ ده‌زگايل ره‌سانن كوردی وه‌خاتر گرنگی نه‌داين وه‌ مه‌زڵوميه‌ت كورده‌يل فه‌يلی ره‌خنه‌ گرت.

زه‌نگه‌نه‌ هه‌ميش له‌ كزه‌وبوين ئاست په‌يوه‌ندييه‌يل كوردی-عه‌ره‌بی ئه‌را ئاست جمشه‌يل مه‌ردمی و ته‌نيا ئه‌و كه‌سه‌يله‌ ك وه‌ل باوه‌ت كورد هاوده‌ردی كه‌ن ئعلان داخ و په‌ژاره‌ كردن و و‌ت: ئه‌ی وه‌زعيه‌ته‌ بويه‌سه‌ بايس وه‌دیهاتن هه‌ڵوێسته‌يل شوڤێنييگ له‌لای هه‌ردولا.

ناوبرياگ ره‌سانن كوردی وه‌ وه‌رپرس زانست چوينكه‌ له‌ ناسانن باوه‌ت كورد و مافه‌يليان كه‌مته‌رخمی كردگه‌ و هه‌ميش له‌ كار سياسی و لاوازبوين چوارچيوه‌ی كومه‌ڵايه‌تی له‌ناونی عه‌شيره‌ته‌يل كورد و عه‌ره‌ب ره‌خنه‌ گرت و له‌هه‌مان وه‌ختيش جه‌خت كرد نه‌خش كورديش گرنگه‌ ئه‌را بته‌وكردن په‌يوه‌ندييه‌يل له‌ ئاسته‌يل سياسی و كومه‌ڵايه‌تی و رووشنهويری.

وه‌رپرس په‌يوه‌نديه‌يل كوردی- عه‌ره‌بی له‌ به‌غدا له‌باره‌ی شيويان سيستم فيدراڵی وڵات وشدار دا ئه‌گه‌ر هه‌رێميگ تر وه‌گوره‌ی ئه‌زموون هه‌رێم كوردستان نه‌دامه‌زريه‌يگ و له‌هه‌مان وه‌ختيش و‌ت: سيستم فيدراڵيه‌تيگ كورد ئه‌را وه‌ده‌سهاوردنی ته‌قالا كه‌ێد وه‌پێچه‌وانه‌ی بڕيگ لايه‌نه‌يل ته‌نيا وه‌گوره‌ی ديدگای نه‌ته‌وه‌يی نيه‌ به‌ڵكم سيستم جه‌هانيگه‌ ك له‌ گشت وڵاته‌يل پيشكه‌فتگ وه‌كار بريه‌يگ.

له‌ كوتايی كۆڕه‌گه‌يش له‌بان ئه‌ی چه‌ن ته‌وه‌ره‌ جه‌خت كريا:

ره‌خنه‌گرتن پاوه‌جی و گفتوگوو وه‌رده‌وام بووده‌ بايس سه‌ركه‌فتن په‌يوه‌نديه‌يل ناونی هه‌ردو نه‌ته‌وه‌ی كورد و عه‌ره‌ب.

بايه‌د دراسه‌ و له‌يه‌كه‌وداينه‌يل فره‌يگ له‌باره‌ی په‌يوه‌نديه‌يل ناونی نه‌ته‌وه‌يل كورد و عه‌ره‌ب ئه‌نجام بگرێ چوينكه‌ په‌يوه‌نديه‌يل ناونی هه‌ردولا بته‌وه‌و بويه‌.

نگرانی له‌ ده‌سوه‌پی كردن جه‌نگ و ناكووكی له‌ ناونی كورد و عه‌ره‌ب له‌ناوچه‌يليگ ناكووكی هاله‌بانيان وه‌تايبه‌ت له‌شوون دوياكيشان هێزه‌يل ئه‌مريكی له‌ كووتايی ئمساڵ.

ئاگادارنه‌وين بڕيگ له‌لايه‌نه‌يل عه‌ره‌ب له‌ كێشه‌ی كورد وه‌خاتر سياسه‌ت خراو ده‌سه‌ڵاته‌يل يه‌ك له‌شوون يه‌ك له‌ عيراق.