هه‌ڵقه‌ی برا تويته‌!

شفق نيوز

 

كوڕ و دويه‌ت له‌ قوناغ ده‌زويرانی له‌ڕی وه‌كارهاوردن هه‌ڵقه‌ی ده‌زويرانی گاميگ وه‌ره‌و ژيان هاوسه‌ری دابين ئه‌كه‌ن و مێژوويش گوزه‌ركردن ئه‌و رووژه‌يل ده‌زويرانيه‌ وه‌ يادگاريه‌يل خوه‌شيگه‌و ئه‌را بانانيان ئه‌خاده‌ ناو لاپه‌ڕه‌يل ته‌ڵايی خوه‌ی.

هه‌ر وه‌و خاتريشه‌ دوينيم وه‌ گووره‌ی داب ونه‌ريت باو، هيمان هه‌ڵقه‌ی ده‌زويرانی نه‌خش كاريگه‌ريگ ديريد له‌ی مه‌سه‌له‌و يه‌كيگه‌ له‌ سفه‌ته‌يل په‌يڕه‌وكرياگ له‌ ناو كوومه‌ڵگايه‌يل، ئمجا له‌په‌نجه‌كردن ئه‌و هه‌ڵقه‌يشه‌ جوور زه‌مانه‌تكردن هه‌ڵبژارده‌ی ژيانده‌ ئه‌را ئاينده‌و پيرووزی تايبه‌تيگيش ديريد له‌ ژيان جايه‌ڵ جوانه‌يل و له‌ناو خيزان هه‌ردوگلا.

داب ونه‌ريت كوومه‌ڵگايه‌يل له‌يواسه‌ سه‌ره‌تا له‌وه‌خت دياريكردن يا نيشانناين جوور ريز و حورمه‌تيگ ئه‌را هه‌ردوگلا هه‌ڵقه‌ی ده‌زويرانی بكريه‌يده‌ ده‌س راس و كورد وه‌ته‌نی بكريه‌يده‌ په‌نجه‌ی "برا تويته" تا كاره‌گه‌ ئاشكرا بدێ و مه‌ردم بزانيد وه‌و كار خه‌يره‌، دی وه‌ گووره‌ی نه‌ريت په‌يڕه‌وكرياگ دويای ماوه‌يگ تر له‌وه‌ختيگ ئه‌و كوڕ و دويه‌ته‌ ماره‌بڕان ئه‌كه‌ن و ئه‌چنه‌ ناو ژيان ته‌ڵايی هاوسه‌رگيريه‌و، هه‌ر يه‌كه‌م رووژ بايه‌سه‌ ئه‌و هه‌ڵقه‌ له‌ ده‌س راس دراريد و بكه‌يده‌ی ده‌س چه‌پ له‌ هه‌مان په‌نجه‌.

وه‌لی له‌يرا دوينيم مه‌ردمان فريه‌يگ حاشا له‌و بنه‌مای پڕ له‌ يادگاری و ئه‌و هه‌ڵقه‌ی پيرووز برا تويته‌ ئه‌كه‌ن ك رووژگاريگ شانازی وه‌پيه‌و كردنه‌!! هه‌ر وه‌و خاتريشه‌ دوينيم دويای دابينكردن ژيان هاوسه‌رگيری يه‌كسه‌ر ئه‌و هه‌ڵقه‌ له‌ په‌نجه‌ كه‌نن و فڕه‌ی ئه‌يه‌نه‌ شوونيگ مه‌گه‌ر وه‌ ريككه‌فت بوينيده‌ی چه‌و!

ئيمه‌ زانيم رووژگاريگ ئه‌زره‌ت جايه‌ڵه‌يل ئه‌وه‌سه‌ ئی هه‌ڵقه‌ی هاوسه‌رگيريه‌ وه‌ راسی جيوه‌جی بدێ و خوه‌يان له‌سای وه‌ديهاتن ئه‌و ئه‌زره‌ته‌ بوينن، وه‌لی ئه‌ڵڵاجه‌وی ها له‌ورا جايه‌ڵه‌يل فريه‌يگ ئی ديارده‌ی كوومه‌ڵايه‌تی و ئی هه‌ڵقه‌ی ‌پيرووزه‌ ره‌ته‌و ئه‌كه‌ن له‌وه‌ختيگ ك رووژگاريگ وه‌ ئوميد وخوه‌شاڵی پيشوازی له‌لی كردنه‌.

ئه‌گه‌ريش بچيمنه‌ بندروس باوه‌ته‌گه‌‌و شيه‌وكردن ته‌ماميگ ئه‌را ئی مه‌سه‌له‌ بكه‌يم، دوينيم ك ئافره‌ته‌يل فريه‌يگ هه‌ن ئی حاڵه‌ت له‌په‌نجه‌ نه‌كردن هه‌ڵقه‌ی هاوسه‌رگيريه‌ ره‌ته‌و ئه‌كه‌ن و نگه‌رانن له‌وه‌ك هاوسه‌ره‌يليان زوی ئه‌و هه‌ڵقه‌ له‌ په‌نجه‌ كه‌نن، يه‌يش جوور بيقه‌دركردنيگ وه‌ خوه‌يان زاننه‌ی و له‌ هه‌مان وه‌خت ناچارن بيده‌نگی هه‌ڵوژنن له‌ وه‌رانوه‌ر ئی هه‌ڵسووكه‌فته‌و باوه‌ڕيان ئه‌وه‌سه‌ ئی هه‌ڵقه‌ ته‌نيا هووكاريگ بويه‌ ئه‌را نيشانداين خوه‌شه‌ويسييگ ده‌سكرد له‌ رووژه‌يل ده‌زويرانی، ك وه‌و خاتريشه‌ ناڕه‌حه‌تی فريه‌يگ كيشن له‌وه‌ختيگ دوينن پياوه‌يل تر مقه‌يه‌تی له‌و هه‌ڵقه‌ كردنه‌و جوور يادگاری هه‌ر هيشتنه‌سه‌ی له‌ په‌نجه‌يان.

ره‌نجده‌ر ئاواره‌