برایی وه‌ خوينه‌ نه‌ وه‌ دین

شفق نيوز

ئمجا هه‌رکه‌س خوينی له‌ ئیمه‌ جیاس، یانی ك له‌ توخم باوگ و داڵگ ئیمه‌ نیه‌، شایه‌د هاووڵاتی ئیمه‌س، وه‌لی هاوخوين و هاونه‌ته‌وه‌ی ئیمه‌ نیه‌و له‌ توخماره‌و له‌ نژاد جیایگه‌. ك هه‌ر وه‌و خاتريشه‌ بيلا ئه‌وه‌ فه‌رامووش نه‌که‌یم ك باوگ و باپیره‌یلمان چه‌ وتنه‌؟ وتنه"ئیمه‌ گووشت یه‌کتر خوه‌یمن وه‌لی سقان یه‌کترى ناشكنيم".

بيگومان برایی و هاوخوينی له‌ ڕووژ ته‌نگی خوه‌ی نیشان ئه‌ياد، بايه‌سه‌ شه‌وه‌يش بزانيم ئیسه‌ ك تويش جه‌نگ هاتیمنه‌و ئى جه‌نگيشه‌ ده‌رماڵمان گردیه‌، دووسمان کیه‌و دوشمنمان کیه‌؟ ئمڕوو هه‌رکه‌س جیا له‌ دین و باوه‌ڕ په‌لامارمان بیه‌يد، کوڕمان بکوشيد، دويه‌تمان بڕواکنی و ماڵمان کاول بکا، ئه‌وه‌ دوشمنمانه‌، ئه‌وه‌كيش ئمڕوو کومه‌کمان بکاو په‌نامان بیه‌يد و خاسی ئه‌ڕامان بکا، ئه‌وه‌ دووس و برامانه‌.

هه‌ر وه‌و خاتريشه‌ له‌ی چه‌ن مانگه‌ خاس دیاردا له‌ جه‌له‌ولا و که‌رکووک تا شنگال و کۆبانی کی په‌لامار کورده‌یل شیعه‌، سنی، کاکه‌یی و ئێزيدی ئه‌ياد و دیاريش دا کی خوينی ئه‌ڕا کورده‌یل شیعه‌، سنی، کاکه‌یی و ئێزيدی ڕشنيد.

ئیسه‌ ئه‌ڕا گشتمان خاس ده‌ركه‌فت ك ته‌نیا کورد ئه‌تويه‌نيد له‌ کورده‌يل وه‌رگری بکا و بیجگه‌ کورد مه‌ردم تر ئاماده‌ نیه‌ خوينی ئه‌ڕا کورد بڕشنيد و گيانفيدای خوه‌ی بكا.

ئمڕوو له‌ جه‌له‌ولا تا كۆبانی ڕووڵه‌یل کوردن ك له‌ ناو یه‌ی سه‌نگه‌ر وه‌ل دوشمن جه‌نگ ئه‌که‌ن، ماناى يه‌سه‌ ك هه‌رچه‌نى ئاينمانيش جياجياس، وه‌لی گشتمان کوردیمن و ڕووڵه‌ی کوردستانيم و وه‌رگری له‌لی ئه‌كه‌يم، هه‌ر له‌وه‌ر ئه‌وه‌يش ئويشيم: بژیه‌ی کورد و بژیه‌ی کوردستان، بمريد دوشمن کورد و کوردستان.

رزگار به‌هادور

ج . أ