نه‌ورووز یه‌كه‌م ڕووژ وه‌هار

شفق نيوز

ك له‌ى تاریخه‌ ڕووژ و شه‌و یه‌كسانه‌و بوود. نه‌ورووز بوونه‌و یادگارییگ تاریخیه‌، ك له‌لاى مه‌ردم كورد خوه‌مان وه‌"عه‌ید كورد" تاریف كریه‌ێدو بیجگه‌ ئه‌وه‌یش نه‌ته‌وه‌یل تر بیگانه‌یش په‌یوه‌سن وه‌پیه‌و، داستان "كاوه‌"ى ئاسنگه‌ر له‌ى رووژه‌ ئاشكراس له‌لاى گشت كوردیگ ك زوڵم و زوور "زه‌حاك" له‌ناوبرد، جه‌م رووژه‌یل مانگ ئازار 30 رووژه‌، وه‌لى سه‌ره‌تاى نه‌ورووز كه‌فێده‌ ده‌ رووژه‌ى دویاخر ئازار و ناونى مانگ "ڕه‌شه‌مێ"ى كوردى، دیمه‌ن و جوانى دڵڕفن كویه‌و باخ و چه‌مه‌یل كوردستان وه‌رگ سه‌وز پووشن و گوڵه‌نه‌رگس وه‌ بوو خوه‌ش و ڕه‌نگ زه‌ردو چه‌رمگه‌و جوانى وه‌هار ڕازنیده‌و، هه‌وارگه‌و چه‌مه‌نگاى كوردستان باوه‌ش ئه‌را مناڵ و گه‌وراو ژن و پیاو كه‌نه‌و، ده‌نگ بوڵبوڵ و هاژه‌ى ئاو چه‌مه‌یل و ئاواز خوه‌شیگ دروس كه‌ن، زرمه‌ى سازده‌وڵ و هه‌ڵپه‌ڕگه‌ى كوردى و به‌یت و بالویله‌ى ده‌نگ خوه‌شه‌یل سروود(ئه‌ى ره‌قیب)دڵدار شاعر نه‌ته‌وه‌ى كورد زینگه‌و كه‌ن، نه‌ورووز رووژ گه‌ردن ئازایى و دڵپاكیه‌، ده‌سه‌ ده‌سه‌ دویه‌ت و كوڕ وه‌جنگ ڕه‌نگامه‌ى كوردیه‌و ساڵیاد ئى رووژه‌ تازه‌وه‌ كه‌ن، ده‌مه‌و خوه‌رنشین ئیواره‌ى 20 ئازار دویكه‌ڵ ئاگر له‌گشت ناوچه‌یگ كورده‌وارى ڕوى ئه‌كاده‌ ئاسمان كورد، نه‌ورووز جه‌ژن نیشتمانى و هێماى نه‌ته‌وه‌یى و رووژ پیرووز ملله‌ت كورده‌.

دویاى 13 رووژ له‌نه‌ورووز ك له‌كورده‌وارى خوه‌مان وه‌پى ئویشیم"سێنزه‌ وه‌ده‌ر" دوباره‌ خیزانه‌یل كورد خوه‌یان پیچنه‌وه‌و چنه‌ گه‌شت و قوڕى و پیاڵه‌و سه‌ماوه‌ر وه‌ل خوه‌یانا به‌ن ئه‌را ده‌یشت و ده‌ر و ئه‌و رووژه‌ تا ئیواره‌ له‌ كه‌یف و سه‌فا ژیه‌ن. وه‌لى له‌یره‌ ئى رووژه‌ كه‌فێده‌ ناو مانگ گوڵان. ئمجا هه‌یژده‌ رووژ یه‌كه‌م وه‌هار له‌ كورده‌وارى ناسریاگه‌ وه‌"سێ شه‌ش"، یه‌یش ماناى ئه‌وه‌سه‌ له‌ى ماوه‌ تاوتاویگ هه‌وا ئاڵشت بوود، وه‌ جووریگ ك شه‌ش ڕووژ له‌لى وارانه‌و شه‌ش ڕووژیشى هه‌واى سه‌ردو زقومه‌و شه‌ش ڕووژیش له‌لى خوه‌ره‌تاویه‌.

پیشینه‌یل كورد خوه‌مان چنه‌ باس كردنه‌، ك تا نزیكه‌ى بیس رووژ له‌وه‌هار وه‌خت قڕانه‌، هه‌ڵبه‌ته‌ ئى قڕانیشه‌ مه‌ڕو ماڵات فره‌یگ له‌ناو ئه‌واد، چوینكه‌ سه‌ردى پیره‌ژنیش هه‌ر كه‌فێده‌ ئى رووژه‌یله‌و ئه‌وسایش دیاره‌ شوانه‌یل كورد له‌وه‌خت وه‌فروارین په‌س وپووڵه‌یان ده‌ركردنه‌ وه‌ره‌و له‌وه‌ڕگاو دى وه‌رگه‌ى وه‌فر و سه‌ردى و زوقم ئه‌و رووژه‌یله‌ نه‌گردنه‌و فره‌یگ له‌ په‌سه‌یلیان مرداره‌و بویه‌و هه‌ر له‌وه‌ر ئه‌وه‌یش وه‌ وه‌خت قڕان تاریفى كردنه‌.

وه‌هار و نه‌ورووز هه‌ر له‌ ئه‌زه‌ڵه‌و ئاشق و ماشق بوینه‌و، كورد و نه‌ورووزیش دووس و دوڵبه‌رن.

 

ج. عه‌لى میرى