دڵه‌ڕاوه‌كی

شفق نيوز

ئی ميدياكاره‌يله‌ دياره‌ له‌ نه‌فامی و نه‌زانستنه‌و ئه‌و كاره‌ ئه‌كه‌ن، يا هه‌ر خوه‌يان كه‌وڕخنن، وه‌نا چ هه‌وه‌جه‌يگ وه‌ی جووره‌ تابلۆێگ مه‌ترسيدار هه‌س پيشكه‌ش بكريه‌يده‌ هاووڵاتيه‌يل. ئه‌يانه‌ تويه‌نستيان و ئه‌تويه‌ننيش حه‌ماسه‌ت مه‌ردم به‌رزه‌و بكه‌ن و رووح ئازايه‌تی و قوربانيداين له‌تيان بارنه‌ جووش، ئه‌ويش وه‌و راده‌ ك گشت هاووڵاتييگ نه‌خش پێشمه‌رگه‌يل قارمان كوردستان داشتوود.

ئه‌و ميدياكاره‌يله‌ تويه‌نستيان و ئه‌تويه‌نن گوڕه‌ی به‌رز و سه‌برداری هيز پێشمه‌رگه‌ی كوردستان له‌ به‌ره‌يل جه‌نگ ئه‌را مه‌ردم جيواز بكه‌ن ك چوين جوور شير له‌ وه‌رانوه‌ر دوشمنه‌يل كورد وسيانه‌و ئازايانه‌ جه‌نگ ئه‌كه‌ن.

ئه‌وانه‌ تويه‌نستيان ئه‌و هه‌واڵه‌يله‌ چه‌ن جاريگ دوباره‌ بكه‌ن و شيه‌وكردن ئه‌رای بكه‌ن ك ئويشيد: پێشمه‌رگه‌يل دێرين ئه‌يلوول و گوڵان و شووڕش تازه‌ چوين رووژانه‌ خوه‌يان ناونويس ئه‌كه‌ن ئه‌را به‌ره‌يل جه‌نگ و چوين وه‌و عومر گه‌وراييه‌و ئاماده‌ی قوربانيداينن ئه‌را خاك پيرووز كوردستان.

ئه‌وانه‌ ئه‌تويه‌نن نموونه‌ی ملله‌ته‌يل تر باس بكه‌ن ئه‌را مه‌ردم كورد ك چوين تويه‌نستنه‌ ساڵه‌يليگ ك له‌ژير ئابڵووقه‌ و تووپواران بوينه‌و هه‌وڵ ئه‌وه‌ دانه‌ وه‌ گشت توانايگه‌و جه‌نگ بكه‌ن تا دوشمنه‌يليان شكاننه‌و قاويان دانه‌، يه‌يش بيجگه‌ ده‌يه‌ها نموونه‌ی تر جوور سه‌بر مه‌ردم لينيگراد و شاره‌يل تر سۆڤێت وه‌رين ك ئمڕوو ئه‌را مه‌ردم كوردستان باس بكريه‌يد.

ئيمه‌ وه‌رگری له‌ خاك و نه‌ته‌وه‌ی خوه‌مان ئه‌كه‌يم، ئيمه‌ ملله‌تيگ ئازاو چه‌ونه‌ترسيم، مێژوومان پڕه‌ له‌ داستان قاره‌مانی و سه‌برداری. كورد له‌ داعش و ماعش ڕخيان ناچێد، ئه‌وه‌ ئه‌وانن له‌ ئازايه‌تی كورد و پێشمه‌رگه‌يل قارمان له‌رزن.

ئيوه‌ نادێ له‌جيای داعش قسه‌ ئه‌را مه‌ردم بكه‌ين، با ئه‌وان رووژانه‌ سه‌دان دروو و فيلم نيشان بيه‌ن و دعايه‌ ئه‌را خوه‌يان بكه‌ن، كار ئيوه‌ بايه‌سه‌ وه‌ درووخستنه‌وه‌ی ئه‌و هه‌واڵ و راپۆرته‌يله‌ بوود، ئيوه‌ بايه‌سه‌ ئه‌وه‌نه‌ هوشيار بوين ك نادێ له‌ نه‌فامی بوينه‌ بووق دعايه‌كردن ئه‌ورا ئه‌وان، ئيوه‌ بايه‌سه‌ ئازايه‌تی و چه‌ونه‌ترسی و سه‌برداری پێشمه‌رگه‌و مه‌ردم كوردستان باس بكه‌ين، ئيوه‌ بايه‌سه‌ گوڕه‌و ئازايه‌تی بڵاوه‌و بكه‌ين، نه‌ك دڵه‌ڕاوه‌كی.

سه‌لام عه‌بدوڵڵا

ج . أ