عراق ئیسه‌و هه‌زار دز

شفق نيوز

بیجگه‌ حاڵه‌ت نائومیدى و نیگه‌رانى ك هاته‌سه‌ تویش پرووسه‌ى سیاسى له‌ده‌رنه‌كه‌فتن دیدو رینمایى خاسیگ له‌دیاریكردن هووكاره‌یل ئه‌و سه‌ختیه‌ ك عراق وه‌ده‌سیه‌و گرفتار بویه‌ دویر له‌ به‌رژه‌وه‌ندى چینایه‌تى یا مه‌زه‌وى و دینى و حزبى.

 

ئه‌و ناله‌بارى ومه‌ینه‌ته‌ ك هاته‌سه‌ تویش مه‌یدانه‌یل ژیان هه‌وه‌جه‌ وه‌ روحیه‌ت نازگیگ دیرێد دویر له‌ تویڕه‌یى و سه‌ختى، به‌ڵكوو بایه‌سه‌ روحیه‌تیگ بوود خوه‌ى له‌ وه‌رپسیاریه‌تى و مقه‌یه‌تیكردن و به‌رژه‌وه‌ندى ملله‌ت بوینێده‌و دویر له‌ كینه‌ت و دویره‌وخستن و ژه‌هراویكردن كه‌ش سیاسى وه‌ ته‌م و گه‌رده‌لویل زه‌رد ك خزمه‌ت وه‌رینمایى خاسیگ ناكا.

 

عراق ئمڕوو بویه‌سه‌ شوونیگ ئه‌را دروسكردن قه‌یرنه‌یل و مه‌كینه‌یگه‌ ئه‌را دروسكردن گه‌ناته‌كارى سیاسى و گه‌ناته‌كارى دارایى، ئه‌را نموونه‌: ئاماره‌یل ره‌سمى ئشاره‌ت وه‌ وجوود(7)ملیۆن بیكار كه‌ن و له‌هه‌مان وه‌خت ئشاره‌ت وه‌ ئه‌وه‌یش كه‌ن ك 30%مه‌ردم له‌ژیر خه‌ت فه‌قیرى ژیه‌ن و هویچ خزمه‌تگوزارییگ ئابوورى و كوومه‌ڵایه‌تى نه‌كریاگه‌و له‌وانه‌یش نه‌خوه‌شخانه‌یل ره‌سمى جوور نه‌خوه‌شخانه‌یل سه‌ده‌ى ناوڕاسن.

 

ده‌زگایه‌یل زانستى هس وه‌ كزى وجوودیان كه‌ن، ئه‌را نموونه‌: زیایبوین خوندنگایه‌یل خه‌ڕگین و نه‌وین ته‌خت ئه‌را دانیشتن خوه‌ندكاره‌یل و تیكه‌ڵبوین له‌ په‌یڕه‌وه‌یل و ده‌وام ره‌سمى و قه‌یرانه‌یل تر ك گرفت گه‌وراى هاووڵاتیه‌یله‌ بیجگه‌ قه‌یران كاره‌با ك هه‌رچه‌نى قه‌وڵ خاسه‌وكردنى دریه‌ێد پابه‌ند نیه‌ون وه‌ قه‌وڵه‌یلیان و نیه‌زانیم چاره‌سه‌رى چوین كریه‌ێد ك وه‌رجه‌ رووژه‌یلیگ ته‌سریحیگ له‌لایه‌ن وزاره‌ت كاره‌با دریا له‌ى باوه‌ته‌و ك گوایا وه‌یه‌كجارى چاره‌سه‌ر بوود له‌تاوسان 2013، ك وه‌ى خاتره‌ ده‌وڵه‌ت عراق(30)ملیار دۆلار خه‌رج كردگه‌و تائیسه‌ چاره‌سه‌ر نه‌كریاگه‌و له‌ ئاینده‌ى ئومید خاسسازى دیرێد.

 

ئه‌گه‌ر بویشیم عراق ئه‌را یه‌كه‌مجاره‌ چووده‌ ناو جه‌هان كاره‌باو چراخ و نه‌فت تیه‌رێده‌ كار و هیمان وزه‌ى كاره‌با تاقیه‌و نه‌كردگه‌، ئه‌ى ئى هه‌مگه‌ ملیاره‌ها پویله‌ به‌س نیه‌ ئه‌را چاره‌سه‌ر قه‌یران و كاره‌باگه‌ى؟ وه‌لى مه‌سه‌له‌ى گه‌ناته‌كارى كاریگه‌رى فریه‌یگ كردگه‌ له‌ى لایه‌نه‌و، وه‌ل ئه‌وه‌یشا دوینێد بڕیار ئى دویاخر حكوومه‌ته‌ ئه‌را هاووڵاتیه‌یل ئه‌وه‌ بوى هه‌ر ماڵیگ چه‌كیگ داشتوود، ك یه‌یش نیشانه‌یگه‌ ئه‌را شكه‌ست حكوومه‌ت له‌لایه‌ن دابینكردن ئاسایش و سه‌قامگیرى ك عراق وه‌شیوه‌یگ ره‌سمى خریه‌ێده‌ ناو ده‌ستوور دارسانه‌یل.

 

په‌رله‌مان ئیسه‌یش ك زووانحاڵ و ده‌نگ ملله‌ته‌، خه‌ریك بویه‌ وه‌ جواو ئه‌و چه‌وچه‌ ك ئویشێد"خا له‌ مامره‌، یا مامر له‌ خا"س؟؟ داواكاریك له‌خوداى گه‌ورا ك سه‌بر به‌ێده‌ ئه‌ندامه‌یل قه‌رله‌مان ئه‌را چاره‌سه‌ر ئه‌و ته‌ڵسمه‌ تا وه‌خت داشتوون ئه‌را ئه‌ركه‌یل تر ك ئه‌ویش چاره‌سه‌ر گرفت و كیشه‌ى هاووڵاتیه‌یله‌و دراوردن پرووسه‌ى سیاسیه‌ له‌ شكه‌ست و داناین مه‌رزیگه‌ ئه‌را گه‌ناته‌كارى و گشت راسییگ ده‌ربخا ئه‌را ملله‌ت ك ئى هه‌مگه‌ پویله‌ چوین وه‌تاڵان چى و ئاشكراى دز و جه‌رده‌یلى بكاو مه‌رزیگ دابنه‌ێد ئه‌را ئه‌وه‌ك سه‌رپیچى له‌ده‌ستوور نه‌كریه‌ێدو گشت لایه‌نه‌یل حورمه‌تى بگرن و په‌رله‌مان ملله‌ت ده‌سى خالى بوود ئه‌را بنیاتناین و خاسسازى ژیرخان ئابوورى وڵات و ئه‌و ریككه‌فتن و ئمزانامه‌یل ساخته‌و دروكانیه‌ وه‌ل كومپانیایه‌یل دروكانیه‌ ك وجوود نه‌یرن ته‌نیا له‌بان وه‌رقه‌ نه‌ود ئاشكرا بكا.

 

وه‌ل ئه‌وه‌یشا گرینگى به‌ێده‌ خزمه‌تكردن گشتى و پیسى و زبڵدانه‌یل له‌گشت شوونیگ لاوه‌یدو ئه‌وه‌یش بزانید ك عراق بویه‌سه‌ خراوترین ده‌وڵه‌ته‌یل جه‌هان له‌لایه‌ن نه‌وین خزمه‌تگوزارى و ئاسایش و بزانێد ك عراق وڵات چه‌پاوكردن و دزى و جه‌رده‌ییه‌ له‌ساى نه‌وین یاساو پرس وپرسكارى و چه‌ودیرى په‌رله‌مانى و زوورم سه‌ركرده‌ى ئمڕوو عراق ك بڕیار سیاسى ها ده‌سیان تاڕاده‌ى فره‌یگ جوور مه‌ته‌ڵه‌گه‌ى"عه‌لى باباو چل دزه‌گه‌"ن، ك تا دویه‌كه‌ هه‌وه‌جه‌ وه‌ دیناریگ داشتن و ئمڕوویش وازى وه‌ دۆلار كه‌ن و گشت مه‌ینه‌تیه‌یل ملله‌ت له‌هویره‌و بردن.

 

هه‌ر له‌وه‌ر ئه‌وه‌یش عراق ئمڕوو هه‌وه‌جه‌ وه‌ ئه‌وه‌ دیرێد ده‌س به‌زه‌یى ئه‌ڕاى دریژ بكریه‌ێدو ملله‌ته‌گه‌ى له‌ده‌س دز و جه‌رده‌ قورتار بوون ك گشت خه‌وه‌یل و ئاره‌زووه‌یلیان دزریاگه‌.

 

 

 

جومعه‌ عه‌بدوڵڵا

ج