سیاسه‌ت سته‌مكارى دژ فه‌یلیه‌یل

شفق نيوز

 

هه‌ر وه‌و خاتریشه‌ كورده‌یل فه‌یلى چه‌نه‌ها پرووژه‌ وه‌ ناو كه‌سه‌یل تر دامه‌زرانن، ك دویاخریش له‌وه‌ختیگ كووچ وه‌پیان كریا گشت ئه‌و پرووژه‌یله‌ زه‌فت و تاڵان كریان، وه‌لى ئه‌وانه‌گ له‌ بوار په‌روه‌رده‌یى كار كردیان جوور مامۆستاو ده‌رسده‌ر، ئه‌وانیش جیواز كریان ئه‌را وه‌زیفه‌یل تر له‌ وزاره‌ته‌یل تر عراقى تا له‌وه‌ر ئه‌وه‌گ دویاى ماوه‌یگ تر له‌ خزمه‌ت ده‌ربكریه‌ن.

له‌و كاره‌یل سه‌رسوڕمه‌نینه‌ ئه‌وه‌ بوى ك خوه‌ندنكاره‌یل ئاماده‌یى له‌وانه‌گ "به‌كالۆریا"ى شه‌ش ئاماده‌یى ته‌واو كردیان له‌ روڵه‌یل كورد فه‌یلى و سه‌ركه‌فتگ بوین له‌ خوه‌نین، ته‌نیا له‌وه‌ر ئه‌وه‌گ شایه‌ت جنسیه‌ى عراقى نه‌یاشتن وه‌رنه‌گیریان له‌ كۆلیژه‌یل، وه‌لى له‌ هه‌مان وه‌خت خریانه‌ وه‌ر خزمه‌تكردن له‌ سوپا!.

وه‌ل ئه‌وه‌یشا كورده‌یل فه‌یلى قه‌یه‌غه‌ى فرووشتن ماڵ و موڵكه‌یلیانیش له‌لیان كریا، چوینكه‌ له‌ى حاڵه‌تیشه‌ هه‌وه‌جه‌ وه‌ به‌ڵگه‌و ناسنامه‌ كردیان ئه‌را هه‌ر سه‌ندن و فرووشتنیگ جوور ماڵ و موڵك.

ئه‌وه‌ بوى حكوومه‌ته‌یل یه‌ك له‌شوون یه‌ك ره‌گه‌زپه‌رس و شۆڤێنى ده‌س كردنه‌ كووچ وه‌پیكردن وه‌جه‌م دژ كورده‌یل فه‌یلى و له‌ هه‌مان وه‌خت ماڵ و موڵكه‌یلیان زه‌فت كریاو گشت به‌ڵگه‌و ناسنامه‌یگ له‌لیان سه‌نریاوه‌و ئاواره‌ى مه‌رزه‌یل ئیران كریان، بیگومان یه‌یش بیجگه‌ گرتن هه‌زاران له‌ جایه‌ڵ جوانه‌یلیان و زیندانیكردنیان له‌ ساڵ 1980، ك تا ئیسه‌یش بى سه‌روشوونن.

له‌ ناونى ساڵه‌یل 1971 و 1982 فیشتر له‌ 300 هه‌زار كورد فه‌لى ده‌ركریا له‌ به‌غداو شاره‌یل ناوڕاس و باشوور عراق و بڕیگ له‌لیان له‌بان مه‌رز گیان له‌ده‌سدا، وه‌تابیه‌ت پیاگ و ژنه‌یل گه‌وراو په‌ككه‌فتگ و مناڵه‌یل كورپه‌.

رژیم به‌عس ده‌سكرده‌ زه‌فتكردن ماڵ و موڵك گشت ئه‌و كورده‌یل فه‌یلیه‌ ك له‌ باوگ و باپیره‌و نیشته‌جى عراق بوین و جایه‌ڵ جوانه‌یلیان خسته‌ زیندان وه‌بى ئه‌وه‌گ هویچ تاوانیگ داشتوون و دویره‌و خریان له‌ براو خوه‌یشگ و داڵگه‌یلیان، ك گشت ئى تاوانه‌یلیشه‌ ك رژیم ئه‌نجامى دا دژ كورده‌یل فه‌یلى ته‌نیا له‌وه‌ر ئه‌وه‌ بوى ك كورد و شیعه‌ مه‌زه‌و بوین و خوه‌شه‌ویسى داشتن ئه‌را نیشتمان خوه‌یان.

له‌میا سافى

ج . أ